Ñahendu Jesús Ñe’ẽ. Lunes 2º Tiempo Durante el Año

Escucha el evangelio y la reflexión en: https://youtu.be/62qkIsSzkb8

Lunes 2º Tiempo Durante el Año Marcos 2, 18 – 22

Upérõ, Juan Bautista disípulo ha fariséokuéra oajuna jave, ojeho Jesús rendápe ha oporandu chupe hikuái: Juan Bautista ha fariséokuéra niko ojapo jepi ajúno. Mba’ére piko nde disípulokuéra ndaupéichai.

Jesús he’i chupekuéra: Peẽ piko peimo’ã peteĩ omenda ramóva irũnguéra oñembyasytaha ha’e oĩ aja hendivekuéra imendahápe. Nahániri, ndaikatúi ojapóvo ajúno. Ãgante oguahẽne ára ipore’ỹvo ha’e, upépe katu ojapóne ajúno.

Avave niko nombovyvýi ao pehengue pyahu ao tujáre. Pe ipyahúva oñyñýine ha omondoro jevýne pe itujáva, ha upekuévo omondoro tuichave. Vino pyahu niko noñembohyrúi vino ryru tujápe. Péicha ojejapórõ umi vino ryru osoróne ha oñehundíta pe vino ha umi hyru. Upévare, vino pyahu oñembohyru vaerã vino ryru pyahúpe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“La argel ndahi’órai”. He’i ningo ñe’ẽ. Jejopy vai, mba’asy, degrásia, ningo oúnte, nañahenói ha nañaha’arõi. Ho’ánte ñande apére. Ha upe jave ñañembyasy ha jajepokã.

Jakái ha jachyryry voi katu sapy’ánte ho’a vai etereíramo. Ha umi jave añete hetave ñañembo’e, jajesaupi ha ñamyangekói Ñandejára ha Tupãsýme. Jaju ha jaha, ñanderesakuare ndajakeporãvéigui. Jepy’apýgui jakaru’i ha tuicha jaguejy.

Umi fariseokuéra niko orekopa iléipe ajúno ára opyta haguã okaru’ỹre ha mba’e. Ha Jesús he’i upéva natekotevẽi, outaha voi ñandéve umi ára jaheka’ỹre. Pe ñande rekove oreko voi ijehegui jehasa asy ha umi jave jahupikuaa va’ẽra ñande apére ha ñamboguata, jajerovia pype Ñandejára oĩha ñande ykére. Ha upéicha avei oñeme’ẽ ñandéve ára javy’a ha jahasa porãha oñondive. Umi jave avei ñande aguyje vaẽra Ñandejárape ha jahupi mbarete tenonderã oúva jagueropu’aka haguã.

Jesús ou omoñepyrũ peteĩ guata pyahu Ñandejára ndive, ohejáva tapykue pe religión léire oñemosãva. Jesús he’i ñandéve Ñandejára oĩha ñande rekovépe ha umi ñanerembiasa rupi oñe’ẽha ñandéve, ñanerekombo’e ha ñanesãmbyhy. Vy’a ha vy’a’ỹme, tesãi ha mba’asýpe, mba’eta rereko ha mboriahúpe, tyguatã ha karu pokãme. Tañaime ñaime háicha Ñandejára oguata ñande ykére ha ndopoíri ñande hegui.

Pa’i Alberto Luna.