LECTURAS DEL LUNES 2º TIEMPO ORDINARIO

LECTURAS DEL LUNES 2º TIEMPO ORDINARIO

Ko’ágã ñahendúta Tupã Ñandejára ñe’ẽ Samuel arandukápe oĩ háicha 15, 16-23

Samuel katu oñe’ẽ joko ichupe he’ívo: Ekirirĩ, ta mombe’u ndéve upe Tupä Ñandejára he’i va’ekue chéve ange pyhare.

Saúl he’i ichupe: Eñe’ẽ katu!

Samuel he’i ichupe: Nde voi rejeapo’i va’ekue nde jupe, ne mandu’ápa? Tupã Ñandejára katu ndeporavo Israel ruvicha guasurã. Ko’ágã Ñandejára he’i kuri ndéve rehundi ete haguã umi Amalecgua ahẽme, opyta’ỹ haguã mba’eve ichuguikuéra. Mba’érepa remboyke ha’e he’i va’ekue ha reñongatu ne mba’erã upe Amalecgua mba’ekue, rejapóvo ivaíva Tupã Ñandejára renondépe?

Saúl he’i: Che ajapo he’i haguéicha Ñandejára: amoakã sã Amalecgua ruvicha guasu Agag ha aru ko’ápe ha ahundi Amalec guápe. Ñorairõhárakuéra katu, umi ovecha ha tóro oñehundi va’erã mo’ãgui, oiporavo iporãvéva ha ogueru oikuave’ẽ haguã Guilgálpe mymbajuka ramo Tupã Ñandejárape.

Upérõ Samuel he’i: Ñe’ẽ rendu upe Ñandejárape ombovy’áva, ndaha’éi mymbajuka, mymbahapy. Oipota ojejapo ha’e he’íva, hendaguépe ndoipotái mymbajuka, térã ovecha mácho kyrakue.

Pe Tupã Ñandejárare opu’ãva ha upe paje apohára, mokõive iñangaipa joja.

Pe iñe’ẽ nohenduséiva ojogua, ta’ãnga renondépe oñesũvape.

Tupã Ñandejára Ñe’ẽ remboyke haguére, mburuvicha guasúrõ na nde potavéi.

Tupã Ñandejára Ñe’ẽ.

SALMO ÑEMBOHOVÁI 49, 8-9. 16bc-17. 21.23

Opavave: Che retãgua pehendu che Ñe’ẽ

Mba’eve ndarekói ha’e va’erã mymbahapy ha mymba juka rehe pejapóva chéve.

Ndajeruréi peẽme pene rymba tóro, térã kavara mácho pende korágui. O.

“Mba’éicha rupi che rembiapoukapy nde jurúgui ahendu?

Mba’éicha rupi ne mandu’a che ñe’ẽ me’ỹre?

Roheko mbo’e ramo niko mba’eve ndereikuaaséi,

ha che ñe’ẽre nderejepy’apýi. O.

Opa ko’ã mba’e niko rejapo, ha piko reipota akirirĩ?

Nde piko reimo’ã che ndeichaguaha mba’e?

Nde rovakete anohẽta ndéve ne rembiapo vaikue,

ha aikuaaukáta ndéve mávapa che. O.

Upe tape porã rehe oikóvape anohẽne jejopy vaígui”. O.

ALELUIA  Lc 7, 16

Aleluia.

Peteï maranduhára nde tuicháva osẽ kuri ñande apytégui

ha Tupã Ñandejára ou ohechávo hetãguápe.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha  Mc 2, 18-22

Peteĩ jevy, Juan Bautista remimbo’ekuéra ha fariséokuéra ohasa jave ára ho’u’ỹre mba’eve, ojeho Jesús rendápe ha oporandu ichupe hikuái: Juan Bautista ha fariséo remimbo’ekuéra niko ohasa jepi ára ho’u’ỹre mba’eve. Mba’ére piko neremimbo’ekuéra nda upéichai?

Jesús he’i ichupe kuéra: Peẽ piko peimo’ã peteĩ omenda ramóva irũnguéra oñembyasytaha ha’e oĩ aja hendivekuéra imendahápe? Nahániri, ndaikatúi ho’u’ỹvo mba’eve. Agãnte oguahẽne ára ipore’ỹvo ha’e, ha upépe katu ohasáne ho’u’ỹre mba’eve.

Avave niko nombovyvýi ao Pehẽngue  pyahu ao tujáre. Pe ipyahúva oñyñýine ha omondoro jevýne pe itujáva, ha upekuévo omondoro tuichave. Kaguy pyahu niko noñembohyrúi kaguy ryru tujápe. Péicha ojejapórõ umi kaguy ryru osoróne ha oñehundíta pe kaguy ha umi hyru. Upévare, kaguy oñembohyru va’erã vino ryru pyahúpe.

Ñandejára Jesucristo Ñe’ẽ