Ñahendu Jesús. Viernes 3º Adviento

Escucha el evangelio y la reflexión en: https://youtu.be/47TZpB8OL-M

Viernes 3° de Adviento Juan 5, 33 – 36

Upérõ Jesús he’i umi judíokuérape: Peẽ peporandu ramo guare Juánpe che rehe, ha’e añeteguánte he’i vaekue che rehe. Naikotevẽi jepe niko che avave he’i che rehe mba’eve. Ha’énte peẽme ko’ã mba’e ikatu haguã Ñandejára pende salva. Juan va’ekue niko ku lampĩu ohesapéva, ha peẽ pevy’a sapy’a vaekue hesapépe.

Che katu niko areko peteĩ oñe’ẽ porãvéva che rehe Juángui. Upe che ajapóva niko hína, pe che Ru ome’ẽ vaekue chéve ajapo haguã. Ha upéva ohechauka che Ru che mbou hague.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…Karréra hápe karai komi kavaju mante ogana va’erã. Ha upéicha ojehu jepi oikóramo jeporavo mba’aporã, concurso oñemohenda ha oñeme’ẽ haguã puesto omba’apóvape. Hatãve opyrũ hína umi orekóva “padrino” ome’ẽva iñe’ẽ hese, umi orekóva “recomendación” yvatégui oúva. Oñemoinge jave kuatia mba’apo rekávo niko oñemoĩ avei upe curriculum-pe mávapa ikatu oñe’ẽ hese.

Upéi katu peteĩ teĩma ijehegui ohechauka va’erã ikatupyryha kánchape. Taha’e ha’éva la ipadríno, pe tapicha ndaikatupyrýiramo ijehegui, ndohechaukái ramo hembiapo rupive ikatuha jajerovia hese, vyroitépe ñasẽta hína.

Juan Bautista niko ome’ẽ va’ekue iñe’ẽ Jesús rehe. Ha’e ombosako’i ichupe tape. He’i opavavépe outaha hapykuéri peteĩ tuichavéva ichugui, oútava Espíritu Santo pu’aka reheve oisãmbyhy haguã opavavépe.

Jesús he’i añeteguánte Juan Bautista he’i va’ekue hese. He’i avei ndaha’eiha hína amo ipahápe Juan Bautísta ñe’ẽ rupi añetehápe ha’eha Tupã remimbou. Jesús he’i ha’e noikotevẽiha yvy arigua oñe’ẽva hese. Noikotevẽi recomendación, noikotevẽi padrino omoañetéva upe ha’e he’íva, térã ha’e ojapóva.

Umi tembiapo ha’e ohechaukáva hína umi omoañetéva ichupe. Tupã Ñandejára, pe Túva hína oheja ha ome’ẽ ichupe ojapo haguã heta tembiapo porã. Ha upéicha he’i Jesús, ojekuaa ha’eha Tupã remimbou. Ñañeha’ã ñande avei che irũ ha che reindy, jahechauka ñande jerovia tembiapo porã rupive.

Pa’i Jasy.