LECTURAS DEL MIÉRCOLES TRIGÉSIMA TERCERA SEMANA

LECTURAS DEL MIÉRCOLES TRIGÉSIMA TERCERA SEMANA

Primera lectura:

Ko’ágã ñahendúta Tupã Ñandejára ñe’ẽ Macabeos arandukápe oĩ háicha 7, 1. 20-31

Umi ára umívape oñemoakãsã peteĩ sy 7 imemby reheve. Mburuvicha guasu oinupãuka ichupekuéra tukumbo ha teju ruguáipe ho’u haguã kure ro’o, oheja’ỹva Tupã Ñandejára rembiapoukapy.

Tuicha itereive mba’e ha ñaromandu’a haguãicha, pe isykuéra, ohecha va’ekue imembykuéra peteĩ teĩ omano peteĩ ara itépe, ha ogueropu’aka va’ekue ojeroviágui Tupã Ñandejárare. Peteĩ teĩme ombopy’a guasu, oñe’ẽvo ichupekuéra py’a porãme iñe’ẽ teépe, ha kuimba’éicha he’i imemby kuérape:

“Ndaikuaái mba’éichapa peẽ peiko ñepyrũ ra’e che ryépe; ndachéi pe pomoingove va’ekue ha ambojoapy va’ekue pende rete. Opa mba’e Apohare niko hína pe omoñepyrũ yvypóra ha opa mba’e oĩva.Ha’e pende poriahuvereko, pene moingove jevýta ha ome’ẽ jevýta peẽme pende espíritu, peẽ niko, Tupã Ñandejára rembiapoukapy rehehápe pende resarái pende jehegui.”

Antíoco oimo’ã oñembohory hese ha ojapyhy pe iñe’ẽ ojahéi ramo guáicha hese. Ohechágui pe imitãvéva ne’ĩraha omano, mburuvicha guasu oñeha’ã ombopy’a hu’ũ ichupe, ome’ẽ iñe’ẽ omomba’e retávo ha ombovy’ávo, oguerekóvo ichupe ijykére ha ome’ẽvo ichupe hembiaporã iporãva, ojei ramo itúva kuéra ypykuéra rekógui.

Pe mitã rusu katu nohendúi ichupe. Upémarõ mburuvicha guasu he’i isýpe oñe’ẽ haguã mitãrusúpe ani haguã omano. Heta ite he’i rire ichupe, hasy peve ha’e he’i ohotaha oñe’ẽvo imemby ndive.

Oñembohorývo pe mburuvicha reko añáre, ojayvy ha he’i imembýpe iñe’ẽ teépe: “Che memby, che poriahuvereko mína, ko rogueraha va’ekue 9 mése che ryépe, romokambu mbohapy áño pukukue, romongakuaa ha roheko mbo’e va’ekue ko’ágä peve. Ema’ẽ mína, che memby, yvate ha yvýpe, ehecha opa mba’e oĩva ipype ha eikuaa Tupã Ñandejára ojapo hague mba’evégui; ha upéicha avei ojapo hague yvypórape. Ani rekyhyje ko tekove añágui, ehechauka ndeha umi nde ryke’y kuera ichagua ha emano, ikatu haguã roguereko jevy che ndive, poriahuvereko árape, nde ryke’y kuéra ndive.”

Oñe’ẽ gueteri hína ha’e, ha pe mitã rusü he’i: “Mba’e piko peha’arõ? Che ndajapo mo’ãi mburuvicha guasu he’íva. Upe che ajapóva Tupã Ñandejára rembiapoukapýnte, Moisés ome’ẽ va’ekue ore ru kuéra ypykuépe. Nde, mburuvicha guasu, rembohasa asýva opa Israel guápe, nerekañy mo’ãi hína Tupã Ñandejáragui.

Tupã Ñandejára Ñe’ẽ.

SALMO ÑEMBOHOVÁI 16, 1. 5-6. 8b. 15

Opavave: Tupã Ñandejára, hendapegua nteko ajerure ndéve.

Tupä Ñandejára, hendapegua nteko ajerure ndéve.
Ndéve niko rohenói jevy jevy.
Ehendúkena che ñembo’e, añetegua nteko ha’e ndéve.
Nde rape rupimemeteaiko, araka’evendapíaiichugui . O.

Che Jára, ndévenikoañembo’e.
Ejapysakákena che rehe ha che rendu.
Nde resa’ỹicha kena eñangareko che rehe,
nde pepo guýpe kena che mo’ã. O.

Che katu Tupã Ñandejára,
nde rehe amaña guive piko
mba’e aipotave?
Ha apáyvo, rohecha guive? O.

ALELUIA Cf. Jn 15, 16

Aleluia.
Ñandejára Jesucristo he’i:
“Che poroiporavo yvypóra apytégui, peho haguã ha osẽ haguã pende hegui heta mba’e porã, ha upe mba’e porã oikóta opa áraitépe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 19, 11-28

Upe ramo Jesús omombe’u ichupekuéra peteĩ ñe’ẽ mbojoja oĩguima Jerusalén ypýpe, ha ha’ekuéra oimo’ãgui Tupã Ñandejára sãmbyhy oguahẽ potamaha.

Jesús he’i ichupe kuéra: “Oiko va’ekue peteĩ kuimba’e imba’e retáva oho va’ekue mombyry, ambue tetãme, ojupi haguã mburuvicha guasúrõ ha ou jevy. Osẽ mboyve, ohenói 10 ichupe omba’apóvape, peteĩ teĩme ome’ẽ heta viru, ha he’i ichupekuéra: ‘Pemomba’apo ko viru aju jevy peve.’ Ha hetãguakuéra katu ndaija’éi hese, ha omondo hapykuéri peteĩ atýra he’i va’erã hese: ‘Ndoroipotái kóva ko kuimba’épe ore ruvicha guasurã.’ Ichupe katu oñemoĩ mburuvicha guasúrõ, ha ojevy hetãme.

Oguahẽvo, ohenoiuka umi imba’apohára ome’ẽ hague viru, oikuaa haguã mboýpepa ojere ra’e ichupe kuéra peteĩ teĩme. Pe tenondegua oñemboja ha he’i: ‘Karai, nde viru imemby 10 jevyve.’ Mburuvicha guasu he’i ichupe: ‘Iporã. Nde hína mba’apohára katupyry. Mba’e michĩvape nde jeroviaha haguére, romoĩ reisãmbyhy haguã 10 táva.’ Oñemboja ambue ha he’i: ‘Che ruvicha, nde viru imemby 5 jevyve.’ Upévape avei he’i: ‘Nde reisãmbyhýta 5 táva.’

Ambue katu oñemboja ha he’i: ‘Karai, kóina ápe nde viru, añongatu va’ekue peteĩ pañuélope. Akyhyje va’ekue niko nde hegui, nde po pohýigui, rejapyhy niko reme’ẽ’ỹ haguépe ha remono’õ reñemitỹ’ỹ haguépe.’ Aipórõ, mburuvicha guasu he’i ichupe: ‘Nde mba’apohára ate’ỹ. Ne ñe’ẽre roikuaa.

Reikuaa rire che po pohýiha, amono’õha name’ẽi haguépe ha amono’õha nañemitỹi haguépe, mba’eha nde rerahái ra’e che viru ikatuhápe oñemomba’apo, reme’ẽ haguã chéve imemby reheve aju jevy rire?’ Ha he’i umi upépe oĩvape: ‘Peipe’a ichugui pe viru ha peme’ẽ pe 10 jevyve omomemby va’ekuépe.’ Ha’e kuéra he’i ichupe: ‘Karai, ha’e niko oguerekóma 10 jevyve.’

Mburuvicha guasu he’i: ‘Che ha’e peẽme, upe oguerekóvape oñeme’ẽvéta. Ha upe oguereko’ỹvagui katu, pe michĩmi oguerekóva guive jepe ojepe’áta. Ha umi che rehe ija’e’ỹva katu, nda che potái va’ekue mburuvicha guasúrõ, peru ko’ápe ha pejuka che renondetépe.’”
He’i rire ko’ã mba’e, Jesús ohasa oho Jerusalénpe.

Ñandejára Jesucristo Ñe’ẽ.