LECTURAS DEL VIERNES 6º TIEMPO ORDINARIO

LECTURAS DEL VIERNES 6º TIEMPO ORDINARIO

LECTURA PETEÎHA:

Ko’ágã  ñahendúta Tupã Ñandejára ñe’ẽ Génesis arandukápe oĩ háicha    11, 1-9

Upe ama guasu rire iñepyrũrã peteĩ ñe’ẽnte oiporu va’ekue opa yvypóra. Upéi isarambívo kuarahy resẽguio, ojuhu peteĩ ñu guasu Sinar hérava, ha upépe opyta.

Upérõ he’i hikuái ojupe: “Jajapo adóve ha ñambojy tatápe.” Adóve jygue oiporu hikuái ita ramo ha omboguapy ojo’ári vlékepe. Upéi he’i: “Ñamopu’ã peteĩ táva guasu ha pype óga yvate oguahẽtáva yvága peve; ta ñane rerakuã mombyry ha ani ñane sarambi yvy apére.”

Tupã Ñandejára oguejy ohecha upe táva ha óga yvate yvypóra kuéra omopu’ãva, ha he’i: “Ha’e kuéra hína peteĩ tetã ha peteĩnte iñe’ã. Ko’ágã oñepyrũ ramónte hikuái. Ko’ẽrõ iténte ojapótama ojaposéva ha ndaipóri mo’ãi ojokóva ichupe kuéra. Upéicha ramo jaguejy ñambojoavy iñe’ẽ nguéra ojuehegui, oikuaave’ỹ haguã mba’épa he’ise hikuái ojupe.”

Upéicha Tupã Ñandejára omosarambi opa rupi ichupe kuéra ha ojeheja hikuái upe táva mopu’ãgui. Upe táva oñembohéra Babel, Tupã Ñandejára ombojoavy haguére yvypóra ñe’ẽ ha upégui omosarambi opa rupi ichupekuéra.

Tupã Ñandejára Ñe’ẽ.

SALMO ÑEMBOHOVÁI 32, 10-15

R. Ovy’a va’erã umi tetã omomba’e guasúva Ñandejárape

Tupã Ñandejára oitypa yvýre opa mba’e tetã nguéra ojaposéva.

Umi mba’e Tupä Ñandejára ojaposéva katu

ndopa rei chéne araka’eve. R.

Ovy’a upe tetã oguerekóva Tupã Ñandejárape ijára ramo,

upe tetã ha’e oiporavo va’ekue imba’e teerã.

Tupã Ñandejára omaña yvága guiveha opavavépe ohecha. R.

Upe ha’e oĩhágui oma’ẽ mayma yvy apére oikóvare.

Ha’e maymáva angapy apohare

ha oikuaa opa mba’e maymáva ojapóva. R.

ALELUIA   Cf. Hech. 16, 14b

Aleluia.

Tupã Ñandejára eipe’a ore korasõ

romoneï hagua nde Ra’y Ñe’ë.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   88, 34-9, 1

Upe ramo Jesús ohenói hemimbo’ekuérape ha opavavépe, ha he’i: Oime ramo che moirũséva to ñembyesarái ijehegui, to hupi ikurusu ijapére, ha ta che moirũ. Pe hekovére hakate’ỹva, omanóta. Pe omanóva che rehehápe ha che marandu porã rehehápe katu, oikovéta. Mba’épa oguenohẽne yvypóra oguerekopárõ opa ite mba’e ipópe, ha oñehundi ramo ha’e? Mba’eve!

Mba’épa ikatúne yvypóra ome’ẽ oikove jevy haguã? Mba’eve! Oimérõ che rerotĩva ha oguerotĩva che ñe’ẽ ko’ã tekove jeroviaha’ỹ ha mba’e vai apoha renondépe, che avei, yvypóraicha aju va’ekue, atĩne heseve kuéra ajúvo che Ru mimbipa reheve ha Tupã Ñandejára remimbou marangatu kuéra ndive.

Jesús he’i avei ichupekuéra: Añetehápe ha’e peẽme, ko’ápe oĩva apytépe oĩ nomano mo’ãiva ohecha mboyve Tupã Ñandejára sãmbyhy.

Ñandejára Jesucristo Ñe’ẽ.