Ñahendu Jesús. TUPÃSY CAACUPÉ ÁRA

Escucha el evangelio y la reflexión en: https://youtu.be/VV93zr0UhBM

8 de diciembre: Tupãsy Caacupé ára Lucas 1, 26 – 38

Ha 6 mése haguépe, Tupã omondo Ánhel Graviélpe peteĩ pueblo Galilea pegua hérava Nazarétpe.

Upépe oiko Maria, peteĩ kuñataĩ marã’ỹ, ome’ẽma vaekue iñe’ẽ omenda haguã Josére, Rréi David ñemoñare. Upe Ánhel oike María oĩháme ha he’i chupe: -Roguerohory, nde Tupã rembiporavo! Ñandejára oĩ ne ndive. María oñemondýi ha opensa mba’énepa he’ise pe maitei ohendúva.

Pe Ánhel he’i chupe: – Ani rekyhyje, Maria, Tupã nde rerohory. Nde rye guasúta ha ne membýta, ha pe mitã rembohérata Jesús. Ha’e mba’e guasúta ha oje’éta hese: “Tupã Yvatetegua Ra’y”. Ha Tupã Ñandejára ojapóta chugui mburuvicha guasu, Rréi Davídcha. Ha’e oisãmbyhýta Israel retã guápe opa ára guarã.

María oporandu pe Ánhel pe: – Mba’éicha piko ojehúta upéva, ko che ndaikóiva gueteri kuimba’e ndive?

Pe Ánhel katu he’i chupe: – Espíritu Santo oikéta nde pype, ha Tupã Yvatetegua pu’aka oúta nde ári. Upévare, pe mitã oútava oñembohérata Imarangatúva ha Tupã Ra’y.

Isabel, nde rogaguáva, imembýta avei, iguãiguĩma ramo jepe. Pe kuña oje’e va’ekue ndaikatuiha imemby, ojapóma 6 mése hye guasuha. Tupãme guarã ndaipóri ikatu’ỹva.

Aipórõ María he’i: – Che, Ñandejára rembiguái. Tupã tojapo che rehe pe ere haguéicha. Ha uperire, pe Ánhel oho.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Péa che kavaju hína. Ajerovia hese”. He’i ningo lo mitã, hapicha ikatupyrýva rehe. Umi ikatúva ideprovécho ha ojevale hese ñeikotevẽme, ikatúva jaheja ikárgope tembiapo. Ha upéicha oiméne oñandu Ñandejára ñande sy Tupãsýre oma’ẽvo yvága guive, ha omboúvo Ánhel Gabriel hendápe oenkarga haguã ichupe ita’ýra Jesús. Oiko haguã isýramo, Tupã sy.

Ndaha’éi ko vyrorei hína upe ichupe ojejeruréva. Ñande jaikuaa heta oiko va’erãha pe sy oñangareko ha omopu’ã haguã ifamília. Ha péva ndosói hína. Sy ha túva ningo ha’e opa ára guarã. Péva ndoguéi jaikove aja pukukue. Ha pe ombou haguéicha Tupãsy rendápe, Ánhel Gabriel pe, péicha avei Ñandejára ñane renói ñande réra rúpi.

Ombou ko’ãga ñane rendápe umi ojerovia ha ojevaleséva ñande rehe. Ikatúko ñande avei jaduda imi, che irũ ha che reindy, ha ndajaikuaái mba’épa la jajapo itereítava. Ñandejára he’íne ñandéve he’i haguéicha ñande sy tupãsyme: “Ani rekyhyje. Tupãme guarã ndaipóri ikatu’ỹva”.

ÑAÑEMBO’E OÑONDIVE

Ñandejára ore Ru, Nde nde resaho va’ekue ore sy porãite asy Tupãsy Maríare. Ema’ẽmína ha ejevale avei ore rehe, nde ra’y Jesús pe roipytyvõ haguã kyhyje’ỹre, ha’e ojapo haguéicha. Amén.

Pa’i Jasy.