LECTURAS CONMEMORACIÓN DE TODOS LOS FIELES DIFUNTOS

LECTURAS CONMEMORACIÓN DE TODOS LOS FIELES DIFUNTOS

Ko’ágã ñahendúta Tupã Ñandejára ñe’ẽ Apocalípsis arandukápe oĩ háicha 21, 1-5a. 6b-7

Upéi che Juan ahecha peteï ára ipyahúva ha peteï yvy ipyahúva; pe ára tenonde guare ha pe yvy tenonde guare niko ndaipóri véima, ha upéicha avei pe yguasu.

Ahecha pe táva marangatu, Jerusalén pyahu, oguejy pe yvágagui, Tupã renondégui. Oñemonde tembirekorãicha oñemondéva imenarãme. Ha ahendu peteĩ ñe’ẽ hatã osẽva pe guapyhagui, ha he’íva: Ko’ápe hína pe Tupã oikoha yvypórakuéra ndive.

Oikovéta hendivekuéra ha ha’e kuéra itavagua marangatúta, ha Tupã voi oĩta hendivekuéra Itupä ramo. Omokãta hesaykuéra, ndaipóri mo’ãvéima ñemano, tasẽ, jahe’o ha mba’e mbyasy; opa oĩ va’ekue yma niko ndaipóri véima.
Pe guapyhápe oĩva he’i: “Che ajapo pyahu jevy opa mba’e”.

Che hína pe alfa ha pe oméga, pe iñepyrũha ha ipahava. Ijyuhéivape reiete amboy’úta jeikove rehegua yvúgui. Pe osẽ porãva oguerekóta opa ko’ã mba’e che rembirejakue ramo; ha che ha’éta Itupä ha ha’e che ra’ýta.

Tupã Ñandejára Ñe’ẽ.

SALMO ÑEMBOHOVÁI 26, 1-4. 7. 8b-9a. 13-14

Opavave: Ñandejára upe che rekove ohesapéva, ha upe che pytyvõva.

o bien:
Aikuaa Ñandejára imba’e porãtaha

Ñandejára upe che rekove ohesapéva, ha upe che pytyvõva.
Mávagui piko akyhyjéta?
Ñandejára oñangareko che rehe,
Máva piko che mongyhyjéta? O.

Peteï mba’énte Ñandejárape ajerure,
peteï mba’énte aipota.
Tupaópe aikose aikove aja pukukue,
hese ajepy’a mongeta haguã,
ha’e che mbopy’a rory haguã,
ichupe amomba’e guasu haguã. O.

Ndéve niko añembo’e Ñandejára,
che poriahuvereko kena ha che rendu.
Ne rendápe niko aguahẽ Ñandejára.
Ani rekañy che hegui. O.

Aikuaa Ñandejára imba’e porãtaha che ndive
aikove aja pukukue.
Pende py’a guasúke ha ani pene ate’ỹ.
Añetehápe ha’e peẽme,
pejerovia Ñandejára rehe. O.

Todos revivirán en Cristo

Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 15, 20-23

Añetehápe katu, Cristo oikove jevy. Ha’e niko koga’a oñemono’õ tenondéva. Pe tenonde oikove jevy va’ekue. Peteĩ yvypóra rupi ou haguéicha ñemano, ambue rupi ou pe omanóva jeikove jevy. Adán rupi opavave omano ramo, Cristo rupi opavave oikove jevy va’erã.

Peteĩ teĩ hendaguãme, hembiapo kuérakue ojerureháicha: Cristo tenonderã, upéi, Cristo ou jevy vove, umi heseguáva.

Tupã Ñandejára Ñe’ẽ.

ALELUIA Lc. 24, 5

Aleluia.
Mba’e rehe piko peẽ peheka omanóva apytépe pe oikovévape?
Aleluia.

EVANGELIO

Ko’ágã ñahendúta Ñandejára Jesucrísto rekove ha hemimbo’e San Lucas omombe’u háicha 24, 1-8

Pe semána ñepyrũha árape katu, oho jevy hikuái upe tyvýpe pyharevete. Ogueraha umi mba’e ryakuã porã ombosako’i va’ekue. Oguahẽvo, ojuhu hikuái pe ita ombotýva upe tyvy ndaiporiha hendápe.

Oike hikuái, ha ndojuhúi Ñandejára Jesús retekue. Ha’ekuéra ndoikuaái mba’épa he’íta upévape. Ha peichahágui , ohecha hikuái mokõi kuimba’e oñembo’ýva ijypýpekuéra, oñemondéva ao mimbipápe. Kyhyjepópe, ojayvy hikuái yvy peve, ha umi kuimba’e katu he’i ichupekuéra: Mba’e rehe piko peẽ peheka omanóva apytépe pe oikovévape?

Ndaipóri ápe. Oikove jevýma. Pene mandu’áke pe he’i va’ekue peẽme rehe, oĩ ramo gueteri Galiléape: Tupã ra’y, ou va’ekue yvypóraicha, oñeme’ẽ va’erãha iñangaipáva pópe, oñemosãingo va’erã ichupe kurusu rehe, ha mbohapy ára haguépe oikove jevytaha. Upépe ha’e kuéra imandu’a Jesús he’i va’ekue rehe.

Ñandejára Jesucrísto Ñe’ẽ.