Ñahendu Jesús Ñe’ẽ. Domingo 33° Durante el Año
13 noviembre, 2022Ñahendu Jesús Ñe’ẽ. Miércoles 34° Durante el Año
23 noviembre, 2022
Escucha el evangelio y la reflexión en: https://youtu.be/rg31Jms–ic
21 noviembre: Tupãsy Presentación tupaópe Mateo 12, 46-50
Upérõ Jesús oñe’ẽ jave, oguãhẽ sapy’a pe ha’e oĩháme isy ha ityvýra kuéra. Oñe’ẽse hikuái hendive. Ha opyta hikuái oha’arõ chupe pe óga rokápe. Upéi katu osẽ peteĩ he’i Jesúspe: — Nde sy ha nde ryvy oime amo okápe hína. Oñe’ẽse hikuái nendive.
Ha osẽ he’i Jesús: — Mávaiko che sy ha máva umi che ryvy.
Ha omañávo idisípulo kuérare he’i: — Na’ápe hína che sy. Ko’ãva hína che ryvy. Ha pe ojapóva che ru yvagapegua rembipota, péva hína che ryvy, che reindy ha che sy.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Mitã onase ramóva niko ojeraha jepi tupaópe ha ojejerure pa’ípe ohovasa haguã, ikarai mboyve jepe, oiméma haguã Ñandejára poguýpe, ani haguã ojeharu. Ko árape jaguerohory hína Tupãsy María imitãkuña’ípe isy ha itúva, Joaquín ha Ana, oraháramo
guare ichupe tupaópe Ñandejára renondépe.
Pe Moisés léi ningo he’i va’ekue umi mita’i, kuimba’e tenondegua, ojereraha va’erãha tupaópe oñepresenta Ñandejárape, ha mitãkuña’i katu nahániri. Naimandu’ái hesekuéra Moisés léi. Opáichavo oime raka’e peteĩ kuatia ymaguare omombe’úva Tupãsy ojereraha hague Tupaópe, ambue mitakuña’ikuéra ndive oikuaa haguã Ñandejárape.
San Lucas ningo omombe’u ñandéve Jesús onase rire ojeraháramo guare tupaópe, ha upéva ñaromandu’a hína el 2 de febrero, Candelaria árape, ñamyendývo tataindy, Jesús ha’égui hína pe tataindýicha ohesapéva ko múndo. Oiméramo Jesús ha’e raka’e pe tataindy niko ikatúne ja’e isy Tupãsýre ha’eha pe candelero oguapyhápe tataindy.
Ñande jaikuaa mba’éichapa kuñanguéra oñembotapykuéva ideréchope ha ndojehechakuaáiva ymaite guive. Jesús katu ningo oreko va’ekue avei idisípulokuéra apytépe heta kuña oguatáva hendive apóstolkuéra apytépe. Jesús nombotapykuéi kuñanguérape.
Ñande Iglesia yma guive ohechakuaa raka’e, noiméiramo jepe léi yma guarépe upe kuña ojegueru va’erãha tupaópe, tekotevẽha oñembojoja ha ojegueru avei kuñaojegueru háicha kuimba’e. Tekotevẽ ojegueru María ojegueru háicha Jesús, mokõivéva Ñandejára renondépe peteĩcha. Ha upéicha avei tekotevẽ kuñanguérape ojehechakuaave ñande iglésiape henda tee ha ñañombojojave jahávo kuimba’e ha kuña. Anivéma kuimba’e, pa’i ha obispo he’ívante la ovaléva, ha la kuña katu tokirirĩ ha toñakãity.
Jesús renondépe la ovaléva ñañeha’ã jajapo upe ha’e ñanembo’éva. Mba’evende’iséi kuimba’e térã kuña, pa’i térã laico, estudio puku térã lápi mbyky. Mba’épa rehecha che reindy ha nde che irũ, tekotevẽha jajapo ñañombojojave haguã jahávo.
Pa’i Alberto Luna.