LECTURAS DEL DOMINGO 6º TIEMPO ORDINARIO

LECTURAS DEL DOMINGO 6º TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 15,15-20

Reipota ramo, rejapo kuaa Ñandejára mandamiento ha rejapo hekópe upe ichupe ombovy’áva. Ne renondépe ha’e omoĩ tata ha y reiporavo haguã pe reipotáva. Yvypóra renondépe oĩ jeikove ha mano. Ichupe oñeme’ẽta pe ha’e oiporavóva. Ñandejára iñarandueterei, ha’e ipokatu ha ohechapa.

Ñandejára ohecha opa mba’e jajapóva, ha oikuaapa ñane rembiapokue. Avavépe ndoje’éi iñaña haguã, avavépe ndoje’éi ikatuha ojapo ivaíva.

Opavave: Romomba’e guasu ndéve, Ñandejára.

SALMO ÑEMBOHOVÁI 119, 1-2. 4-5. 17-18. 33-34
Opavave: Ovy’a umi oikóva Ñandejára léi he’i háicha.

Ovy’a umi imarangatúva, ha oikóva
Ñandejára léi he’i háicha.
Ovy’a umi hembipota ojapóva ha ipy’aite guive ichupe omomba’éva. O.

Ne mandamiento reme’ẽ va’ekue
ipype he’i háicha ojejapo haguã.
Ha nga’u apyta hatã upe ne rembiapoukapy apópe. O.

Nde py’a porã kena che ndive aikove haguã,
ha ne ñe’ẽ ajapo haguã.
Che resape’a ikatu haguã ahecha iporãiteha umi ne mandamiento. O.

Ore Jára, che moarandu nde léipe, umíva he’i háicha niko aikose.
Che mbo’e umi ne mandamiento, che py’aite guive ajapo haguã upe he’i háicha. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Corinto guápe 2, 6-10

Che pehenguekuéra. Añete niko umi iñarandu añetéma va’ekue ndive, aiporu hague ñe’ẽ arandu. Jaikuaa va’erã jepe, ndaha’eiha arandu ko yvy peguáva, térã umi isãmbyhyhára arandu, oñehundítava rehegua.

Péva katu hína Ñandejára arandu ñemi, hembipota ñemi, ha’e oguerekóva ñande vy’arã opa ára guive. Kóva ha’e peteĩ mba’e ikatu’ỹ va’ekue oikuaa umi tetã sãmbyhyhara ko’agãgua.

Oikuaa rire niko ndo jukái va’erã mo’ã kurusu rehe pe teko mimbipa Járape. Ñandejára Ñe’ẽme he’i háicha: “Hayhuhakuérape guarã oguereko Ñandejára, umi avave ohecha’ỹ, ohendu’ỹ ha oimo’ã’ỹ va’ekue”. Ko’ãva hína umi mba’e Ñandejára oikuaaukáva ñandéve Espíritu Santo rupi. Espíritu niko oipyguara opa mba’e, umi mba’e pypukuvéva Ñandejára rehegua jepe. Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Mt 11, 25

Aleluia.
Romomba’e guasu che Ru, yvága ha yvy Jára, reñomi hague rehe ko’ã mba’e umi iñarandu ha imba’e kuaávagui, ha reikuaauka umi iñarandu’ỹvape.
Aleluia.

EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 5, 20-22a.27-28. 33-34a. 37
Opavave: Romomba’e guasu ndéve, Ñandejára.

Upéro Jesús he’i idisípulokuérape: Che ha’e peẽme, peẽ peñeha’ãve ramo pejapo haguã Ñandejára rembipota umi fariséo téra Moisés mandamiénto ombo’évagui, peikéta Ñandejára Rréinope.

Peẽ niko peikuaa oje’e hague pende ypykuérape yma: “Aníke reporojuka. Oporojukávape hekovia va’erã hembiapokue.” Che katu ha’e peẽme: “Opavavépe oñemyengoviáta hapicha ndive ipochy haguérente jepe. Ha oimérõ he’íva hapichápe ‘Nde tavy’, upéva ojereraha va’erã karai juez renondépe.

Peẽ niko peikuaa yma oje’e vaekue: “Ani reporomyakã ratĩ.” Che katu ha’e peẽme, oĩ ramo oma’ẽva kuñáre ha oguerekoséva chupe, upéva ipy’ápema voi omyakãratĩ hembirekópe. Peikuaa oje’e hague pende ypy kuérape yma: “Ani Ñandejára rérare ere rejapotaha mba’e rejapo’ỹtava.” Che katu ha’e peẽme: “Ani mba’evére peje pejapotaha mba’e pejapo’ỹtava. Peme’ẽta ramo pene ñe’ẽ, pejénte ‘Néi’, térã
‘Nahániri’. Pejeve ramo, péva ou Añágui.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.