SÁBADO VIGÉSIMO SÉPTIMO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Joel arandukápe oĩ háicha  4, 12-21

Péicha oñe’ẽ Tupã Ñandejára:Peñe mboaty tetãnguéra, Josafat ñúme tapeho. Upépe Tupã Ñandejára ombojovakéta opa tetãme.

Peikytĩ umívape, iñaña itereígui, trígo aju rakãicha, oguahẽ ramo guáicha ñemono’õha ára. Peñami parral áicha, oĩma ramo guáicha vino ojejapo haguã, hyru rembére ta henyhẽ ha to ñehẽ.

Heta eterei umi oĩva ñúme, hérava: “Toiko upe oje’éva”. Hi’aguĩma hína upépe Tupã Ñandejára ára. Kuarahy ha jasy iñypytũ, mbyja ita nomimbivéi.

Tupã Ñandejára okororõ yvyty Sión guive, ohenduka iñe’ẽ Jerusalén guive, ha yvága ha yvy oryryipa. Tupã Ñandejára omo’ã hetã guápe, oñangareko Israel guáre.

Peẽ pehecha kuaáta, che, Tupã pende Jára, aikoha Sión che yvyty marangatúpe.

Jerusalén, táva marangatúta. Araka’eve noĩ mo’ã véima ambue tetãgua po guýpe. Upe árape vino ha kambýicha osyrýta umi yvytýre. Judá pegua ysyrykuéra hi’y hetáta, ha che tupaógui osẽta yvu omohe’õtava upe ñu Acacias pegua. Tapéicha Egipto opytáta ha Edómgui oikóta yvy ojeiko’ỹha.

Upépe ondyry haguére Judagua rehe ha imarangatúva ruguy oñohẽ. Umíva manongue amoengoviáta, ijapoharépe ndaheja rei mo’ãi. Judá ha Jerusalénpe ojeikóta opa ára, ha che, opa mba’e Jára, aikóta yvyty Siónpe.”

Tupã Ñandejára Ñe’ẽ.

SALMO ÑEMBOHOVÁI 96, 1-2. 5-6. 11-12

Opavave: Ñandejára rérape pevy’a peẽ pende reko jojáva,

Tupã Ñandejára mburuvicha guasu hína.

Ko yvy tuichakue tovy’a, umi  yvy y mbyte rupi oĩva tovy’a.

Arai ypytũ oñuãmba ichupe,

teko hekopegua ha teko joja  iguapyha ramo oguereko. O.

Umi yvyty araitýicha hykupa Tupã Ñandejára renondépe.

Ha’e opa ko yvy Jára hína, yvága heko joja omoherakuã

ha maymáva ohecha heko mimbipa. O.

Ko’ẽ pyahu iñapysẽ hekojojávape,

vy’a katu heñói imarangatúvape.

Tupã Ñandejára rérape pevy’a peẽ pende rekojojáva,

ha pemomba’e guasu héra marangatu. O.

ALELUIA Lc 11, 28

Aleluia.

Ovy’aite umi ohendu ha ojapóva Tupã Ñandejára ñe’ẽ.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha   11, 27-28

Upe ramo Jesús oñe’ẽ aja hína ko’ã mba’ére, umi oĩva apytégui peteĩ kuña osapukái:

Ovy’a iténepa pe kuña nde reru va’ekue  ko yvy ári ha ne mokambu va’ekue !

Ha’e katu he’i: Ovy’aiténe uvei umi ohendúva Tupã Ñandejára ñe’ẽ ha ojapo pe ha’e he’íva!

Ñandejára Jesucristo Ñe’ẽ