VIERNES NATIVIDAD DEL SEÑOR

Ko’ágä   ñahendúta Tupã Ñandejára ñe’ẽ 2 Samuel arandukápe oĩ háicha   

  2 Sam 7, 1-5. 8b-12. 14a. 16

Mburuvicha guasu David oikóma ramo hóga guasúpe ha Tupã Ñandejára ome’ẽ rire ichupe py’aguapy opa mburuvicha guasu kuéra ijerére oĩva ndive, he’i maranduhára Natánpe: Mba’éicha piko che aiko óga porãme, ha Tupã Ñandejára karameguã katu oĩ óga vakapípe?

Natán he’i ichupe: Ejapo pe rejaposéva. Tupã Ñandejára niko oĩ nendive.

Tupã Ñandejára katu upe pyharépe voi oñe’ẽ Natánpe, ha he’i ichupe: “Tereho ere che rembiguái Davídpe ko ha’eukáva ichupe: ‘Na nde mo’ãi pe remopu’ãtava chéve óga aiko haguã.

Che roguenohẽ va’ekue nde ovecha kuéra korágui, ovecha rapykuéri reikohágui, reiko haguã che retã Israel ruvichárõ. Romoirũ va’ekue mamo rehoha rupi, ahundi opa nde rehe ija’e’ỹvape, ha romoherakuã va’ekue umi karai guasu kuéra herakuã guasu háicha ko yvy ári.

Upéi ave, ambosako’i va’ekue che retãgua Israel rendaguã ha upépe amohenda ichupe kuéra oiko haguã henda teépe, ikatu’ỹ haguãme avave omyangekói ichupekuéra, térã umi mba’e vai apoha oguereko asy ichupekuéra ymave guaréicha, amoĩrõ guare tendotakuéra oisãmbyhy haguã Israel guápe. Che roipe’áta opa nde rehe ija’e’ỹvagui. Ha che ha’e ndéve, che ame’ẽtaha ndéve ne ñemoñarerã.

Opa vove nde rekove ko yvy ári ha remano, amoĩta peteĩ ne ñemoñare ne rendaguépe ha amohendáta ichupe nde guapyhápe.

Che itúvata ha ha’e che ra’ýta nde rogaygua ha nde retãre añangarekóta ha nde guapyha avei oĩ hatãta opa árape guarã.

Tupã Ñandejára Ñe’ẽ.

SALMO ÑEMBOHOVÁI   88, 2-5. 27. 29

R. Tupã Ñandejára, aropurahéita ne mborayhu opa ára.

Tupä Ñandejára, aropurahéita ne mborayhu opa ára.

Aikuaaukáta maymavépe ne mborayhu ndaijapýraiha,

nde reko jeroviaha naiñambuéivaha, naiñambuéi háicha upe yvága. R.

“Che ame’ẽ va’ekue che Ñe’ẽ che rembiporavópe.

Kóicha ha’e va’ekue che rembiguái Davídpe:

‘Ne ñemoñare ndopa mo’ãi araka’eve, ha’ekuéra mburuvicha guasúta ojoapykuéri nde rire”. R.

He’íne chéve ha’e: ‘Nde hína che ru, Tupã Ñandejára che renohẽva jejopy vaígui, ha reñangarekóva che rehe.’

Ichupe ahayhúne opa ára, che ñe’ẽ ichupe ame’ẽva rehe napyrũi chéne. R.

ALELUIA

Aleluia.

Kuarahy resë, tata mimbi ijapyra’ÿva. Kuarahy teko joja rehegua, eju ehesape umi oïva pytümbýpe há mano poguýpe.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                    1, 67-79

Upe ramo Zacarías, pe mitã ru, Espíritu Sántogui henyhẽva oñe’ẽ, ha he’i:

To jehovasa Ñandejára, Israel Tupã!

Ha’e ou oguenohẽvo jejopy vaígui hetã guápe!

Péina ombou ñandéve peteĩ Ipu’akapáva ñande pysyrõtava ñane angaipágui, hembiguái David ñemoñare.

Ha’e oñe’ẽ me’ẽ va’ekue imaranduhára rupi ñande pe’ataha umi ñande rehe ija’e’ỹva ha ñande rayhu’ỹva pógui, oiporiahuverekotaha umi ñande ru ypykuépe ha ndahesarái mo’ãiha iñe’ẽ me’ẽ marangatúgui. Kóva ha’e iñe’ẽ me’ẽ ñande ru Abrahámpe: ohejataha ñandéve jaiko jakyhyje’ỹre, ñande rehe ija’e’ỹva poguype’ỹ, jaiko haguã ichupe hembijokuái ramo marangatu ha tekojojápe, ha ñaime haguã henondépe opa árapeve guarã.

Nde katu, che ra’ymi, opavave ne renóita pe Yvatetegua maranduhára, rehótagui henonderã rembosako’ívo hape reikuaauka haguã hetã guápe Tupã Ñandejára oheja reiha ichupe kuéra opa iñangaipa, ha oguenohẽha jejopýgui.

Tupä Ñandejára pe yvatetégui iporiahuvereko rupi, ára pyahu ogueru ñandéve, ohesape haguã umi oikóvape pe pytũmby guasu etépe, ha ñande reraha haguã pe py’aguapy rapére.

Ñandejára Jesucristo Ñe’ẽ.