Ñahendu Jesús. Viernes 5º Tiempo Durante el Año

Escucha el evangelio y la reflexión en: https://youtu.be/M8k6Fm09CkM

Viernes 5º Durante el Año Marcos 7, 31 – 37

Upérõ Jesús osẽ jey oho Tírogui. Ha ohasa Sidón rupi ha oguãhẽ Lágo Galiléape, Decápolis ypy rupi. Upépe, ojereraha hendápe peteĩ ohendu’ỹva ha iseseósova. Ojerure hikuái Jesúspe omoĩ haguã ipo hese okuera haguã. Jesús ogueraha chupe ha’eñoháme, omoinge ikuã ijapysápe ha omona hendy ikũre. Upéi ohupi hesa yvágare, hi’ãho ha he’i, “Efatá” he’iséva, “Ejepe’a.”

He’ipamívonte, pe ohendu’ỹva apysa ojepe’a ha ikũ jera, ha oñe’ẽ porã. Jesús he’i opavavépe ani haguã omombe’u. Ha he’i-he’ivérõ jepe chupe kuéra, ko’ýte omombe’u hikuái. Oponderapa joa hikuái ha he’i, “Opa mba’e ojapóva niko ojapo porã. Ohendu’ỹvape omohendu ha iñe’ẽngúvape omoñe’ẽ.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Umi aty hárupi, jajotopa hápe. Ja’e chupe reunión, terere jere, ñamba’apo hápe, ñande rógape voi, térã katu barriope, ñande comunidápe, tupaópe; oĩ jepi umi oñe’ẽ kuaáva ha oñe’ẽva voi.

Umíva sapy’ánte pe atýpe ojagarrapa pe ñemongeta ha oĩ avei okirirĩva, oiméva upépe hína ha’ete ku iñe’ẽngúva mba’e. Sapy’ánte noñe’ẽi noñemopa’ũigui chupe, noñeporandúigui. Térã katu otĩgui he’i haguã pe oñandúva.

Oimo’ã vyro rei upe he’ítava, okyhyje ojepukapa ramo guarã hese ojavy ramo. Ha upévare okirirĩmínte upépe, ikũsãramo guáicha. Oĩ ningo ñande rapicha ojeapo’íva, oñembo’ykéva ha noñeñe’ẽi voíva chupekuéra. Imboriahu, itavymígui, hasy katu, ivaígui, noĩmbáigui; ojerereko mymbáicha.

Avave guasu noñemongetái hendive ha nomombe’úi chupe mba’épa oiko. Noporandúi voi chupekuéra mba’épa oñandu, mba’épa he’i, mba’épa oipota ha oikotevẽ.

Jesús rendápe ojereru peteĩ tapicha nohendúiva ha iñe’ẽ pa’ãva. Ha Jesús oñemoĩ oñeha’ã hese. Oraha ichupe ha’eñoháme ha upépe omoinge ikuã ijapysápe, omoĩ hendy ikũre ha oma’ẽ yvágare he’ívo: “Ejepe’a”. Ha ohendu porã pe kuimba’e ha oñepyrũ oñe’ẽ. Naikũsãvéi.

Ikatu avei ñande che reindy ha nde che irũ ñañemboja umi oñembo’ykévare, ñande rógape voi, térã katu barrio pe, ñande comunidad pe. Ha’ekuéra niko tuicha mba’e Ñandejára renondépe ha tekotevẽ oñehendu avei iñe’ẽ, tojera ipy’a omombe’u haguã ñandéve otĩ’ỹre upe oñandúva ha ohecháva. Ha ñande tañahendu ichupekuéra vy’apópe, Jesús ohendu haguéicha ko tapichápe.

Pa’i Alberto Luna.