VIERNES TRIGÉSIMO CUARTO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Daniel arandukápe oĩ háicha 7, 2-14

Che amaña upe pyhare ha “ahecha yvytu oipeju ramo irundy hendáguio ha ombopochy umi yguasu. Peichaháguinte ahecha, irundy tymba nde tuicháva, ndojojoguáiva osẽva pe yguasúgui. Peteĩ ojogua leónpe ha taguatóicha ipepopa. Ama’ẽ aja hese, ojepe’a ichugui ipepo.

Upéi oñemopu’ã yvýgui ha oñemoñembo’y ipýre, ha opyta oñembo’y yvypóraicha. Oñemoĩ ichupe iñapytu’ũrã, yvypóraicha iñakã porã haguã.

Upe mokõiha ojogua ósope. Ha’e oñembo’y avei ipýre ha henonde gotyo ijyke’imi. Ijurúpe oguereko mbohapy so’o kãngue ha ahendu oje’e ramo ichupe: “Tereho katu he’u so’o, re’use háicha”.

Ama’ẽ aja hína, ahecha pe mbohapyha osẽva. Upéva ojogua jaguaretépe, ha ku guyráicha ipepo ijapére. Irundy ahecha oguereko. Ahecha avei iñakã irundyha, ha oñeme’ẽha ichupe pokatu.

Ko’ã mba’e ahecha rire ha amaña aja’aína, ahecha pe irundyha opu’ãva. Tymba nde vaíva niko upéva ha ñane mongyhyjéva, ha imbarete eterei. Umi hãi fiérro ha tuicha-tuicha, ho’u ha omopururũ opa mba’e, ha hembyre ipype ombopepa. Kóva 10 voi hatĩ ha ndojoguái umi ambue tymbápe ahecha va’ekue.

Ama’ẽ aja umi hatĩre, ahecha umíva apytépe okakuaáva peteĩ michĩvéva. Mbohapy hatĩngue voi ojepe’a oñemopa’ũ haguã ha’e. Kóva katu hesa ha ijuru yvypóraicha, ha iñe’ẽ guasu.

Ama’ẽve ha ahecha oñemoĩha upépe guapyha ha peteĩ ikarai etéva ahecha oguapy ipype. Ijao morotĩ asy, iñakã rague katu ovecha rague potĩcha.

Upe guapyha ha umi irruéda katu tatáicha ojepota. Ysyrýicha tata osyry henonderã. Heta eterei umi ojapóva ha’e oipotáva, ha heta etereive umi henondépe oñembo’ýva. Umi oporombojovakéva oguapývo umi kuatiañe’ẽ ojepe’a.

Che ama’ẽ aja, ahendu mba’éichapa oñe’ẽ rei pe mymba ratĩ michĩvéva. Ha ama’ẽ hese ojejuka peve pe tymba, ha ahecha mba’éichapa oñepehe’ã. Upéi katu hetekue oñemombo tatápe okái haguã. Umi ambue tymbágui ojepe’a avei ipokatu ha ojeheja ichupe kuéra oikove oguahẽ meve hi’ára. Ahecha hína ko’ã mba’e pyhare, peichaháguinte.

Ahecha vaicha ou arai apytépe peteĩ ojoguáva yvypórape. Ahecha oho pe karai oĩha gotyo, ha upéi ojereraha hendápe. Ha oñeme’ẽ ichupe pokatu, teko mimbipa ha oporosãmbyhy haguã. Ha opaichagua tetãgua, opaichagua ñe’ẽme oñe’ẽva ojapo ha’e he’íva.
Ipokatu opa árape guarã, ha ha’e oporosãmbyhyhápe noñehundi mo’ãi araka’eve.

Tupã Ñandejára Ñe’ẽ.

SALMO ÑEMBOHOVÁI Dn 3, 75-78. 80-81

Opavave: Perohory Tupã Ñandejárape.

Yvytykuéra, perohory Tupã Ñandejárape,
pemomba’e guasu ha peropurahéi ichupe opa ára. O.

Opa mba’e heñóiva yvy ári, perohory Tupä Ñandejárape, pemomba’e guasu ha peropurahéi ichupe opa ára. R.

Ykua yvukuéra perohory Tupã Ñandejárape,
pemomba’e guasu ha peropurahéi ichupe opa ára. O.

Yguasu ha ysyrykuéra perohory Tupã Ñandejárape,
pemomba’e guasu ha peropurahéi ichupe opa ára. O.

Pira guasu ha opa ýpe omýiva perohory Tupã Ñandejárape,
pemomba’e guasu ha peropurahéi ichupe opa ára. O.

Guyrakuéra yvytúre pevevéva perohory Tupã Ñandejárape,
pemomba’e guasu ha peropurahéi ichupe opa ára.

Tymba ñarõ ha mymbakuéra perohory Tupä Ñandejárape,
pemomba’e guasu ha peropurahéi ichupe opa ára. O.

ALELUIA Lc 21, 28
Aleluia.
Pende py’a guasúke ha pemopu’ã pene akã,
oguahẽ mbotáma peëme peñe pysyrö haguã.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 21, 29-33

Upe ramo Ñandejára omombe’úvo hemimbo’e kuérape pe ijeju rehegua, oipuru ko ñe’ẽ mbojoja: “Pema’ẽ pe ígo mátare ha oimeraẽ ambue yvyráre. Pehechávo hokyha, pehecha kuaa oguahẽmaha ára haku. Péicha avei, pehecha vove ojehu ko’ã mba’e peikuaáta Tupã Ñandejára sãmbyhy hi’aguĩmaha.

Añetehápe ha’e peẽme: Ko’ã mba’e ojehupáta omano mboyve umi ko’ágä oikovéva. Yvága ha yvy opáne, che ha’éva katu ojehúne katu ete.

Ñandejára Jesucristo Ñe’ẽ.