LECTURAS DOMINGO VIGÉSIMO QUINTO DURANTE EL AÑO

LECTURAS DOMINGO VIGÉSIMO QUINTO DURANTE EL AÑO

LECTURA PETEÎHA:
Motivación: Sabiduría kuatiápe ñahendu mba’éichapa umi tapicha aña oñembohory Ñandejárare ojeroviáva rehe ha oityse ichupe nuhãme.

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 2, 12. 17-20

He’i umi oikóva tape vaíre: Ñamoñuhã heko jojávape, oñemoĩgui ñande rapépe ha ndo hejái jajapo jajaposéva, ñande rova api jajei hague rehe heko peguávagui, ha opa jajeheko mbo’e porã haguégui.

Jahechami añetépa opa he’íva, ha mba’éichapa opa amo ipahápe. Heko jojáva Tupã Ñandejára ra’y ramo añete, oipytyvõne, ha oipe’áne ichupe ohayhu’ỹva pógui. Ñañe mboharáina hese ha jareko asy, jahechami imbarete ha oha’arõ kuaápa. Jajuka ichupe jaguáicha, he’i niko Tupã oipytyvõtaha ichupe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 53, 3-6.8
Opavave: Ñandejára che pytyvõ añetehápe.

Ñandejára, che renohẽ jejopy vaígui nde réra rehehápe.
Che mo’ã ne mbaretépe.
Ñandejára, che rendu ndéve añembo’évo, ejapysaka upe ndéve ha’évare. O.

Ñandejára, che renohẽ jejopy vaígui nde réra rehehápe.
Umi oñembo tuicháva opu’ã che rehe ha mbaretépe ou che jukávo.
Ha’ekuéra Ñandejáragui mba’eve ndoikuaaséi. O.

Ñandejára katu chéve che pytyvõ, ha’e che moingove.
Che ofrénda amoguahẽta ndéve.
Nde réra amomba’éta, nde niko ne mba’e porã. O.

LECTURA MOKÕIHA:
Motivación: Santiago kuatiápe he’i pe mba’epota tarovahína upe ñanemopu’ãva oñuakãre ha ñande raha vaíva.

Ko’ágã ñahendúta Tupã Ñandejára ñe’ẽ Santiago kuatiañe’ẽpe oĩ háicha. 3, 16 – 4,3

Che pehẽnguekuéra: Chentese oike ramo pende apytépe ha pepu’ã ojuehe, oĩta sarambi ha opaichagua teko aña. Umi oguerekóva arandu Ñandejáragui oúva katu heko potĩ, ndaipochy kuaái, ipy’a porã ha iñe’ẽ rendu kuaa.

Upéicha avei, oporo poriahuvereko kuaa, iñe’ẽ añete, ndahova mokõiri ha ojapo iporãva. Ha umi oñeha’ãva oporo moingo porã haguã, ku oñotỹva ramo guáicha py’a guapy omono’õ ichugui teko joja.

Mamógui piko ou umi ñorairõ ha joavy pende apytépe? Ou pene rembipota vaígui, pene moñorairõ mantéva.
Peipota pe ikatu’ỹva pereko, ha upéva rehe peporojuka.

Pene renyhẽ mba’e potágui pehupity’ỹre mba’eve, ha upéva rehe peñorairõ ha pekaguai ojuehe. Ndapehupytýi peipotáva nda pejeruréigui Ñandejárape. Ha pejerure ramo, noñeme’ẽi peẽme pejerurégui hekope’ỹ. Peipota niko pende vy’arã rei.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. 2Tes 2, 14
Aleluia.
Ñandejára, marandu porã ore romyerakuãva rupi, peike avei peẽ Ñandejára Jesucrísto reko mimbipápe.
Aleluia.

EVANGELIO
Motivación: Pe chentese ha ore kuete oikéramo ñande apytépe ñande pe’a Jesús rapégui. Upévare ha’e ñanembo’e jajejapo ha ñañembotuicha rangue tekotevẽ ñañemomichĩ ha jaiko ñande rapichakuéra rembiguáiramo.

Marandu porã Ñandejára Jesucrísto rekove ha hemimbo’e San Marcos omombe’u háicha 9, 30-37

Opavave: Romomba’e guasu ndéve, Ñandejára.

Umi árape Jesús ha idisípulokuéra osẽ oho Galiléa jerére. Ha Jesús katu ndoipotái avave oikuaa ha’e oikoha upe rupi, ombo’égui oikóvo idisípulokuérape.

He’i chupekuéra: — Umi che rehe ija’e’ỹva niko che reitýta hína ha che jukáta hikuái. Ha amano hague 3 ára hápe katu, aikove jeýta.

Idisípulokuéra katu ndoikuaái mba’épa pe Jesús he’íva chupekuéra. Ha okyhyjégui, noporandúi chupe hikuái.

Jesús ha idisípulokuéra oguãhẽ Cafarnaúmpe. Ha oĩ jave hína hikuái Pedro rógape, Jesús oporandu chupekuéra: — Mba’e rehe piko peñemongeta kyre’ỹ pejúvo tapére.

Ha’ekuéra katu okirirĩmba chugui. Oñe’ẽ niko oúvo ra’e hikuái mávapa pe tuichavétava ijapytépe kuéra. Ha Jesús oguapy, ha ohenói umi 12pe.

He’i chupekuéra: — Oĩrõ pende apytépe oñemoĩséva hapichakuéra ári, péva tapykuetépe oñemoĩ va’erã, ha oiko va’erã
hapichakuéra rembiguái ramo.

Upéi ohenói peteĩ mitã ha omoñembo’y ijapytépekuéra. Omboguapy hapypa’ũme ha he’i chupekuéra: — Peẽ peguerohory ramo mitã ko’ãichagua, chéve che guerohory hína. Ha chéve che guerohorýva, nda chéve añói che guerohory, upe che mbouharépe ave.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.