LECTURAS DEL LUNES 5º TIEMPO ORDINARIO

LECTURAS DEL LUNES 5º TIEMPO ORDINARIO

Ñahendúta Tupã Ñandejára ñe’ẽ Reyes arandukápe oĩ háicha 8, 1-7. 9-13

Upérõ Salomón ohenói hendápe Jerusalénpe moakãhára  Israelgua, Israel ñemoñare ruvicha kuéra ha karai guasu kuérape, ogueraha haguã Tupã Ñandejára Karameguã David Táva Sión guive. Ha upe arete guasúpe, áño pegua mes 7hápe hérava Etanim, oñemboaty mburuvicha guasu Salomón ndive opavave Israelgua.

Oguahẽ opa moakãhára  Israelgua, ha pa’i kuéra ohupi pe karameguã, ha ogueraha hikuái, pe Jotopa róga reheve, ha tembiporu ipypegua reheve. Opa ko’ã mba’e ogueraha umi pa’i ha levíta kuéra.

Mburuvicha guasu Salomón ha opa Israelgua oñemboaty va’ekue hendive, oikuave’ẽ karameguã renondépe mymbajuka ramo ovecha ha tóro, heta itereígui ikatu’ỹva ojepapa. Upéi pa’i kuéra ogueraha Tupä Ñandejára Ñe’ẽ ñome’ẽ karameguã tupao ryepýpe Tupã koty peve, tekove ipepóva pepo guýpe. Ko’ãva oipyso umi ipepo upe karameguã ári, ha péicha ojaho’i pe karameguã ha umi hi’ánda avei.

Karameguã ryepýpe oĩ umi mokõi ita pehenguénte, Moisés omoĩ va’ekue pype yvyty Horébpe. Umívare oĩ Ñe’ẽ ñome’ẽ Tupä Ñandejára ojapo va’ekue Israelgua ndive, ha’e kuéra osẽ rire Egíptogui.

Pa’i kuéra osẽvo tupao ryepýgui, arai omoenyhẽ Tupä Ñandejára tupao, Ha pe araígui pa’i kuéra ndaikatúi opyta hembiapo haguã, Tupä Ñandejára reko mimbipa omoenyhẽ haguére itupao.

Upérõ Salomón he’i: Ore Jára, reikose pe arai pytũme.

Che katu ajapóma ndéve, tupao reiko haguãme. Nde reiko haguã ko’ápe, opa árape guarã.

Tupã Ñandejára Ñe’ẽ

SALMO ÑEMBOHOVÁI   131, 6-10

R. Epu’ã ore Jára! Eike upe repytu’utahápe

Rohendu Tupã Ñandejára karameguã oĩha Efrátape,

ha roho rojuhu Jear ñúme.

“Jaha tupaópe, jaha ñañesũ

TupãÑandejára pyenda renondépe”. R.

Epu’ã ore Jára! Eike upe repytu’utahápe,

Nde ha ne Karameguã mbarete.

Nde pa’i kuéra opa ára toiko tekojojápe,

ha umi nde rehe ojeroviáva tosapukái vy’águi.

Ne rembiguái David rayhupápe,

ani remboyke ne rembiporavópe. R.

ALELUIA    Cf. Mt 4, 23

Aleluia.

Ñandejára Jesucristo omombe’u va’ekue Marandu

porä Sambyhy rehegua ha omonguera hasývape

opaichagua tapichápe.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Marcos omombe’u háicha   6, 53-56

Upe ramo ohasa hikuái pe y mboypýri ha oguahẽ Genesaret yvýpe ha upépe ojokua ikanóa y rembe’ýpe.

Oguejývo hikuái pe kanóagui ha umi upepegua oikuaávo Jesús hague pe oguahẽva, omomaranduka ijerekuévo, ha ogueru hikuái hendápe opa umi hasýva. Oho hikuái opa rupi ha ojegueru Jesús rendápe umi hasýva hupa reheve. Ha mamo ha’e oikehápe, taha’e táva, taha’e óga térã ñu rupi, omoĩ hikuái umi hasývape tapépe, ha ojerure ichupe hikuái opokomínte haguã ijao rembe’yrénte jepe. Ha opokóva guive hese, okuera.

Ñandejára Jesucristo Ñe’ẽ