Ñahendu Jesús. Domingo de la Santísima Trinidad

Escucha el evangelio y la reflexión en: https://youtu.be/RqNph9PAm50

Domingo de la Santísima Trinidad – Ciclo C Juan 16, 12 – 15

Upérõ, ho’u aja hikuái upe Pascua rehegua karu guasu, Jesús he’i idisípulokuérape: Heta mba’e niko areko gueteri ha’e va’erã peẽme. Ko’ágãnte ndaikatu mo’ãi oikepa peẽme pene akãme. Ágã Espíritu Santo ou vove, ha’e ohechaukáta peẽme umi mba’e añeteguáva. Ha’e niko noñe’ẽ mo’ãi ijehegui reínte. Nahániri.

Omombe’úta peẽme umi mba’e ha’e ohendu va’ekue, ha oikuaaukáta ave peẽme umi mba’e ojehútava. Ha’e che kuaaukáne peẽme ha che momba’e guasúne. Upe che ame’ẽvagui chupe ha’e oikuaaukáta peẽme. Opa mba’e che ru oguerekóva, che mba’e avei. Upévare ha’e hína peẽme Espíritu Sánto ombyatytaha che ame’ẽvagui chupe oikuaauka haguã peẽme.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ñande sy niko ome’ẽ ñandéve heta mba’e, ñande rayhu rupi, ñane mongakuaa ipype, ha upéi ñanemokambu, ha ñande reko ijyva ári ha hapypa’ũme. Ha heta mba’e ome’ẽva ñandéve niko ñande ru rembiapo rupi jahupyty.

Ñande nañañandúi ramo jepe ñande rúpe ha’e omba’apo ha omoguahẽ heta mba’e ñande rógape jakaru, ñañemonde ha ñaneresãi haguã. Ha ñande nañapensái umi mba’e oñeme’ẽva ñandévepa ñande sy mba’e térãpa ñande ru mba’e. Peteĩchante oguahẽ ñandéve upe mborayhu rupi oñeme’ẽva ñandéve, ñande sy ha ñande ru rupive. Noñemboja’ói.

Ñande niko jarovia Ñandejára ipeteĩ ha mbohapyha: Túva Ñandejára, Ta’ýra Jesús ha Espíritu Santo. Ha pe mborayhu ha mba’e porãita oúva ñandéve Ñandejáragui, taha’e Túvagui, taha’e Jesús gui, taha’e Espíritu Santo gui, ndojoavýi ha noñemboja’ói.

Peteĩ tapépe ñanesãmbyhy. Ndaha’éi hína Túva Ñandejára ñande rahátava peteĩ henda rupi, Jesús ohóta ótro láo ha Espíritu Santo katu ojapíta oikuaa háicha. Ndaupéichai hína. Upévare ningo Jesús oho mboyve itúva rendápe he’i raka’e iñirũnguérape: “Opa mba’e che ru oguerekóva, che mba’e avei, ha Espíritu Sánto ombyatýta che ame’ẽvagui chupe oikuaauka haguã peẽme.”

Peteĩ músikapu porãme, mbaraka, árpa ha purahéi hyapu hápe oñondive ha ndojoavýi, upéicha avei Túva Ñandejára, Ta’ýra Jesús ha Espíritu Santo, omba’apo oñondive ojapo haguã ohóvo ñande hegui Ñandejára ra’y, Ñandejára rajy.

Mavaitévapa che reindy ha nde che irũ, upe reñanduvéva nde rekovépe, Túva Ñandejárapa, Ta’ýra Jesús pa, térãpa Espíritu Santo. Peteĩ reñanduve ramo oime nendive, reikuaa vaerã upe jave mbohapyvéva oimeha katuete nendive.

ÑAÑEMBO’E OÑONDIVE

Espíritu Santo marangatu, eju ha eike ore pype, ore apytépe, orembo’e rohayhu haguã Jesús ohayhúva, ha rojapo haguã ha’e ojapóva, oiko haguã ore hegui Túva Ñandejára ra’y ha tajýra. Amén.

Pa’i Alberto Luna.