Ñahendu Jesús. Sábado 18º Durante el Año

Escucha el evangelio y la reflexión en: https://youtu.be/g_sAyN_76wU

Sábado 18º Durante el Año Mateo 17, 14 – 20.

Jesús ha idisípulokuéra oguãhẽvo héntekuéra ijatyhápe, oñemboja Jesús rendápe peteĩ karai. Oñesũ henondépe ha he’i chupe:— Karai, aipota eiporiahuvereko ko che ra’y. Imba’asy ojopy jave chupe niko oity jepi chupe yvýpe ha pévare oiko asy. Hetáma péicha ho’a tatápe térã ýpe hamba’e. Agueru niko kuri nde disípulo kuérape, ha’e kuéra katu ndikatúi omonguera.

Jesús he’i upémarõ: — Háa, peẽ tekove jerovia’ỹ. Araka’e peve piko aime va’erã pene ndive. Araka’e peve piko aikóta pende reheve. Peru chéve pe mitã.

Upépe, Jesús oja’o pe demóñope, ha omosẽ pe mitãgui. Ha pe mitã okuera.

Upéi umi idisípulokuéra oñe’ẽ Jesúspe ha’eñoháme, ha oporandu chupe:— Mba’éreiko ore nda ore pu’akái kuri pe demóñore.

Jesús he’i chupe kuéra: — Ha ndapejeroviapáigui Ñandejárare. Añetéko ha’e hína peẽme. Pende jerovia michĩ kytomi ramo jepe, ikatúne peje peteĩ sérrope “Ejehapo’o. Eva amo”, ha péicha oikóta. Opa mba’e ikatúne pejapo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ou vai vove ou vaipa”. He’i ningo peteĩ ñe’ẽ. Mba’asy vai ñande aho’i ha nañanepohãi. Ikatu avei hi’ári ñande sogue ha ndajaikuaái moõ jajeporekáta ha mávarepa jajekóta. Jahecha ko karai oúva Jesús rendápe ogueru henondépe ita’ýra hasy vaíva, umi Jesús apóstol kuéra ndaipu’akáigui omonguera haguã pe mitãme.

Oime niko umi mba’e vai oĩva kuri ñande pópe jajoko haguã, ikatúva kuri ñande jajapo ha ñanesimapénagui ndajajapóigui, upéi ou ou ñande ári ivaíva. Oime avei umi mba’e vai ñande ndajakausáiva, ambue ñande rapicha rembiapo vai oúva ñande ári. Ha oime katu umi ndajaikuaáiva mba’érepa ou ñandéve.

Umíva ijetu’uve, ko’ýte ndajaikuaáiramo mba’éichapa ñasẽta ichugui. Ha ñañeha’ã ñande avei ko karaimícha, ndopytáiva oñembyasy ha’eño. Ñañeha’ã ñande avei umi apóstolkuéraicha, oñembo’éva pe mitãre michĩramo jepe ijerovia. Jajapo oĩmíva ñande pópe oñondive. Ani ñamboka’apa Ñandejárape nañañeha’ãi haguére ñañangareko ñande rapicháre ñande py’aite guive.

Jesús he’i ñandéve jajerovia añetéramo heta mba’e ikatu’ỹvaicha oiko, ikatúta jajapo. Heta mba’e pohýi yvyra máta poguasúicha ikatu’ỹ vaicha jahapo’o, jahechánema katu noimevéi ñane renondépe. Ha heta mba’e jagueropu’aka’ỹvaicha, ita térã sérro guasúicha, opu’ãva ñande raperãme, jahecháne ojei ha jahasa jaguatávo tenonderã.

Pa’i Alberto Luna