VIERNES XXII DEL TIEMPO ORDINARIO

VIERNES XXII DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Colosas guápe 1, 15-20

Cristo rehe jahecha, Tupã Ñandejárape ikatu’ỹva ojehecha. Ha’e hína ta’ýra ypykue, opa mba’e mboyve guare. Hese ae, Tupã Ñandejára ojapo ypy opa mba’e oĩva yvágape ha yvýpe, ojehecháva ha ojehecha’ỹva, ha avei umi espíritu yvategua opa mba’e oguerekóva ipoguýpe ha imbaretéva.

Opa mba’e ojejapo va’ekue ha’e rupi ha ichupe guarã. Cristo hína opa mba’e mboyve ha ha’e rupi opa mba’e oĩ hendápe. Upéi ave, Cristo ha’e pe Tupã iglésia akã, ha upéva hete.

Ha’e niko opa mba’e ñepyrũ ypy hague, ha’e raẽvete oikove jevy, itenonde haguã upéicha opa mba’ére. Crístope niko Tupã Ñandejára omoĩmba va’ekue ipokatu. Ha ha’e rupi, Tupã Ñandejára omoingo porã jevy hendive opa mba’e oĩva ko yvy ári ha yvágape, Cristo ruguy rupi, oñohẽ va’ekue kurusúre.

Tupã Ñandejára Ñe’ẽ.

SALMO ÑEMBOHOVÁI 99, 1-5

Opavave: To guerohory ko yvy Tupã Ñandejárape.

To guerohory ko yvy Tupã Ñandejárape.
Pejapo vy’a pópe ichupe hembipota,
peguahẽ hendápe sapukái rorýpe. O.

Pehechakuaa Tupã Ñandejára.
Ha’e ñande apohare ha ñande imba’e,
hetãgua ha ovecha iñumegua. O.

Peike hokẽ nguéra rupi pemboaguijévo ichupe,
ha hóga guýpe purahéi reheve.
Pemboaguyje ichupe ha héra perohory. O.

Tupã Ñandejára imba’e porãgui.
Imborayhu ndaijapýrai,
ha heko jeroviaha opa árape guarã. O.

ALELUIA Jn 8, 12
Aleluia.
Ñandejára Jesucristo he’i: “Che hína pe ohesapéva yvy ape. Pe che moirüva orekóta tesape Tekove rehegua”.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 5, 33-39

Upe ramo he’i hikuái Jesúspe: Umi Juan ha fariséo remimbo’ekuéra py’ĩinte ohasa ára ho’u’ỹre mba’eve ha oñembo’e mante. Ne remimbo’ekuéra katu okaru ha vino ho’úvonte oiko.

Jesús he’i ichupekuéra: Peẽ nga’u piko napemongaru mo’ãi umi oĩva mendahápe, pe menarã oï aja hendive kuéra? Ágänte oguahẽne ára ipore’ỹvo ha’e, ha upépe katu ohasáne ára ho’u’ỹre mba’eve

Omoĩ avei henondépe kuéra ko ñe’ẽ mbojoja: Avave nomondorói peteĩ ao pyahu omoatyrõ haguã peteĩ itujáva. Upéicha ojapóva ohundi pe ao pyahu. Ha upéi ave, pe ao pyahu pehẽngue ndopyta porã mo’ãi pe itujávare. Vino pyahu niko noñembohyrúi vino ryru tujápe.

Péicha ojejapórõ umi vino ryru osoróne ha oñehundíta pe vino ha umi hyru. Vino pyahu oñemoĩ va’erã hyru ipyahúvape. Ha umi ho’úva vino tuja ndo’use véima vino pyahu, ha he’i: “vino tuja heve”.

Ñandejára Jesucristo Ñe’ẽ