Ñahendu Jesús Ñe’ẽ. Miércoles 27º Durante el Año

Escucha el evangelio y la reflexión en: https://youtu.be/wYeFHVNOhgc

Miércoles 27º Durante el Año Lucas 11, 1 – 4.

Upe ára Jesús oñembo’epa rire, peteĩ idisípulo oñemboja hendápe. He’i chupe:— Mbo’ehára, ore mbo’éna mba’éichapa roñembo’e vaerã, ku Juan ombo’e haguéicha idisípulokuérape.

Jesús he’i chupekuéra: — Peñembo’e jave, peje kóicha: Ore Ru toñemomba’e nde réra marangatu.

Eju ha eru oréve ne Reino. Ára ko’ẽrekena eme’ẽ oréve ore rembi’urã.

Eheja rei oréve ore pekádo,
ore roheja reiháicha opavave ore rehe ojapo vai va’ekuépe.
Aníkena rehejátei rojepy’a ra’ã.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oikómivaniko upérupi he’íva mitãme: Néike che memby, néike che rajy, eñembo’éke, terehóke misahápe, terehóke tupaópe, catecismo-hápe, ha mba’e. Ha umicha omokyre’ỹ ichupekuéra ñe’ẽme. Ha upéi katu ha’ekuéra opyta ógape.
Ndojehechái oñembo’éramo, aipo Biblia ipópe hamba’e ndojekuaáiva. Ndohói misahápe, térã tupaópe, noiméiramo ihénte mano, térã omendáva, terãkatu hunción jave mba’e ohóne ágã mombyrymíguinte oguata procesión-pe.

Ñahendu angete San Lucas omombe’u ñandéve mba’éichapa Jesús oñembo’e jepi ha umi hemimbo’ekuéra ohecháva chupe mante rei upéicha ojapo. Ohecha hikuái Jesús oñemoha’eño jepi ha oho oñe’ẽ puku Túva Ñandejára ndive.
Ha oñandúgui hikuái upégui Jesús onohẽha pe pu’aka ha jerovia mbarete omboguatáva ichupe, oikuaasetéma avei ha’ekuéra mba’éichapa ikatuva’erã ojapo upéva. Ha ohómakatu ojerure ichupe ombo’e haguã ichupekuéra mba’éichapa oñembo’eva’erã Ñandejárape.

Oĩ ningo he’íva oikuaa ha orekoha ñembo’e ipoderósova, ha’emante oikuaáva ha ndaikatúiva omombe’u avavépe. Jesús nahakate’ỹi upe ñembo’e ha’e oikuaáva rehe, noñongatúi ijupe guarãnte ha ombo’e idisipulokuérape. Ha ñanembo’e ñandéve ave mba’éichapa ñañe’ẽva’erã Ñandejára ndive, ñati’ỹre ha jakyhyje’ỹre ichugui.

Ikatukohína pe mba’e guasuve Jesús ñanembo’éva ko ñembo’e rupive ha’ehína ikatuha ñañemboja ñañemongeta Ñandejára ndive, ñande ru térã ñande sy rendápe jaharamoguáicha.

Ñañe’ẽ ichupe ñande rógape ñaimeramoguáicha hendive, ñandekuaa porã, ñande rayhúva ha ome’ẽne haguã ñandéve opa mba’e porã. Reñemongetápa che reindy ha nde che irũ, Ñandejára ndive, nde ru térã nde syramoguáicha.

Pa’i Jasy.