Ñahendu Jesús Ñe’ẽ. Miércoles 29º Durante el Año

Escucha el evangelio y la reflexión en: https://youtu.be/KZzXi5S6DUc

Miércoles 29 Durante el Año Lucas 12, 39 – 48

Jesús he’i idisípulokuérape: Peikuaa ramo mba’e órapepa oúta peẽme mondaha, niko peha’arõta ha ndapeheja mo’ãi oike. Ha péicha peime vaerã opa ára. Peimo’ã’ỹve jave niko aju jeýne che.

Pedro osẽ oporandu Jesúspe: — Mbo’ehára, ko’ã mba’e eréva hína piko, oréve ere térã opavavépe g̃uarã hína.

Ha he’i Jesús: Mávatepa hína pe ijeroviaháva ha imba’e recha kuaáva. Ku ipópe óga jára ohejapáva opa mba’e, ha hapichakuéra remikotevẽ jepe ohecha kuaáva. Ou porã vaerã chupe, hóga jára ou ramo ojuhu ojapopa hague umi mba’e oheja va’ekue chupe. Ijeroviaháva pópe niko pe óga jára ohejapáne opaite mba’e.

Ja’éntena pe tembiguái he’iha ipy’apýpe “Che patron niko mombyry oho, ha oime va’erã hi’aréta hína”. Ha oñepyrũ oñemboharái hapicháre hamba’e, ha osẽ okaru ha omokõ. Péicha háguinte hóga jára ou jeýne, ku oimo’ã’ỹve jave. Orrepunta vaerã chupe
ág̃a, ha omondo umi tekove jeroviaha’ỹ apytépe.

Pe oikuaáva ipatron rembipota, ha upéi ndojapói chupe oje’éva, heta oipo’o va’erã ág̃a. Umi oikuaa’ỹre ojapóva ojapo’ỹ vaerã katu, oipo’o’ivéne. Ñandejára niko imba’e porã pene ndive. Upéicha ave, ha’e oha’arõ peẽ pejapo ha’e oipotáva. Ha oime rire ha’e ipojera pene ndive, hetave oha’arõta pende hegui.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Pe túva ha sy osẽtaramo mombyry hógagui niko oheja mante va’erã oñangarekóva mitãnguéra, ha oimérõ aguélo ha aguéla rehe. Ha ndoheja mo’ãi niko oime raẽva ndive. Ohejáne peteĩ ikatúvare ojerovia. Ha péicha, he’i Jesús ñande Ru ojeroviágui ñande rehe oheja ñandéve ñande rapicha ñañangareko haguã.

Jahechakuaa haguã hemikotevẽ ha ñamoirũ haguã chupe kuéra opa mba’épe jaheja’ỹre ha’eño.

Ágã katu jajúramo ja’e: “Tojehecha ha’ekuéra, mba’éiko chéve”. Ha ñande jehénte ñama’ẽramo, ñande jupe guarãnte jaheka, ñande vy’arã rapykuérinte jaikóramo katu, upéva ojeréta ñande rehe, he’i Jesús. Ha ipahápe ñande nañapenái ha ñambotapykue haguére ñande rapicha, noñepena mo’ãi avei ñande rehe ha ñañembotapykuéta.

Ñande cristiano jaikuaa porãva Ñandejára ñanderejaha ñangareko hára ramo umi michĩve ha ikangyvéva ndive guarã ñañembotavyrõ ha ndajajapóiramo, tuichave jaligáta, he’i Jesús. Umi ojapo vaíva hapicháre ndoikuaái haguére Jesús remimbo’e katu sa’ive oipo’óta ñande hegui.

Pa’i Jasy.