LECTURAS SÁBADO SEMANA XVIII TO

LECTURAS SÁBADO SEMANA XVIII TO

Ko’ágä ñahendúta Tupã Ñandejára ñe’ẽHabacuc arandukápe oĩ háicha      1, 12 – 2, 4

Ore Jára, nandéi piko opa ára reikovéva, Tupã imarangatúva, omano’ỹva, Tupã che Jára ha che mo’ãhára?

Nde remombarete Caldéo kuérape, nde rérape oporonupã haguã, nde reko ipotĩ eterei, reheja haguã oiko iky’áva, rema’ẽ haguã kirirĩháme, iñañáva oporojopy vai ramo.

Mba’éicha piko aipo ramo rema’ẽ kirirĩháme oporojukávare?

Mba’ére piko nde eréi mba’eve heko añáva ohundírõ imarangatuvévape ichugui ?

Nde, rereko yvypórape pira yguasúpe guáicha, ha mbói huvicha’ỹ vaicha.

Caldéo kuéra oñemomba’e tetã nguérare pira ojekutu háicha pindápe, pyahápe ombotyryry ha oguenohẽ ha ohechávo heta ijatyha, ovy’a eterei.

Upévare ha’e kuéra omomba’e guasu ipyaha ha ipinda.

Hérape omymbajuka, ha ichupe insiénso ohapy hese ae oguerekógui hembi’urã iporã ha heta itéva.

Ha akóinte piko Caldéo kuéra ore renohẽta pyahápe ha ore jukáta oikuaase’ỹre mba’eve?

Ama’ẽta hína ojapo háicha ima’ẽhágui pe távare oñangarekóva, aikuaa haguã mba’épa he’i Tupä Ñandejára pe ha’évare ichupe.

Ha he’i chéve Tupä Ñandejára: “Tuju pehenguépe ehai ko ndéve ahechaukátava, ikatu haguã oñemoñe’ẽ syry.

Noguahẽi gueteri ára oiko haguã ko rehecháva, katu ete oikóta ramo jepe.

Hi’are ramo eha’arõnte, ágã hi’árape oguahẽta.

Ehai umi heko añáva oñehunditaha, imarangatúva katu oikovéta ojerovia rupi Tupã Ñandejárare.”

Tupã Ñandejára Ñe’ẽ.

SALMO ÑEMBOHOVÁI   9, 8-13

R. Tupä Ñandejára aníke remboyke ne rendápe oguahẽva.

Tupä Ñandejára niko mburuvicha guasu opa árape guarã,

oñemoĩma omohenda haguãicha opa mba’e,

oisãmbyhy ko yvy tekojojápe,

ha omoakã tetã nguéra heko itépe. R.

Ojeguereko vaíva Tupä Ñandejára ha ichupe kuéra oipytyvõ.

Tupä Ñandejára hese kuéra oñangareko jejopy vaípe.

Upe nde kuaáva, nde rehe ojerovia,

neremboykéigui ne rendápe oguahẽvape. R.

Pepurahéi Tupä Ñandejárape Siónpe oguapýva,

peikuaauka opa rupi hembiapokue.

Tupã Ñandejára imandu’a imboriahúvare.

Ha’e ojahéi umi ojopy vaíva mboriahúvape. R.

ALELUIA MCf. 2Timt 1, 10b

Aleluia.

Ñandejára Jesucristo ore Pysyröhára ipu’aka manóre

ha ombojajái pe tekove, Marandu porä rehe ae.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha       17, 14-20

Upe ramo oguahẽvo hikuái opavave oĩháme, oñemboja Jesús rendápe peteĩ karai, oñesũ henondépe ha he’i ichupe: Karai, eiporiahuvereko mína ko che ra’ýpe. Imba’asy ojopy jave ichupe niko oity jepi ichupe ha upévare oiko asy eterei. Hetáma péicha ho’a tatápe térã ýpe. Agueru kuri ne remimbo’e kuérape, ha ha’e kuéra ndaikatúi omonguera.

Jesús he’i upémarõ: Háa, tekove jerovia’ỹ! Araka’e peve piko aiméta pene ndive, araka’e peve piko aikóta pende reheve? Peru chéve pe mitã rusu.

Upépe Jesús oñe’ẽ hatã pe mba’e pochýpe, ha omosẽ pe mitãgui. Pe mitã okuera upepete.

Upéi umi hemimbo’e kuéra oñe’ẽ Jesús ndive ha’eñoháme, ha oporandu ichupe: Mba’ére piko ndaikatúi ra’e ore romosẽ pe mba’epochy?

Jesús he’i ichupe kuéra: Ndapejeroviapáigui Tupãre. Añete ha’e peẽme, pende jerovia michĩ ramo jepe oimeraẽ mba’e ra’ỹi michĩve vaicha, pejéta peteĩ yvytýpe: “Ejei ko’águi. Eva amo”, ha pe yvyty ováta. Oimeraẽ mba’e ikatúne pejapo.

Ñandejára Jesucristo Ñe’ẽ