SOLEMNIDAD DE LA SANTÍSIMA TRINIDAD

SOLEMNIDAD DE LA SANTÍSIMA TRINIDAD

LECTURA PETEÎHA:

Ko’ágã ñahendúta Tupã Ñandejára ñe’ẽ Proverbios arandukápe oĩ háicha 8, 22-31

Péicha he’i Tupã arandu: Ñandejára che apo opa mba’e ñepyrũme, chéve raẽvete che apo. Mba’eve ojejapo mboyve che aiméma va’ekue,
iñepyrũ hãitépe yvy ojejapo mboyve. Yguasu ojejapo mboyve che aiméma va’ekue, osẽ mboyve yvu yvy ryepýgui. Yvyty hapo mboyve, yvate opu’ã mboyve yvy, che aiméma va’ekue.

Upe ramo, ne’ĩra gueteri Tupã ojapo yvy ha ñu, yvy akytãmi jepe ndaipóri. Yvága omoĩ ramo hendápe, arapy oipyso ramo yguasu ári, che upépe aiméma va’ekue. Ha omosãingórõ yvate arai, ha yvu juru oipe’a ramo yguasu omyenyhẽ haguã, he’i ramo guare y guasúpe, umi hembe’y ani haguã ohasa, ha omoĩ ramo guare yvy ropyta, che ijypýpe aiméma va’ekue ipytyvõha ramo.

Che va’ekue ivy’a renda, ha henondépe añembojaru mante. Yvy tuichakue yvypórakuéra ndive aiko avy’a.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 8, 4-9
Opavave: Tupã ore Jára, herakuã porãite nde réra ko yvy ape ári.

Amaña ramo yvága rehe upe ne rembiapokue rehe,
jasy ha mbyjakuéra rehe hendápe remoĩ va’ekue, ha’e che jupe:
Máva piko yvypóra, ne mandu’a haguã hese? O.

Michĩ remomichĩve tekove yvágape guágui,
ha yvate ichupe rehupi ha rembotuicha.
Mburuvicha ramo remoĩ ichupe ne rembiapokue ári,
opa mba’e ipo guýpe remoĩ. O.

Ovecha ha guéikuéra, ha opa tymba saite,
guyra kuéra yvága rehe ovevéva,
pira ha opa umi mba’e ýpe oikóva. O.

LECTURA MOKÔIHA:
Ñahendúta Tupã Ñandejára Ñe’ẽ San Pablo ohai va’ekue Roma guápe 5, 1-5

Che pehenguekuéra: Tupã ñane mboheko jojámagui, ñande jerovia rupi, ñande py’a guapy hendive, Ñandejára Jesucristo rupi.
Jesucristo rehe ae, ikatu va’ekue ñañemboja Tupã rehe ñande jerovia rupi, ha’e ñane pytyvõ haguã, ha ñaime porã ha javy’a ñaha’arõgui
ñaiméne haguã hendive heko mimbipápe.

Ha ndaupéva añoi. Javy’a avei ñande jehasa asy rehe, jaikuaágui, umi jehasa asy voi ome’ẽha ñandéve mbarete jaropu’aka haguã pe jehasa asy. Ha pe mbarete rehe ae ñasẽ porã, ha ñasẽ porãgui ñaha’arõ kuaa. Ha pe ñeha’arõ kuaa na ñane mbopy’a kangýi, Ñandejára ñane myenyhẽgui imborayhúpe, pe Espíritu Santo ome’ẽ va’ekue ñandéve rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Apoc 1,8
Aleluia.
Teko mimbipa ha pokatu ta imba’e opa ára.
pe oikovéva, oikove va’ekue ha oikove va’erãva.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 16, 12-15

Opavave: Romomba’e guasu ndéve, Ñandejára.

Upérõ, ho’u aja hikuái upe Pascua rehegua karu guasu, Jesús he’i idisípulokuérape: Heta mba’e niko areko gueteri ha’e vaerã
peẽme. Ko’ágãnte ndaikatu mo’ãi oikepa peẽme pene akãme. Ágã Espíritu Santo ou vove, ha’e ohechaukáta peẽme umi mba’e
añeteguáva. Ha’e niko noñe’ẽ mo’ãi ijehegui reínte. Nahániri.

Omombe’úta peẽme umi mba’e ha’e ohendu vaekue, ha oikuaaukáta ave peẽme umi mba’e ojehútava. Ha’e che kuaaukáne peẽme ha che momba’e guasúne.

Upe che ame’ẽvagui chupe ha’e oikuaaukáta peẽme. Opa mba’e che ru oguerekóva, che mba’e avei. Upévare ha’e hína peẽme Espíritu Sánto ombyatytaha che ame’ẽvagui chupe oikuaauka haguã peẽme.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.