SÁBADO VII DE PASCUA

SÁBADO VII DE PASCUA

LECTURA PETEĨHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha   

                     28, 16-20. 30-31

Oguahẽvo Rómape, oheja hikuái Páblope oiko ha’eño, peteĩ ñorairõhára hese oñangarekóva reheve.

Mbohapy ára oguahẽ rire, Pablo ohenoiuka umi Israel guáva Rómape ojeapovéva mba’érõpe. Oñemboatypáma ramo, he’i ichupe kuéra: Che pehẽngue kuéra, che ndajapói va’ekue mba’eve ivaíva Israel guávare, térã ñande ru kuéra ypykue jepokuaaháre. Upéicharõ jepe, Jerusalénpe añemoĩ Romagua pópe.

Ha’ekuéra oporandu rire chéve opoise che hegui, ndojuhúigui mba’eve che juka va’erãre. Umi Israelguáva katu oñemoĩ che rehe, ha ajerure mante va’erã Romagua mburuvicha pavẽ che mbojovake haguã. Che katu ndarekói mba’eve ha’e va’erã umi che retãguáre. Upévare pohenoiuka kuri, pohecha ha añe’ẽ haguã pene ndive. Umi ñande Israelgua ñaha’arõva rehe niko che ajepokua hína ko’ã kadénape.

Pablo opyta mokõi áño pukukue upe óga hepýre oipuru va’ekuépe, omoguahẽhápe opa umi hendápe ohóvape. Kyhyje’ỹre omoerakuã Tupã Ñandejára sãmbyhy, ha ombo’e Ñandejára Jesucristo rehegua, avave ojoko’ỹre ichupe.

Tupã Ñandejára Ñe’ẽ.

SALMO ÑEMBOHOVÁI      10, 4-5. 7

Opavave: Tupã Ñandejára niko heko joja, ha ohayhu teko joja.

O bien:

Aleluia.

Tupã Ñandejára oĩ tupaópe,

Tupã Ñandejára oĩma yvágape, iguapyhápe.

Opa rupi omaña ha ohecha mba’éichapa yvypóra oiko.

Ñandejára oipy’a ra’ã hekópe oikóvape ha iñañávape. O.

Tupä Ñandejára ombojovake maymavépe

ha mba’eve ndoikuaaséi heko vaívagui

Tupã Ñandejára niko heko joja, ha ohayhu teko joja.

Ichupe ohecháne imarangatúva. O.

ALELUIA Cf. Jn 16, 7. 13

Aleluia.

Ñandejára Jesucristo he’i:

“Amboúta peëme Espíritu orekóva añetegua;

Ha’e oikuaaukáta peëme añetegua”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha      21, 19-25

Upe ramo guare, Jesús oikove jevy rire oikuaauka hína mba’éichapa Pedro omanóta ha mba’éichapa ombotuicháta Tupã Ñandejárape. Upéi Jesús he’i ichupe: Eju che moirũ.

Pedro ojere ha ohecha ouha hapykuerikuéra Jesús remimbo’e ha’e ohayhuetéva. Upéva voi ku pyhare karuhápe, oĩ va’ekue Jesús ykére ha oporandu va’ekue ichupe: “Che Jára, máva piko pe ne moñuhãtava”? Pedro ohechávo ichupe, oporandu Jesúspe: Che Jára, ha kóvape piko mba’e ojehúta?

Jesús he’i ichupe: Aipota ramo ha’e oikove aju jevy peve, piko mba’e ndéve? Nde, eju che moirũ.

Upévare, isarambi ñe’ẽ umi Jesús rehe ojeroviáva apytépe, upéva pe Jesús remimbo’e nomano mo’ãiha. Jesús katu niko nde’íri nomano mo’ãiha. He’ínte: “Aipota ramo oikove che aju jevy peve, piko mba’e ndéve?”

Upéva upe Jesús remimbo’e voi upe omombe’u va’ekue ko’ã mba’e ha upéi omoĩ va’ekue kuatiáre. Ha jaikuaa añetegua upe he’íva.

Heta iteve mba’e Jesús ojapo va’ekue. Ha ñamoĩmbátarõ kuatiáre opa umi mba’e ha’e ojapo va’ekue, ko yvy ári ndaijapa mo’ãi umi kuatia omombe’útava hembiapokue.

Ñandejára Jesucristo Ñe’ẽ.