Ñahendu Jesús. San Pablo ára

Escucha el evangelio y la reflexión en: https://youtu.be/EkudoFJZMT0

25 de enero: San Pablo ára. Marcos 16, 15 – 18

Upérõ Jesús ojechauka umi 11 apóstolkuérape, ha he’i chupekuéra: “Tapeho opa rupi ko yvyjerekuévo ha pemombe’u opavavépe upe marandu porã. Pe ogueroviáva ha oñemongaraikáva ojesalváta, pe oguerovia’ỹva katu oñehundíta.

Ha ko’ã techapyrã omoirũta umi ogueroviávape: che rérape omosẽta Aña, oñe’ẽta ñe’ẽ pyahu, ipópe oguerekóta mbói, ha ho’u ramo venéno ndojapo mo’ãi mba’eve hesekuéra, omoĩta ipo hasývare ha oporomongueráta.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ko árape ñanemandu’a hína apóstol San Páblo rehe. Ha’e ningo ndoikuaái ramo jepe Jesús pe ha ndaha’éi ramo jepe iñirũnguéra ypy, upéi ou oñehenói avei apóstol ha oiko ichugui upe hatãve oiko va’ekue omyerakuãvo Jesús ñe’ẽ tuicha háicha oparupiete.

Tenonderã Pablo irari va’ekue Jesús ñe’ẽ ha iñirũnguéra gui. Ha’e niko peteĩ Moisés léi ombo’éva rehegua ha hudío apytépe iñarandu ha ifanatikovéva ichugui ndaipóri va’ekue. Pablo oiko va’ekue omuña ha oraha kárselpe umi Jesús re ojeroviáva, ohechauka haguã ndaiporiha ambue religión añeteguáva. Ha oimo’ãgui upe Jesús ombo’e va’ekue japu meme ha ombyaiha pe hudíokuéra religión.

Ha’e oimo’ã Ñandejára upéicha ojerureha ichupe. Upépe Jesús oñeñanduka ichupe, osẽ haperãme ha oikuaauka Pablo pe añeteha upe ha’e ombo’e va’ekue ha iñe’ẽ ouha Ñandejáragui añetehápe.

Upépe mitã Pablo oguerova iguata ha ndoikovéi mbaretépe omuña umi ha’éicha ndojeroviáivape. Ñande niko jahecha avei sapy’ánte oimeha oiko vaíva ojuavy haguére ijeroviápe. Ndaha’éi rupi ojueheguáva, oime haguére ambue Iglésiape.

Oĩ katólico ha evanhéliko apytépe ifanátikova, ndoikuaaséiva voi ojuehegui mba’eve. Ombovaíva hapicha jerovia ha ombojapúva upe he’íva ha oñandúva, ndaikatúiva osẽ ojupe ñemongeta rupive oguata haguã oñondive.

Ko San Pablo árape iporã va’erã ñapensami che reindy ha nde che irũ, mba’éichapa ikatu ñande jajeroviáva Ñandejára Jesucristo rehe jaguata oñondive. Anive ñane fanátiko ha jaiko vai oñondive katóliko, evanhéliko ha protestante kuéra, jajeroviáva Jesús re.

Upéva rangue jajotopa ha ñañemongeta porã, jaiko oñondive py’aguapýpe, ñañopytyvõ, ñañembo’e ha ñamba’apo oñondive. Mba’épa reñandu.

Pa’i Alberto Luna.