VIERNES UNDÉCIMA SEMANA

VIERNES UNDÉCIMA SEMANA

Ko’ágä ñahendúta Tupã Ñandejára ñe’ẽMokõiha Reyes arandukápe oĩ háicha 11, 1-4. 9-18. 20

Atalía, Ocozías sy, oikuaávo imemby omano hague, oho ojuka opa Judá ruvicha guasukuéra róga guápe. Ha Joseba, mburuvicha guasu Joram rajyre, omboyke Ocozías ra’ýpe, hérava Joás, umi ambue mburuvicha guasu ra’y ojejukávagui, ha omokañy Atalíagui peteĩ kotýpe imongakuaahára ndive. Upéicha ndojejukái. Ha Joás okañy imongakuaahára ndive tupaópe 6 áño pukukue. Upe aja Atalía oisãmbyhy pe tetã.

Áño 7hápe Joiadá ohenoiuka ñorairõhára Ceretéo ruvicha kuérape ha omoinge ichupekuéra tupaópe ha’e oĩ háme. Upépe oñoñe’ẽ me’ẽ hendive kuéra Tupã Ñandejára rérape ha ohechauka ichupe kuéra mburuvicha guasu ra’y Joás.

Mburuvichakuéra ojapo opa mba’e he’i va’ekue pa’i Joiadá. Peteĩ teĩ ogueraha imoirũhakuérape, umi hembiapóva tupaópe ha umi ojopyrúva pytu’uha árape, ha oho pa’i Joiadá rendápe. Pa’i Joiadá ome’ẽ mburuvichakuérape kyse yvuku ha tete mo’ãha David mba’ekue oñeñongatúva tupaópe.

Upéi opa ñorairõhára oñemoĩ hendápe, tupao yke sur guive ijyke nórte peve ha altar jerére, kyse yvuku ipópe, oñangareko haguã mburuvicha guasúre. Upérõ Joiadá oguenohẽ mburuvicha guasu ra’ýpe, omoĩ hese iñakãngora ha imburuvicha guasu jeguaka, ha oñohẽ rire hese ñandyry omoingo ichupe mburuvicha guasúrõ. Upéi opavave ojepopete ha osapukái: “Víva mburuvicha guasu.”

Atalía ohendu umi sapukái oikóva, ha oho tupaópe oĩ háme opavave. Upépe ohecha mburuvicha guasúpe oñembo’ýva hína tupao horkon ykére, jepi guáicha. Ijykére oĩ ñorairõhára ruvicha ha mba’e mbopuhakuéra. Opavave ovy’a joa ha ombopu ituru kuéra. Upérõ Atalía omondoro ijao ha osapukái: ¡Oñepu’ã che rehe!

Pa’i Joiadá he’i mburuvichakuérape: Penohẽ okápe ha pejuka, ha oĩrõ omoirũva ichupe, pejuka avei. Anínte pejuka tupao ryepýpe.
Ha pa’i he’i haguére ani haguã ojuka pe kuñáme tupaópe, omyaña hikuái Atalíape, ogueraha ichupe pe kavaju oikeha rokẽ rupi mburuvicha guasu rógape, ha upépe ojuka.

Upéi Joiadá oñoñe’ẽ me’ẽ opa Judagua ha mburuvicha guasu ndive Tupä Ñandejára rérape, he’ívo ha’e kuerataha Tupä Ñandejára retã. Upe rire ohopa hikuái Baal tupaópe ha oity yvýre, omongu’ipa ijaltar ha ita’ãnga kuéra ha Baal pa’i Matán héravape ojuka hikuái altar renondépe.

Upéi Joiadá omoĩ tahachi tupaópe ha opa tetãgua ovy’a joa. Ha Atalía ojejuka haguére kyse pukúpe mburuvicha guasu rógape, pe táva opyta py’a guapýpe.

Tupã Ñandejára Ñe’ẽ.

SALMO ÑEMBOHOVÁI 131, 11-14. 17-18

Opavave: Tupã Ñandejára oiporavo Siónpe upépe oiko haguã.

Tupã Ñandejára nopyrũiva iñe’ẽre, ome’ẽ va’ekue Davídpe
iñe’ẽ: “Peteĩ nde ra’y amoĩta mburuvicha guasúrõ ne rendaguépe. O.

Ne ñemoñare ojapo ramo che rambiapouka ame’ëva ichupekuéra che aipota háicha.
“Ne ñemoñare kuéra ne rendaguépe oguapýne mburuvicha guasúrõ opa ára”. O.

Tupã Ñandejára niko oiporavo yvyty Sión upépe ha’e oikoségui.
“Ápe apytu’úta opa ára, ápe aguapýta ko’ápe aikoségui”. O.

“Ápe heñói ha imbaretéta David ra’y, che rembiporavópe amboguapy hatãta.
Umi hese ija’e’ỹva ári aitýta ñemotĩ, ichupe katu ambotuicháne.” O.

ALELUIA Mt 5, 3

Aleluia.
Ovy’a ite va’erã umi heko mboriaihúva, ichupekuéra oñeme’ẽta Ñesambyhy Yvágagui oúva.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 6, 19-23

Upe ramo Jesús he’i hemimbo’ekuéra: “Ani pemboaty mba’eta ko yvy ári, tigua’ã ho’upa hápe ha opa mba’e ituju hápe, ha mondaha oike hápe omonda haguã. Pemboaty uvei mba’e reta yvágape, tigua’ã ho’upa’ỹ háme ha opa mba’e ituju’ỹ háme, ha mondaha oike’ỹ háme omonda haguã. Pe oĩ háme ne mba’e reta, upépe avei remoĩta nde py’a.”

Ñande resa niko hína pe ñande rekove omoesakãva. Nde resa hesãi ramo, omoesakãta nde rekove. Nde resa nahesãi ramo katu, nde rekove iñipytũmbáta. Ha pe omoesakã va’erãva ndéve nde rekove iñypytũ ramo, piko mba’éicha iteve hypy’ũta ndéve pe pytũ.

Ñandejára Jesucristo Ñe’ẽ.