Ñahendu Jesús Ñe’ẽ. Jueves 31° Durante el Año

Escucha el evangelio y la reflexión en: https://youtu.be/I0izV2BeWzA

Jueves 31 Durante el Año Lucas 15, 1 – 10

Upérõ, Jesús ombo’e jave hína, oñemboja hendápe umi impuésto okovráva Rróma peg̃uarã, ha ijapytépekuéra hénte reko vai atýra, oúva ohendu haguã chupe. Umi Moisés léi ombo’éva ha fariséo kuéra katu osẽ oñe’ẽ Jesús rehe. He’i hikuái: — Kóva niko oiko hénte reko vai ndive, ha okaru avei hendivekuéra.

Upépe Jesús omombe’u chupekuéra ko káso: Ja’éntena perekoha 100 ovecha, ha okañy mba’e pende hegui peteĩ. Mba’épa pejapóne. Ndapeheja mo’ãi nga’u piko umi 99, ha pesẽ peheka pe okañy vaekue. Ág̃a pejuhúvo, pehupíne pende apére, ha vy’apópe pejevy pende rógape. Pehenóine pene irũme ha umi pende róga jere rupi oikóvape: “Pejúpy javy’a. Ajuhúma niko pe che ovecha okañy va’ekue.”

Che ha’e peẽme, péicha avei ojehuha yvágape. Tuichave vy’a oiko upépe peteĩ heko vaíva oñembojáva Ñandejára rehe, umi 99 imarangatúvagui noikotevẽiva oñemboja.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

He’i ningo Papa Francisco: “Ñama’ẽramo ko ñane múndo tuichakuére, jahecha mba’éichaitépa nañañembojojái, heta hetaveha umi ñande rapicha hemby ha oñembo’ykéva, ojepe’áva ichugui kuéra pe iderécho oreko haguã upe oikotevẽva oiko haguã hénteicha” (Laudato Si’ 158).

Ñama’ẽramo ñane retã, ñande rapicha indígenakuéra rehe niko sa’i vaicha oime hikuái, oiméne 2% rupi ko Paraguái retãme hetakue hikuái. Ha ndaopavavéiramo jepe, heta umíva apytépe oime oiko asýva oñemuñágui ijyvýgui. Ha upéva rapykuéri ou heta mba’e vai.

Ñembyahýi, mba’asy, isarambi ha ityre’ỹmba hikuái. Ndaipóri escuela ha mba’aporã, heta ou umi ciudad kállere ojeporeka haguã tembi’úre. Háime péicha avei oiko heta ñande rapicha campesino mboriahu apĩ rehe, oúva ciudad re ojogapo vai vai oimeraẽ kuára ojuhúvape. Ko’ãva ndaha’éi herakuã porãva ha ojecha ramóva. Oñembo’yke ha oñemohemby.

Jesús niko ojehe’a umi herakuã vai ha okañýva rehe. Oñandukávo ichupekuéra Ñandejára mborayhu. Jesús ndoiko guasúi umi heko porãmava voi ndive, noikotevẽivare hese. He’i avei Papa Francisco: “Tekotevẽ niko opavave jaiko porãve haguã ñañepyrũ ñaipytyvõ ha ñamoirũ mbareteve umi imboriahúvevape” (LS.158).

Ñandejára niko peteĩ sýicha, ndaikatúiva oheja rei ha ha’eño peteĩnte jepe imemby okañy ha oiko asýva. Ohejáne opa ohejáva, hembiapo ha imembykuéra eta ambue ndive. Ha ohóne ha’e upe peteĩ oikotevẽvéva piári ojuhu peve ha vy’apópe oguerúne chupe otopa rire.

Mba’éichapa ikatúne che irũ ha che reindy, ñande avei ñamomba’e ha jahechakuaa ñande rapicha itapykue ha oñembo’ykéva.

Pa’i Jasy.