SÁBADO SEMANA XIX TO

SÁBADO SEMANA XIX TO

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha   18, 1-10. 13b. 30-32

Tupã Ñandejára he’i chéve: “Mba’érepa Israélpe oje’e mante ku ñe’ẽnga he’íva: Túvakuéra ho’u parral aky ha ta’ýrakuéra hãi jehýi. Che, opa mba’e Jára, che rekovére ha’e ndapeje mo’ã veimaha araka’eve upe ñe’ẽnga Israélpe. Che mba’e opa yvypóra, taha’e túva térã ta’ýra. Iñangaipáva omanóne.

Imarangatúva ojapo ramo heko jojáva ha hekópe guáva, ndoikói ramo karu guasuhápe umi ijyvateha rupi oñemomba’e guasuhápe ta’ãnga rei, ndojeroviái ramo tupã gua’u Israel peguáre, ndopokóiva hapicha rembirekóre, ndoikói hembireko ndive oguejy jave ichupe imba’asy, ndojopýi ramo avave ndive ha ome’ẽ jevy pe ojeheja va’ekue  ichupe pláta porúre, nomondái ramo avavépe, omboja’o ramo hembi’u iñembyahýivape ha ijao ijopívovape, ndoiporukái ramo hepýre, ndojapói ramo ivaíva avavére, hekojoja ramo oporombojovakévo; oiko ramo che ha’évare ha ojapopa ramo che rembiapoukapy, upéva upe añetehápe heko potĩva ha upévare nomano mo’ãi. Che, opa mba’e Jára ha’e upéicha.

Oime ramo peteĩ heko ñarõva ha oporojukáva ojapóva ko’ã mba’e, peteĩvante jepe, oiporukáva hepýre, upéva ndoikove mo’ãi. Ojapo ramo ko’a mba’e che a’e’ỹha omano mante va’erã, ha ha’énte ojapóta ijehe.

Che pombojovake pene rembiapokue ojerure háicha. Che, opa mba’e Jára, ha’e upéicha. Pya’éke peheja pende reko vai, ha pembopyahu pende py’a ha pene ánga. Mba’ére piko remano mante va’erã, Israel, ko che ndaipotáiva omano avave? Pejei ivaívagui ha peikovéta. Che, opa mba’e Jára, ha’e upéicha.

Tupã Ñandejára Ñe’ẽ.

SALMO ÑEMBOHOVÁI      50, 12-15. 18-19

Opavave: Tupã Ñandejára, embopyahu che rekove

Tupã Ñandejára, embopyahu che rekove ha ta imarã’ỹ,

che py’a to ñembopyahu ha ta imbarete.

Anítei che mosẽ ne renondégui,

térã reipe’a che hegui nde pytu marangatu. O.

Embopyahu jevy chéve vy’a añandúva ajejopy vaihágui

che renohẽvo, ha nde pu’aka marangatu ta che mombarete.

Nde rape rehechaukáne iñangaipávape,

ha heko vaíva ojevýne ne rendápe. O.

Nde rehecha ramói mba’e kuave’ẽ.

Ndéve aikuave’ẽ ramo, naiporãi ndéve.

Taikuave’ẽna ndéve py’a rasy oñemomichĩva,

upéva katu rehecha ramo Tupã Ñandejára. O.

ALELUIA Cf. 1Tes 2, 13

Aleluia.

Pe japyhy Tupã Ñandejára Ñe’ẽ, ani yvypóra ñe’ẽicha, pejapyhy uvei pe añete háicha, Tupã Ñandejára ñe’ẽicha.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha  19, 13-15

Upe ramo heta mitã mimi ojereraha Jesús rendápe, ha’e omoĩ haguã ipo iñakãre ha oñembo’e haguã hesekuéra. Umi hemimbo’ekuéra katu, ipochy umi mitãme oguerúva ndive.

Jesús he’i ichupekuéra: Peheja umi mitã tou che rendápe, ha ani pejoko. Umi ha’ekuéraicha guápe guarã niko hína ñesãmbyhy yvágagui oúva. Ha omoĩ ipo iñakã ári kuéra. Upéi ha’e osẽ oho upégui.

Ñandejára Jesucristo Ñe’ẽ