LUNES VIGÉSIMO NOVENO DURANTE EL AÑO

LUNES VIGÉSIMO NOVENO DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Éfeso guápe    2, 1-10

Che pehẽnguekuéra:

Yma niko peẽ pemano va’ekue, tembiapo vai ha angaipa poguýpe. Peiko va’ekue  opa yvypóra heko añáva oiko háicha, ha pejapo pe espíritu aña ruvicha yvytúre oikóva oipota haícha, ha oguerekóva ipoguýpe umi Tupã Ñandejárape ohenduse’ỹvape.

Ha umívaicha niko opavavete jaiko va’ekue  ymave. Jaiko va’ekue  jaikose háicha ha jajapo umi mba’e vai ñane akãme jarekóva. Upévare, Tupã Ñandejára ñane nupã pochy va’erã mo’ã, ñane rembiapo vaikue ojerure háicha, ambuére ojapo haguéicha.

Tupã Ñandejára katu, tuicha ñande poriahuverekógui ha tuicha ñande rayhúgui, jaikove ramo jepe ku omanóva ramo guáicha ñane rembiapo vai haguére, ñane moingove jevy Cristo ndive. Tupã Ñandejára imba’e porãgui peñepysyrõ. Ha Cristo ndive voi ñane moingove jevy, ha ñane mboguapy hendive yvágape.

Péicha ojapo ohechauka haguã umi ára oútavape mba’éicha itépa ñande rayhu ha mba’éicha itépa imba’e porã ñane ndive Cristo Jesús rupi. Tupã Ñandejára imba’e porãgui ha peẽ  pejeroviágui hese, peñepysyrõ. Kóva ndaha’éi pende jehegui ikatúva pejapo, Tupã Ñandejára ome’ë  rei peẽme. Tupã Ñandejára niko pe ñande apóva, ha ñane mbojoajúvo Cristo ndive ñande apo ypy va’ekue  jajapo haguã umi mba’e iporãva ha’e omoĩma va’ekue  voi ñandéve.

Tupã Ñandejára Ñe’ẽ.

SALMO ÑEMBOHOVÁI   99, 1-5

Opavave: Ñandejára hína Tupã, Ha’e ñande apohare.

Yvy tuicha háicha pemomba’e guasu.

Pejapo vy’a pópe ichupe hembipota,

peguahẽ hendápe sapukái rorýpe. O.

Peikuaa porãke: Ñandejára hína Tupã,

Ha’e ñande apohare ha ñande imba’e,

hetãgua ha ovecha iñu megua. O.

Peike hokẽ nguéra rupi pembo aguijévo ichupe,

ha hóga guýpe purahéi reheve.

Pembo aguyje  ichupe ha héra perohory. O.

Tupä Ñandejára imba’e porãgui, imborayhu ndaijapýrai,

ha heko jeroviaha opa árape guarã. O.

ALELUIA Mt 5, 3

Aleluia.

Ovy’a va’erä umi ndojejapóiva ha hi’ánga mboriahúva,

ichupekuéra guarä niko Sambyhy Yvágapegua.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha 12, 13-21

Upe ramo peteĩ umi oĩva apytégui he’i Jesúspe: Mbo’ehára, ere che ryke’ýpe to me’ẽ chéve che mba’erãva, ore ru oheja va’ekuégui.

Ha Jesús he’i ichupe: Che irũ, máva piko che moĩ ra’e pende apytépe mbojovakehárõ térã mboja’ohárõ?

Ha he’i avei: Pejerereko opaichagua mba’epotágui. Jeikovéko noĩri heta mba’e ojererekóre.

Ha upérõ omombe’u ichupe kuéra ko ñe’ẽ mbojoja: “Oiko va’ekue  peteĩ imba’e retáva, hemitÿngue osẽ porã iteva’ekue  ha heta omono’õ. Upe imba’e retáva oñemoĩ ojepy’a mongeta: ‘Mba’e piko ajapóta? Ndarekói niko moõpa añongatúta che remitÿngue amono’õva.’ Ha he’i ijupe: ‘Aikuaáma mba’épa ajapóta. Aitýta pe che remitÿngue ñongatuha ha amopu’ãta tuichavéva añongatu haguã opa osẽ va’ekue  ko’ágä  ha opa arekóva.

Upéi ha’éta che jupe: ‘Che irũ, heta mba’e rereko iñongatupy heta ára jerépe guarã. Epytu’u, ekaru, emboy’u ha evy’a nde rekovépe.’ Tupã Ñandejára katu he’i ichupe: ‘Nde, výro, ko pyharépe voi remanóta. Ha pe rerekóva iñongatupy piko mávape guarãta? Péicha ojehu pe yvypóra omono’õvape mba’e reta ijupe guarã año, ha imboriahu Tupã Ñandejára renondépe.”

Ñandejára Jesucristo Ñe’ẽ.