SÁBADO QUINTO DE PASCUA

SÁBADO QUINTO DE PASCUA

Primera lectura:

Ko’ágä   ñahendúta Tupã Ñandejára ñe’ẽ Apóstol kuéra rembiapokuépe oĩ háicha.  

                          16, 1-10

Pablo oguahẽ Derbe ha Lístrape, ha upépe ojuhu peteĩ Jesús reroviaha, hérava Timoteo. Isy, Israelgua Jesús reroviaha ha itúva griégo. Listra ha Iconio pegua pehẽngue kuérava oñe’ẽ porã hese. Pablo oipota Timoteo omoirũ ichupe kuéra, ha upéva mboyve ombyapi’ouka ichupe, ndoipotáigui ipochy Israel guáva oikóva upe rupi. Opavave niko oikuaa Timoteo ru griegoha.

Opa umi táva ohasaha rupi oikuaauka umi Jesús reroviahápe apóstol he’i va’ekue ha moakãhára kuéra Jesucristo iglésia Jerusalén pegua. Aipórõ, umi Jesucristo iglésia oñemohatã ijeroviápe ha umi Jesús reroviaha hetave arako’ẽre.

Espíritu Santo ndohejáigui ichupe kuéra omoerakuã upe ñe’ẽ Ásiape, ohasa hikuái Frigia ha Galacia rupi, ha oguahẽ Misia rembe’y peve. Upégui oikese mo’ã hikuái Bitíniape, Jesús Espíritu katu ndohejái. Aipórõ, ohasávo Misia rupi oguejy Tróadepe. Upépe Pablo peteĩ pyharépe oguereko peteĩ jechauka: Ohecha peteĩ kuimba’e Macedoniagua, ñembo’yhápe he’íva ichupe: “Ehasána Macedóniape ha ore pytyvõ.”

Pablo oguereko rire ko jechauka, roñemoĩ roho haguãicha Macedóniape, roikuaa porãgui Tupã Ñandejára ore renoiha romoerakuã haguã upépe marandu porã.

Tupã Ñandejára Ñe’ẽ.

SALMO ÑEMBOHOVÁI      99, 1b-3. 5

R. To guerohory ko yvy Tupä Ñandejárape.

O bien:

Aleluia.

To guerohory ko yvy Tupä Ñandejárape.

Pejapo vy’a pópe ichupe hembipota,

peguahẽ hendápe sapukái rorýpe. R.

Peikuaa porãke: Ñandejára hína Tupã.

Ha’e ñande apohare ha ñande imba’e,

hetãgua ha ovecha iñu megua. R.

Tupä Ñandejára imba’e porãgui.

Imborayhu ndaijapýrai, ha heko jeroviaha opa árape guarã. R.

ALELUIA Col. 3, 1

Aleluia.

Peë peikove jevy rupi Ñandejára Jesucristo rehe ae,

peheka umi mba’e porä yvága pegua,

Cristo oguapyhápe Tupä Ñandejára akatúape.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                                15, 18-21

Upe ramo ohasa mboyvemi Tupã Ñandejára ykére, Jesús he’i hemimbo’e kuérape:

Tupã Ñandejárare ojerovia’ỹva ndaija’éi ramo pende rehe, pene mandu’ánteke che rehe raẽ ndaija’éi hague. Peẽ ha’e kuérava rire, yvypóra kuéra Tupã Ñandejárare ojerovia’ỹva pende rayhu va’erã mo’ã, ojoayhu háicha hikuái. Che katu poiporavo va’ekue peẽme yvypórakuéra apytégui, ha upévare ha’e kuéra ndaija’éi pende rehe.

Peẽ niko ndaha’e véima ha’e kuéraicha. Pene mandu’áke ko ha’e va’ekuére peẽe: Ndaipóri tembiguái tuichavéva ijáragui. Che rehe oko’i rire, pende rehe avei oko’íne. Ha umi mba’e che ha’éva ojapo rire, peẽ pejéva avei ajapóne. Opa ko’ã mba’e ojapóta hikuái pende rehe pejeroviágui che rehe, ndoikuaáigui hikuái upe che mbouharépe.

Ñandejára Jesucristo Ñe’ẽ.