Ñahendu Jesús Ñe’ẽ. Sábado 14º Durante el Año

Escucha el evangelio y la reflexión en: https://youtu.be/pbsLUStInJg?si=WUtNzMlqgikTs-Sv

Sábado 14º Durante el Año Mateo 10, 24 – 33

Upérõ Jesús he’i idisípulokuérape: Ndaikatúi niko peteĩ disípulo tuichavévo imaéstrogui. Upéicha avei, ndaikatúi peteĩ tembiguái tuichavévo ijáragui. Upévare, ovy’a vaerã peteĩ disípulo ohupytýrõ imaéstrope, ha tembiguái ijárape. Che rehe he’i ramo hikuái che añaha, piko mba’e nde’i mo’ãi hikuái pende rehe.

Ani pekyhyje avavégui. Opa mba’e oñemívako ojekuaapa vaerã ágã. Ha opa mba’e okañýva ojehecha vaerã ágã. Ko’ã mba’e ha’éva peẽme pytũmbýpe, pehenduka peẽ araitépe. Ha umi mba’e ha’éva peẽme pende apysápe, perosapukái opa rupi. Ani pekyhyje umi ikatúvagui ohundi pende rete, ha ikatu’ỹva ohundi pene ánga. Pekyhyje Ñandejáragui, ikatúva pene rundi Aña retãme.

Mokõi guyra’i niko mba’eve ndovaléi. Péicharõ jepe nomanói Ñandejára ndoipotái ramo. Pene akãrague peteĩ-teĩ jepe niko ha’e oikuaapa. Aníke aipo ramo pekyhyje, peẽ niko mba’e guasueteve hína heta guyra’ígui.

Peẽ pemombe’u ramo peẽ che disípuloha, che ave amombe’úne che Rúpe peẽ che mba’eha. Peje ramo pende jehe ndaha’eiha katu, che ha’éne che Rúpe ndapoikuaaiha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jesús oikuaauka ñandéve hína ñande rapépe jatopataha umi ndoikuaaséiva mba’eve Ñandejáragui. Ipochýva voi tupaogua ndive, nohenduséiva Ñandejára ñe’ẽ ha ñembo’e. Jajuhu ha jahecháta avei ñande rapépe heta mba’e vai.

Monda, japu, ñe’ẽ rei, tie’ỹ, mbarete, pokarẽ. Jahecháta ave mba’éichapa pláta potágui oñehundi ohóvo ñande rekoha, yvy, ysyry, ojejukapa mymba ka’aguy ha oñemosẽ ñande ypykue indígena ijyvýgui. Umíva renondépe ikatu ñambohasánte, ñakirirĩ, ñañemo lente hũ, ñañembotavy.

Upéicha okañy ha opa reíta vaicha. Heta vése jakyhyjégui, ndajaikovaiséi, nañambyaiséi ñande rapicha rembiapo, ani ou ñande ári pochýre ha upévare jahejánte.

Jesús katu he’i ñandéve ani haguã jakyhyje avavégui térã mba’eveichagua mba’égui. Ñande rekove oĩgui Ñandejára pópe ha upégui ndajajei mo’ãi ñamanóramo jepe. Ndaipóri avaveichagua ava yvy ári, ha ndaipóri Satana ikatu vaerãva ñande pe’a Ñandejára pógui.

Jesús ñanemokyre’ỹ ja’e haguã kyhyje’ỹre ha ñatĩ’ỹre, oimeraẽva renondépe, upe añeteguáva ha upe hendape’ỹva. Ñamombe’u ñande jajeroviaha Jesucristo rehe ha ha’eha heseguáva. Ha oúramo ñande ári kavichu’i pochýicha, ñanemandu’a ou hague avei kavichu’i pochýicha Jesús apére. Ha upéicha oikóramo ñande rehe, ñañemopeteĩ ha ñañembojojaha ñane maéstro ha ñande ruvicha ndive.

Ijetu’u’íta hína ra’e ko Jesús ndive jaguata ra’e. Aje che reindy ha nde che irũ. Ha mba’épa nde rehecha ikatúva ñanepytyvõ ani haguã ñambopo’i haku vove la yvy.

Pa’i Alberto Luna.