SOLEMNIDAD DEL SAGRADO CORAZÓN DE JESÚS

LECTURA PETEÎHA:

Ko’ágã ñahendúta Tupã Ñandejára ñe’ẽ Oseas arandukápe oĩ háicha  11, 1.3-4. 8c-9    

“Che ahayhu va’ekue Israélpe imitãme, che ra’y niko ha’e, ahenói va’ekue Egíptogui.

Upeichavérõ jepe aisãmbyhy va’ekue Efraínpe ha ambo’e oguata haguã, ha’ekuéra katu ndohecha kuaái, cheha upe añangarekóva hesekuéra.

Mborayhu sãme amosã ha agueru che mba’erã, amboja che rova rehe pe hova, mitã kambúva ramo guáicha, che pópe amongaru ichupekuéra.

Che py’a niko hyku, roiporiahuvereko etereígui!

Nañe me’ẽ mo’ãi che pochy rendýpe, nahundi jevy mo’ãi Efraínpe.

Che hína Tupã Ñandejára, nda ha’éi  yvypóra.

Che hína imarangatúva, aiméva pende apytépe, ha ndajúi pohundívo.

Tupã Ñandejára Ñe’ẽ.

SALMO ÑEMBOHOVÁI Is 12, 2-3. 4b-6

Opavave: Y penohẽta vy’a pópe ykua ñane pysyrõvagui.

Ha’e hína Tupã Ñandejára, jejopy vaígui che pe’áva, hese ajerovia ha ndakyhyjéi.

Che Jára che mo’ã ha che mombarete, opa mba’e vaígui che pe’a. O.

Y penohẽta vy’a pópe ykua ñane pysyrõvagui

Peikuaauka tetãnguérape imba’e mombe’upyrã, perosapukái héra jojaha’ỹ. O.

Pepurahéi Ñandejárape, ojapo hague rehe mba’eijojaha’ÿva,

ha opa rupi ete pemoerakuã.

Pesapukái vy’águi Siongua: Tuicha itégui pende apytépe Israelgua Imarangatúva!” O.

LECTURA MOKOÎHA:

Ñahendúta Tupã Ñandejára Ñe’ẽ San Pablo ohai va’ekue Éfeso guápe      3, 8-12. 14-19

Che pehẽnguekuéra:

Che niko che michĩve umi imichĩvéva apytégui, opa umi Tupã Ñandejára mba’évagui. Ha’e katu ome’ẽ chéve ajapo haguã ko mba’e tuichaitéva: Amoguahẽ haguã judio’ỹvape Marandu porã ha amombe’u haguã umi mba’eta ijojaha’ỹva oúva Crístogui.

Tupã Ñandejára oheja chéve ikuaauka haguã opavavépe mba’éichapa ojehúta pe mba’e ha’e ojaposéva ha ha’énte oikuaáva. Tupã Ñandejára, opa mba’e apohare, niko oguereko va’ekue kóva ñemiháme, avave oikuaa’ỹ rehe ymaite guive.

Ko’ágã katu, Cristo iglésia rupi, opa umi yvategua ruvichakuéra oikuaáta mba’éichapa Tupä Ñandejára iñarandu ha upéva ojehechaha opa mba’épe. Tupã Ñandejára ojapo kóicha ojapose haguéicha opa ára, ha ojapo Ñandejára Cristo Jesús rupi. Ha Cristo rupi ha hese jajeroviágui, jeroviapópe ikatu ñeñemboja Tupã Ñandejára rendápe.

Upéva rehe, añesũ Túva renondépe. Ha’e rupi niko mayma yvágape oĩva ha tetã nguéra yvy arigua oikove.

Ajerure Túvape ome’ẽ haguã peẽme imba’e reta tuichaitégui pende py’a omombarete haguã Espíritu Santo rupi, ha avei ajerure, pejerovia rupi Cristo rehe, ha’e oiko haguã pende py’apýpe, ha pende rekove oñembohapo mbarete haguã mborayhúpe.

Péicha ramo peikuaáta opa umi Tupã Ñandejára mba’éva ndive mba’eicha ite pevépa tuicha mborayhu Cristo oñandúva pende rehe. Ajerure Tupã Ñandejárape, peñandu haguã peë upéva pe mborayhu, tuichavéva opa ite mba’e ikatúvagui jaikuaa. Péicha ramo, pene renyhẽtéta Tupä Ñandejáragui.

Tupä Ñandejára Ñe’ẽ.

ALELUIA    Mt 11, 29ab

Aleluia.

Peheja ta moĩ pende ape rehe che mba’e pohýi, ha pejapo che ha’éva peëme. Ha peikuaáta che py’a porãha ha ndaje japoiha.

Aleluia.

O bien:   1Jn 4, 10

Aleluia.

Pe mborayhu hína kóva: nda ha’éi  ñande jahayhu hague Tupä Ñandejárape, ha’e uvei ñande rayhu ha ombou Ita’ýra, ha’e omano rupi ojeheja rei haguã ñandéve ñane angaipa.

Aleluia.

EVANGELIO

Lectura del santo evangelio según san Juan 19, 31-37

Upe ramo Páskua arete mboyve upe ramo, ha umi judíokuéra ndoipotái avave retekue opyta osãingo kurusu rehe pytu’uha ára jave. Upéva upe ára niko arete nde tuichávata hína.

Upéva rehe oho he’i hikuái Pilátope ohetyma mopẽ haguã umi kurusu rehe osãingóvape ha upéi oñemboguejy haguã upégui.

Umi ñorairõhára  kuéra oho ha ohetyma mopẽ umi mokõi oñemosãingo va’ekue Jesús yke rehe. Oñembojávo Jesús oĩháme katu, ohecha hikuái ha’e omanóma hague. Upéva rehe nohetyma mopẽi ichupe. Peteĩva umi ñorairõhára  katu oikutu ichupe ijyképe ikyse yvukúpe, ha upégui osẽ tuguy ha y.

Upe omombe’úva ko’ã mba’e niko ha’ete voi ohecha va’ekue ha añetegua he’i. Ha’e oikuaa añetegua amombe’uha, opavave peë avei perovia haguã. Ko’ã mba’e niko ojehu va’ekue ojehu haguã Tupä Ñandejára Ñe’ẽme he’íva: “Peteïnte jepe ikãngue nomopẽi ichugui”. Ha Ñandejára Ñe’ẽme he’i avei ambue hendápe: “Omaña va’erã hikuái upe ojekutu va’ekue rehe”.

Ñandejára Jesucrísto  Ñe’ẽ.