Ñahendu Jesús Ñe’ẽ. Domingo 4º Tiempo Durante el Año

Escucha el evangelio y la reflexión en: https://youtu.be/8G198sF9Iqc

Domingo 4º Durante el Año Ciclo A Mateo 5, 1 – 12

Jesús ohechávo hetaha umi ijatýva, ojupi peteĩ sérro akãme ha oguapy oñe’ẽ haguã. Idisípulokuéra oñembyaty ijerére, ha Jesús oñepyrũ ombo’e chupekuéra. “Ovy’a vaerã umi ohecha kuaáva imboriahuha, chupekuéra guarã niko Ñandejára Réino.

Ovy’a vaerã umi ohasa asýva, Ñandejára voi omyangapyhýta chupekuéra.

Ovy’a va’erã umi heko mirĩva, Ñandejára ome’ẽta chupe kuéra yvy imba’e teerã.
Ovy’a va’erã umi Ñandejára rembipotánte ojaposéva, ha’e voi ome’ẽta chupekuéra opa oikotevẽva.
Ovy’a va’erã umi ohecha kuaáva hapichápe, Ñandejára ohecha kuaáta chupekuéra.
Ovy’a va’erã umi ipy’a potĩva, ha’ekuéra ohechátagui Ñandejárape.
Ovy’a va’erã umi ñorãirõme oikose’ỹva, Ñandejára oguerekóta chupekuéra ita’ýra ha itajýra ramo.
Ovy’a va’erã umi ohasa asýva Ñandejára rembipota ojapógui, chupekuéra guarã niko hína Ñandejára Reino yvagapegua.
Pevy’áke pejeja’o ha pehasa asy ramo, ha oje’e ramo pende rehe opa mba’e vai, che ndive peiko haguére. Pevy’áke ha tapende py’a rory, tuicha mba’e niko oñeme’ẽta peẽme yvágape. Peẽicha avei, profétakuéra ohasa asy vaekue yma.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ñane resãi ha ñamba’apo guive opa mba’e iporã”. He’i ningo lo mitã. Oime he’íva: “Jakaru porã ha ñande retia’éramo javy’a ha nañaikotevẽvéima mba’eve”. Mávapa nde ere che irũ ha che reindy umi ovy’áva ko yvy ape ári. Moõpa añetehápe jajuhu pe vy’apave.

Jesús ohecha ouha hendápe heta tapicha oikotevẽva ha ojeroviáva hese. Ojerepa hese mboriahu opaichagua, hasýva, noĩmbáiva, oha’arõva ichugui ñepytyvõ, jehovasa, tesãi. Ha oñepyrũ ombo’e ichupekuéra mávapa umi Ñandejára renondépe ovy’áva añete.

Oma’ẽ porã hese kuéra ha he’i: Peẽ penemboriahúgui pemoĩva pende rekove Ñandejára pópe pevy’a, peẽ pehasa asýva ha pejúva che rendápe, pevy’a. Peẽ pejejapo’ỹva, peẽ peipotáva Ñandejára rembipota oiko pende rekovépe, pevy’a.

Peẽ peiporiahuvekóva pende rapicha, ha peñeha’ãva pemoingoporã oiko vaívape, peẽ oñeñe’ẽvaíva pende rehe chendive peiko haguére pevy’a peẽ hina umi peikuaáva pe vy’a añete yvágagui oúva.

ÑAÑEMBO’E OÑONDIVE

Ñandejára Jesucristo, nde reikuaáva pe vy’a añete rape, aníkena eheja umi vy’a gua’u yvy arigua orembotavy. Orepytyvõ katu roguata haguã nde rapére ha rovy’a haguã nendive.

Amén.

Pa’i Jasy.