Ñahendu Jesús. SAN ESTEBAN ÁRA

Escucha el evangelio y la reflexión en: https://youtu.be/JByOOPQIuEs

26 de diciembre: San Esteban ára Mateo 10, 17 – 22

Jesús he’i idisípulo kuérape: Peiko kuaáke. Cháke oĩta pende reraháva karai juez renondépe, ha peñembyepotíta tupao rupi. Ha che disípulo haguére peẽ, pejereraháta rréikuéra renondépe.

Peichahápe, pene mandu’áta chupe kuéra ha umi hudio’ỹvape che rehe. Ha pene moĩ ramo hikuái mburuvichakuéra pópe, ani pejepy’apy mba’épa pejéta térã mba’éichapa peñe’ẽta. Ija vove peẽme peñe’ẽ haguã, Ñandejára voi omoĩta pende jurúpe mba’épa pejéta. Ha ndaha’e mo’ãi voi peẽ peñe’ẽtava. Nahániri. Ñandejára Espíritu pe oñe’ẽtava pende juru rupi.

Tyvýra ha teindýra opu’ãne ojuehe, ha peteĩ ome’ẽne ambuépe ojejuka haguã. Túva ha sy ome’ẽne ta’ýra térã imemby. Mitã katu opu’ãne túva ha sýre ha ojuka. Che disípulo haguére peẽ, avave nda’ija’e mo’ãi pende rehe. Che rehe ojeroviáva ipahaite
peve katu, oikovéta.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe mitã oúva yvy ári niko ogueru ramo jepe tuicha vy’a, ou avei jehasa asy pa’ũme. Pe kuña imemby haguã niko hasy asy chupe hetépe upe mitã ñesẽ hyepýgui. Opáichavo oguahẽ rire hesarái pe jehasa asýgui ha ndaijái ipype vy’águi ohecháramo chupe ijyva ári.

Ko árape ñanemandu’a hina San Estébanre. Ha’éva hina umi Jesús disípulokuéra apytépe upe, Jesús rire, ojejuka va’ekue ijerovia rehe. Ha upéicha ha’e oñemopeteĩ Jesús ndive, hekovépe ha avei imanóme.

Ñama’ẽvo ñande pesébrere niko jahecha mba’éichapa pe Jesús rekove oguerúma voi ijypyete guive pe jejopy ha jehasa asy. Noñemoguahẽi ha nahendáigui ou onace mboriahu apĩcha peteĩ vaka kehápe. Ha uperiremínte ojehekágui ojejuka haguã, apúrope
oho okañy Egipto pe. Ha upéva ohechaukáma ñandéve hína iñepyrũmby guive mba’éichatapa upe Jesús rape, ha mba’éichatapa avei umi oguatáva Jesús ndive.

Mba’etekópa che irũ ha che reindy. Upe ivevúi ha igústo aja niko opa mba’e iporã. Ágã katu oñeñe’ẽ vai vove ñande rehe, ojekopi vove ñande lómore, oiméramo ñane muñáva, opuka ha oñembohorýva ñande rehe cristiano haguére, jajerovia haguére Ñandejára rehe, jaiko haguére tupaóre katu ijetu’uvéma. Opáichavo ñama’ẽvo San Esteban, ha Jesús rehe, ome’ẽ vaekue hekove ijeroviáre, ikatu avei ñande jaropu’aka umi mba’e ñande jerovia ha Ñandejára pytyvö rupive.

Pa’i Jasy.