DOMINGO X SEMANA DEL TIEMPO ORDINARIO

DOMINGO X SEMANA DEL TIEMPO ORDINARIO

MAITEI OÚVAPE – Saludo

Ñande rapépe niko opaichagua mba’e jatopa, ivaíva ha iporãva. Sapy’ánte ikatu ñasẽ tapégui ha tuicha jajavy. Ani hag̃ua ñambyai ñande rekove niko ñahenduva’erã Ñandejárape, ha jaiporavo pe Jesús ñanembo’éva.

COLECTA ÑEMBO’E
Tupã Ñandejára, ndehegui oúva opa mba’eporã, ehendu opa ore mba’e jerure, ore pytyvõ, nde jehesape rupi, rojepy’a mongeta hag̃ua umi teko porãre, ha nde ñepytyvõ rupi, toroikove upéichaite.

Nde Ra’y Jesucristo rupive,Tupã Ñandejaraite, oikovéva ha ipu’akapáva nendive Espíritu Sánto ñemopeteĩme,yma, ko’ãga ha opa araite.

ÑAHENDU ÑANDEJÁRAPE – Motivación a lecturas
LECTURA PETEÎHA:
Motivación: Iñepyrũmby guive oikéma raka’e pe jeiko vai kuña ha kuimba’e apytépe. Ha péva oiko ndojapói haguére hikuái pe Ñandejára he’íva.

Ko’ãga ñahendúta Tupã Ñandejára ñe’ẽ Génesis arandukápe oĩ háicha 3, 9-15

Upérõ ho’upa rire pe kuimba’e ha pe kuña yva oje’u’ỹ va’erãgui Ñandejára ohenói upe kuimba’épe ha oporandu ichupe: Mamo piko reime?

Upe kuimba’e he’i: Ahendu reguata ramo yvaty rupi ha akyhyje ajechagui opívo, upéva rehe akañy. Tupã oporandu ichupe: Máva piko he’i ndéve nde opivoha? Re’u piko ra’e upe yva ha’e va’ekue ndéve ani haguã re’u?

Upe kuimba’e he’i: Kuña reme’ẽ va’ekue chéve che irũrã, ome’ẽ chéve upe yva ha ha’u. Ñandejára oporandu kuñáme: Mba’e piko rejapo?

Ha’e he’i: Mbói che mbotavýgui ha’u.

Upéma ramo Ñandejára he’i mbóipe: Rejapo hague rehe kóva, ne añoite reikóta tymba jaheipýrõ, retyryrýta reikóvo yvy rehe ha ne ñembyahýi ramo re’úta yvy.

Kuña ndive romoingo vaíta, ha iñemoñare ne ñemoñare ndive. Kuña ñemoñare ne akã rehe opyrũta, nde katu reha’ãta reisu’u ipyta.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 129, 1-8
Opavave: Ejerovia Ñandejára rehe, hendive añoite jajuhu poriahuvereko.

Amo ipypukuvehágui niko ndéve añembo’e che Jára.
Che Jára, che rendumína.
Ejapysaka porã che rehe,
ejapysaka che rembijerurére. O.

Ne mandu’áta ramo ore rembiapo vaikue rehe,
piko máva oñemoĩta ne renondépe?
Nde katu reheja rei oréve ore angaipa
ikatu haguã ndéve romomba’e. O.

Che py’aite guive aha’arõ Ñandejára che pytyvõ haguã,
ha arovia upe iñe’ẽ ha’e ome’ẽva chéve.
Che py’a ite guive aha’arõ Ñandejárape,
ku guárdia ojapóva ára ko’ẽ oha’arõ háicha. O.

Israel! Ejerovia Ñandejára rehe.
Imborayhu niko na iñambuéiva,
ha jejopy vaígui ha’e ñane renohẽta.
Ha’e oheja reíta Israélpe opa iñangaipa. O.

LECTURA MOKÔIHA:
Motivación: Jehasa asy Ñandejára rapére hekoviáta ñandéve mba’e porãme he’i San Pablo. Upévare ijetu’uramo jepe opa mba’e ha’e ndaipy’a kangýi.

Ñahendúta Tupã Ñandejára Ñe’ẽ San Pablo ohai va’ekue ikuatia mokõiháme Corinto guápe 4, 13 _ 5, 1

Che pehenguekuéra: Ñandejára ñe’ẽ he’i: “Arovia ha upéva rehe añe’ẽ”. Upéicha avei ore roguerovia ha upéva rehe roñe’ẽ. Roikuaa Tupã omoingove jevy va’ekue Ñandejára Jesúspe, ore moingove jevytaha avei oréve hendive, ha
pene ndive ore rerahátaha hendápe.

Opa ko’ã mba’e ojehu va’ekue ou porã haguã peẽme, ikatu haguã heta umi ohupytýva Tupã pytyvõ, ha heta avei umi omboaguyjéva ichupe, Tupãme oñemomba’e guasu haguã. Upéva rehe, nda ore py’a kangýi. Ore rete ikuepa ramo jepe ohóvo, ore pype ore pyahuve arako’ẽ rehe.

Opa mba’e roguero hasáva ko yvy ári, ivevúi ha pya’e ohasa. Hapykuéri katu ogueru teko mimbipa opave’ỹva, tuicha iteve ha hetaitevéva. Ore niko noroma’ẽi upe ojehechávare, roma’ẽ ojehecha’ỹvare. Umi mba’e ojehecháva niko ohasa rei, umi ojehecha’ỹva katu opa árape guarã.

Ñande jaikuaa, ko ñande rekove, ku óga yvy ári guáicha oñehunditaha. Ha jaikuaa pe óga oñembyai vove, Tupã oguerekoha ñandéve guarã yvágape, peteĩ óga oñembyai’ỹva, ndojejapói va’ekue yvypóra po rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 12, 31b-32
Aleluia.
Ñandejára he’i: Aña ko yvy ruvicha oñemosẽta.
Ágã ko yvýgui ajehupívo, arupáta che jere rehe opavavépe.
Aleluia.

EVANGELIO
Motivación: San Marcos omombe’u heta oimeha opu’ãva Jesús kóntrape. He’i hese hikuái oimeha Aña poguýpe. Ihéntekuéra jepe he’i hese itavyha.

Marandu porã Ñandejára Jesucristo rekove ha hemimbo’e San Marcos omombe’u háicha 3, 20-35
Opavave: Romomba’e guasu ndéve, Ñandejára.

Upérõ Jesús oho hógape, ha upépe oñembyaty jevy heta iterei, ha chuguikuéra ndaikatuvéi okaru jepe Jesús ha idisípulo kuéra. Oikuaávo upéva Jesús hénte kuéra, oho ogueraha haguã chupe he’ígui hese noiporãiha iñakãme.
Ha uperõ Moisés léi mbo’ehakuéra oguahẽva’ekue Jerusaléngui he’i avei Jesús rehe: “Satana, añanguéra ruvicha voi niko hína pe ohejáva chupe omosẽ umi añanguérape”.

Jesús ohenói ha he’i chupekuéra ñe’ẽ mbojojápe: “Mba’éicha piko ikatúta Satana omosẽ Satanáme? Peteĩ tetã oñemboja’opáramo ha maymáva opu’ã oñoakãre, ndaikatúi upe tetã oiko arévo. Ha peteĩ óga pegua opu’ãmbáramo
ojuehe oñehundi avei. Péicha avei, Sataná voi opu’ãrõ ijehe ndaikatu mo’ãi oiko arévo ha oikopáta hese. Avave ndoike mo’ãi peteĩ kuimba’e imbaretéva rógape omonda haguã chupe, ndoipokuái ha ndoipykuái raẽirõ. Péicha ojapóramo
mante ikatúne omonda chugui.

Añetehápe ha’e peẽme, Tupã oheja reitaha opavavépe opaichagua pekádo, ha oñeñe’ẽ vai haguére hese jepe. Espíritu Santo rehe ojahéivape katu ndojeheja rei chéne, opytáne hi’ári opa ára guarã.”

Ko’ã mba’e Jesús he’i, ha’ekuéra he’i haguére hese oĩha Aña poguýpe. Upe aja oguahẽ Jesús sy ha ityvýrakuéra. Opyta okápe ha ohenoika chupe. Umi oguapýva Jesús ykére he’i chupe: Nde sy, nde ryvykuéra ha umi ne reindy oime
okapehína, nde reka. Jesús katu he’i: Mávaiko che sy ha máva che ryvy?

Upéi oma’ẽvo umi ijerére oguapývare he’i: Ko’ãva hína che sy. Ko’ãva che ryvy. Ha oimeraẽ ojapóva che Ru rembipota, upéva hína che ryvy, che reindy ha che sy.

Ñandejára Jesucristo Ñe’ẽ.

Opavave: Romomba’e guasu ndéve, Ñandejára Jesucristo.