SÁBADO SEMANA 28º DURANTE EL AÑO

SÁBADO SEMANA 28º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Éfeso guápe    1, 15-23

Che pehẽnguekuéra:

Aikuaágui peẽ pejeroviaha Ñandejára Jesús rehe ha pehayhuha opa umi Tupã Ñandejára mba’évape, opa árape amoguahẽva che aguyje  Tupã Ñandejárape pende rehe, ha añembo’évo che mandu’áva pende rehe.

Ajerure Ñandejára Jesucristo Tupãme, Túva tuicha itéva, ome’ẽ haguã peẽme pe Espíritu, pene moarandu ha oikuaauka haguã peẽme mba’eichaguápa Tupã Ñandejára, ha añetehápe peikuaa haguã ichupe.

Ajerure Tupã Ñandejárape omoesakã haguã peẽme pene akãme perekóva, peikuaa porã haguã mba’e peha’arõ haguãpa ha’e pene renói raka’e, ha mba’éicha itépa ha’e tuicha ohovasa opa mba’épe, umi imba’évape, ha mba’éicha itépa tuicha ha ijojaha’ỹva pe ipokatu ñane pytyvõva, ñande Cristo rehe jajeroviápe.

Ko ipokatu ñane pytyvõva niko hína pe pokatu Tupã Ñandejára ohechauka mbarete va’ekue, omopu’ã jey ramo Crístope, ha omboguapy ichupe ijakatúape, yvágape. Tupã Ñandejára omoĩ ichupe opaichagua yvategua ruvicha ári, ha opa ite mba’e oĩva ári, ko’ágä gua ha oútava. Ha’e omoĩ opa itemba’e Cristo py guýpe, ha omoĩ Crístope voi iglésia akãrõ. Cristo iglésia niko Cristo rete hína, Cristo rupi oĩmba porãva, Cristo rupi hína opa ite mba’e oĩ porãmba.

Tupã Ñandejára Ñe’ẽ.

SALMO ÑEMBOHOVÁI     8, 2-3a. 4-7

Opavave: Tupã ore Jára, herakuã porã ite nde réra ko yvy ape ári.

Tupã ore Jára, herakuã porã ite nde réra ko yvy ape ári.

Yvága peve oguahë. Mitã nguéra ha okambúva purahéipe

remopu’ã óga yvate, oĩgui oñemoĩva nde rehe, umívape rehundiete haguã. O.

Amaña ramo yvágare upe ne rembiapokuére,

jasy ha mbyja kuérare hendápe remoĩ va’ekue,

ha’e che jupe: máva piko yvypóra, ne mandu’a haguã hese? O.

Michĩ remomichĩve tekove yvágape guágui,

ha yvate ichupe rehupi ha rembotuicha.

Mburuvicha ramo remoĩ ichupe ne rembiapokue ári, opa mba’e ipo guýpe remoĩ. O.

ALELUIA Jn 15, 26cd. 27a

Aleluia.

Ñandejára Jesucristo he’i:

“Pe Espíritu Añeteguáva oñe’ẽta che rehe, ha peë avei peikóta che rérape pe ñe’ẽ haguä.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha  12, 8-12

Upe ramo Jesús he’i hemimbo’ekuérape:

“Ha’e peẽme, oimeraẽ he’íva opavave renondépe che rehe ojeroviaha, che, Tupã ra’y yvypóraicha aju va’ekue, añe’ẽne avei hese Tupã Ñandejára remimboukuéra renondépe. Ha oimeraẽ he’íva opavave renondépe nda che kuaaiha, che avei ha’éne Tupã Ñandejára remimboukuéra renondépe, ndaikuaaiha ichupe. Tupã Ñandejára oheja reíta oimeraẽvape che rehe jepe, yvypóraicha aju va’ekue, oñe’ẽ vaívape.

Upe Espíritu Santo rehe oñe’ẽ vaívape katu, ndojeheja rei mo’ãi araka’eve.”

“Pejererahávo umi judío tupaópe, térã mbojovakehára ha mburuvichakuéra renondépe, ani pejepy’apy mba’éichapa peñe mo’ãtare térã mba’épa pejétare.

Oguahẽvo peẽme peñe’ẽ haguã, Espíritu Santo pene mbo’éta opa peje va’erãre.”

Ñandejára Jesucristo Ñe’ẽ.