LECTURAS JUEVES I DE CUARESMA

LECTURAS JUEVES I DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Ester arandukápe oĩ háicha 3, 6; 4, 11-12. 14-16. 23-25

Mburuvicha guasu Persiapegua ojapo peteĩ apoukapy he’iva ojejukapa ite haguã judío kuéra oĩva Pérsiape. Israelita kuéra apysápe oguahẽ upéva ha oñembo’e ohechágui hi’aguĩ imanonguéra.

Ester avei py’apy reheve oñembo’e Tupä Ñandejárape. Upéi oñembo’e Tupã Israel Járape: Che Jára, ore ruvicha, ndeichagua niko ndaipóri. Eju che pytyvõ. Che año ajejuhu. Ndénte upe ikatúva che pytyvõ, vaípe ajejuhu.

Che rógape che mitã guive ahendúva, nde reiporavo hague Israel opa tetã nguéra apytégui; ha ore ru kuéra ypykuépe opavave apytégui, ne mba’e teerã, ore Jára. Ha ere haguéicha ite rejapo.

Ne mandu’a kena ore rehe ore Jára, ha eñeñanduka oréve ko rojejopy vai jave. Che mbopy’a guasu che Jára, nde hína tupã nguéra ruvicha guasu, ha opa mba’e Jára.

Añembojávo upe jaguarete rendápe, emoĩ che jurúpe Ñe’ẽ poravo pyre ha epoko ipy’a rehe, ojere haguã upe ore rayhu’ỹva rehe ha ohundi haguã ichupe ha umi hendive oĩvape. Ani ore rejátei ro’a ipópekuéra, eju che pytyvõ, che año niko ajejuhu. Máva rendápe piko añembojáta, ndaha’éi ramo ne rendápe? Nde reikuaa opa mba’e.

Tupã Ñandejára Ñe’ẽ.

SALMO ÑEMBOHOVÁI 137, 1-3. 7c-8

Opavave: Tupã Ñandejára ojapóta opa mba’e che rehehápe.

Che py’aite guive romomba’e guasúta ore Jára, tupã nguéra renondépe rogueropurahéita.
Nde tupao renondépe añesũne, nde réra amomba’e guasúne. O.

Nde niko mborayhu ha añete, ha nde réra ha ne ñe’ẽ remoĩ opa mba’e ári.
Ndéve añembo’e ha nde che rendu, che py’a remombarete, ha nde pyapýpe che renohẽ jejopy vaígui. O.

Tupä Ñandejára ojapóta opa mba’e che rehehápe. Ore Jára, ne mborayhu niko ndopái araka’eve.
Ani reheja rei upe ne rembiapokue Remoñepyrũ va’ekue. O.

VERSÍCULO ANTES DEL EVANGELIO Sal 50, 12a – 14a

Tupã che Jára, emoĩ che pype peteĩ korasõ ipotĩva ha eme’ẽ jevy chéve vy’a pysyrõ rehegua.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 7, 7-12

Upe ramo Jesús he’i hemimbo’ekuérape: Pejerure, ha Tupã Ñandejára ome’ẽta peẽme. Peheka ha ha’e ojuhukáta peẽme, pembota Tupã Ñandejára rokẽ ha ha’e oipe’áta peẽme. Ojerurévape niko oñeme’ẽ, ohekáva katu ojuhu, ha pe okẽ ombotávape ojepe’a.

Peẽ piko, pende ra’y ojerure ramo peẽme mbuja peme’ẽta ichupe ita pehẽngue? Térã ojerure ramo peẽme pira, peme’ẽta ichupe mbói? Peẽ pene rembiapo vaíva Tupã Ñandejára renondépe, peme’ẽkuaa ramo iporãva pende ra’ykuérape, ko’yteve pende Ru yvágape oĩva ome’ẽta iporãva umi ichupe ojerurévape.

Upévare, pejapo pende rapicháre upe peẽ peipotáva ha’ekuéra ojapo pende rehe. Upévape he’ipaitéma Moisés rembiapoukapy ha maranduhára kuéra kuatia ñe’ẽme oĩva.

Ñandejára Jesucristo Ñe’ẽ.