LUNES SEGUNDO DE PASCUA

LUNES SEGUNDO DE PASCUA

Primera lectura:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha  4, 23-31

Pedro ha Juan, ojepoi rire ichugui  kuéra, oho oñemboaty iñirũnguéra ndive ha omombe’u ichupe kuéra opa he’i va’ekue pa’i ruvicha ha moakãha rakuéra. Ohendu rire ichupekuéra oñembo’e Tupã Ñandejárape oñondivepa, he’ívo: “Ore Jára, nde rejapo va’ekue yvy ha yvága, yguasu ha opa ipype oĩva, ere va’ekue Espíritu Santo ha ne rembiguái ore ru ypykue David juru rupi: “Ma’erãpa opu’ã tetãnguéra ha ojapose mba’e opa reítava? Oñomoirũmba yvy arigua mburuvicha guasu kuéra, opu’ã haguã Tupã Ñandejára reha hembiporavo Crístore.”

Añete, Herodes ha Poncio Pilato, oñomoirũ kóva ko távape tetã ambuegua ha Israelgua ndive, ha opu’ã ne rembiguái marangatu Jesús rehe, nde reiporavo va’ekue Mesías ramo. Péicha ojapo hikuái, opa nde ere va’ekue oiko haguã. Ko’ágã, ore Jára, ema’ẽ mba’éichapa ipochy hikuái, ha embopy’a guasu ne rembiguáikuérape omoerakuã haguã ne ñe’ẽ kyhyje’ỹre.

Ehechauka nde pokatu remonguerávo hasývape ha rejapóvo techaukarã ha hechapyrãva, ne rembiguái marangatu Jesús rérape.” Ha’ekuéra oñembo’epávo, upe oñemboatyhápe hikuái oryrýi, ha opavave henyhẽ Espíritu Sántogui, ha omoerakuã kyhyje’ỹre Ñandejára Ñe’ẽ.

Tupã Ñandejára Ñe’ẽ.

SALMO ÑEMBOHOVÁI   2, 1-9

Opavave: Ovy’ã va’erã Tupã Ñandejára rehe ojerovíava

Ma’erãpa opu’ã tetãnguéra ha ojapose mba’e opa reítava?

Ojoaju yvy arigua mburuvicha guasukuéra, opu’ã Tupã Ñandejára rehe, ha mburuvicha

guasu ha’e oiporavo va’ekuére.

He’i hikuái: “Ñamondoho itukumbokuéra,

jahekýi ñande jehegui umi isã.” O.

Upe yvágape oisambyhýva opuka.

Ñandejára opuka hesekuéra.

Upéi oñe’ẽ hatã pochy reheve

Omondýi ichupekuéra he’ívo: “Amboguapýma Sión, che yvyty marangatúpe,

mburuvicha guasúpe che aiporavo va’ekue.” O.

Ahendukáta Ñandejára Ñe’ẽ.

Ha’e he’i chéve: “Nde che ra’y. Che romoñemoña ko árape.

Ejerure chéve ha ame’ẽta ndéve, tetãnguéra ne mba’e teerã, ha yvy oĩ haguéicha.

Fiérro nde pópe ichupekuéra reñakã jokáta, ha kambuchícha remyangu’íta.” O.

ALELUIA Col. 3, 1

Aleluia.

Peẽ peikove jevýre Cristo ndive, peheka umi mba’e porã yvagapegua

Cristo oguapyhápe Tupã Ñandejára akatúpe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha     3, 1-8                                    

Upe ramo oiko va’ekue peteĩ fariséo hérava Nicodemo, herakuã guasúva judío kuéra apytépe. Peteĩ pyharépe oho Jesús rendápe, ha he’i ichupe: Mbo’ehára, roikuaa niko Tupã Ñandejára ne mbou hague ore mbo’e haguã oréve. Ndaipóri niko avave ikatúva ojapo umi mba’e hechapyrãva nde rejapóva, Tupã Ñandejára noĩri ramo ne ndive.

Jesús he’i ichupe: Añetehápe ha’e ndéve, avave oikove pyahu jevy’ỹva ku mitãicha, ndoike mo’ãi Tupã retãme.

Nicodemo he’i ichupe: Mba’éicha piko peteĩ okakuaapa mava oikove pyahu jevýta? Oike jevýta nga’u piko isy ryépe, upéi osẽ jevy haguã?

Jesús he’i ichupe: Añetehápe ha’e ndéve, upe oikove pyahu jevy’ỹva y ha Espíritu rupi, ndaikatu mo’ãi oike Tupã retãme. Maymáva yvypóra niko ou itúva kuéragui, yvypórava, ha hi’ánga ikove pyahu jevy Tupã Espíritu rupi. Ani reñemondýi ha’e haguére ndéve opavave oikotevẽha oikove pyahu jevy. Yvytu niko oipeju, oipejuseha gotyo. Ha rehendu ramo jepe hyapu, nderehechái moõguipa ou térã moõpa oho. Péicha hína umi oikove pyahu jeýva Tupã Espíritu rupi.

Ñandejára Jesucristo Ñe’ẽ.