VIERNES TRIGÉSIMO SEGUNDO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 13, 1-9

Yvypóra ndaha’éi mba’eve ndoikuaái ramo Tupã Ñandejárape, ha’ekuéra, ohechárõ jepe heta mba’e porã, ndoikuaái va’ekue upe oikovévape, ha ohechávo hembiapokue, ndohecha kuaái Ijapoharépe. Ha oguereko va’ekue tupãrõ opa mba’e oisãmbyhýva, tata, yvytu, y hatã osyrýva, mba’e rendy yvágare oĩva.

Ha upéicha, opytárõ ijurujái ko’ã mba’e porãitáre ha oguereko hikuái tupãrõ, pehechami mba’éicha itépa tuichavéta opa mba’e Jára, ha’e voi Ijapoharéva. Ha jahechárõ mba’éichaite pevépa iporã opa mba’e, jahecha mba’éichaguápa Ijapohare. Ha upe jahechaha guive mba’e porã ngueta, ñaguahẽne jaikuaa ijapoharépe, ñambojojávo hese. Opaichavévo, umi yvypóra ndaikatúi ojeja’o vaívo, ikatúgui oime ojavy ohekakuévo Tupã Ñandejárape ojuhuségui ichupe.

Ha oikógui ojeporeka Tupã Ñandejára rembiapo pa’ũme, oñembotavypa ohechávare. Iporãitégui umi ohecháva. Ha upéicha ramo jepe, ndaikatúi ojeheja rei ichupekuéra. Ha’ekuéra niko ohupity va’ekue arandu ohesa’ỹijo haguã opa mba’e, ha mba’éicha piko ndojuhu pya’evéi Tupã opa mba’e Járape?

Tupã Ñandejára Ñe’ẽ.

SALMO ÑEMBOHOVÁI 18, 2-5b

Opavave: Yvága ohechauka Tupã Ñandejára mimbikue.

Yvága ohechauka Tupã Ñandejára mimbikue,
ha arapýre ojekuaa hembiapokue.
Ára omombe’u ojupe kóva
ha pyhare avei omoherakuã. O.

Noñe’ëi, he’i’ÿre mba’eve,
nañahendúi oñe’ẽva,
jepe ko Ñe’ẽ isarambi yvy apére,
ha pe marandu oguahẽ yvy opaha peve. O.

ALELUIA Lc 21, 28
Aleluia.
Pende py’a gusúke ha pemopu’ã pene akã, pya’etéma peñepysyrõtagui.
Aleluia.

EVANGELIO

Marandu porã San Lucas omombe’uháicha (17,26-37)

Upe ramo Jesús he’i hemimbo’ekuérape: Ojehu haguéicha Noé oikoveha árape, upéicha ojehu va’erã avei che, yvypóraicha aju va’ekue, aju jevyha ára. Upérõ opavave oiko okaru, omboy’u ha ñemendápe, Noé oike peve pe kanóa guasúpe. Ha upéi ou pe ama guasu, ha maymáva omano. Upéicha avei ojehu Lot oikove hague árape.

Opavave okaru ha omboy’u, ojogua ha oñemu, oñemitỹ ha ojogapo. Ha Lot osẽvo Sodómagui, tata ha asúfre oky yvatégui, ha opavave omano.

Péichata avei pe ára che, yvypóraicha aju va’ekue, ajechauka vove. “Upe ára upévape, pe oĩva hóga ári upe jave, ha oguereko opa mba’e kotýpe, aníke oguejy oguenohẽvo. Ha pe oĩva ñúme, aníke ojevy hógape. Pene mandu’áke Lot rembirekóre. Pe hekovére hakate’ỹva, omanóta. Ha umi omanóva katu, ojuhúta jeikovete.

Ha’e peẽme, upe pyharépe, mokõi oĩvagui tupápe peteĩ ojereraháta ha pe ambue ojehejáta. Mokõi kuña oñembisóta hína, peteĩ ojereraháta ha pe ambue katu ojehejáta.”

Aipórõ oporandu ichupe hikuái: Moõ piko upéva oikóta, ore Jára? Ha ha’e he’i ichupekuéra: Te’õngue oĩháme, ijaty yryvu.

Ñandejára Jesucristo Ñe’ẽ.