LECTURAS DEL JUEVES 6º TIEMPO ORDINARIO

LECTURAS DEL JUVES 6º TIEMPO ORDINARIO

LECTURA PETEÎHA:

Ko’ágä   ñahendúta Tupã Ñandejára ñe’ẽ Génesis arandukápe oĩ háicha                                             9, 1-13

Opi rire upe ama guasu ha ikã rire upe yvy, Tupã Ñandejára  ohovasa Noé ha ita’ýra kuérape he’ívo: “Peñe moña ikatu haguã pende ra’y kuéra iñasãi opa rupi yvy jerekuévo. Tymba, guyra ha pira kuéra okyhyjéta pende hegui. Umíva opyta pende poguýpe. Ikatu pe’u umíva ha ka’avo kuéra avei. Ame’ẽ peẽme opa umíva pene rembi’urã.

Peteĩ mba’e año ite ani pe’u: mymba ojehuguy’o’ỹ va’ekue ro’o. Huguýpe niko oĩ hekove.”

“Upe oporojukáva ojejukáta.

Che rembiapoukapy hína kóva: upe oporojukáva to jejuka.

Che ajapo va’ekue yvypórape che joguaha ramo; upévare, pe ojukáva yvypórape, hapicha ojukáta ichupe.

Peñe moña iñasãi haguã pende ra’y kuéra yvy jerekuévo.”

Tupã Ñandejára he’i avei Noé ha ita’ýra kuérape: “Ko’ágã añe’ẽ me’ẽ pene ndive, ha pene ñemoñare kuéra ndive, ha avei tymba kuéra, guyra kuéra ha opa oikovéva osẽ va’ekue ygára guasúgui ndive. Che ñe’ẽ ame’ẽva peẽme: águive, avave nomano mo’ãvéi y oporoaho’ipáva rupi, ha y ndojaho’i mo’ãvéi yvy. Techaukaha ramo añe’ẽ me’ẽ hague peẽme opa árape guarã, amoĩ araíre jy’ýi.

Tupã Ñandejára Ñe’ẽ.

SALMO ÑEMBOHOVÁI   101, 16-21. 29. 22-23

Opavave: Tupã Ñandejára oma’ẽ yvýre amo yvatégui.

Tupã Ñandejára, tetãnguéra nde réragui okyhyjéne,

mburuvicha guasu kuéra ne momba’éne.

Tupä Ñandejára omopu’ã jevy vove Sión,

ha ojechaukávo heko mimbipápe,

ohendúne imboriahúva ñembo’e

ha nomboykéi chéne imba’e jerure. O.

Ko’ã mba’e kuatiápe to ñemoĩ, oikuaa haguã umi oútava,

ha oikove’ỹva gueteri ágã omomba’e guasu Ñandejárape.

Tupä Ñandejára oma’ẽ yvýre amo yvatégui,

upe hekoha marangatu guive oma’ẽ,

ohendu haguã iñapytĩmbýva ñembyasy,

ha umi ojejukátavagui opoi haguã. O.

Ne rembiguái ra’y kuérare reñangarekóne,

ha iñemoñare kuéra oiko porãne nde rupi.

Tupä Ñandejára réra ojererohorýne Siónpe,

héra oñemomba’éne Jerusalénpe, ágã tetã nguéra

oñembyatývo oñondive omomba’e guasu joa haguã ichupe. O.

ALELUIA                                                         

 Cf. Jn 6, 63c. 68c

Aleluia.

Tupã Ñandejára ne Ñe’ẽ hína Añete ha Tekove;

Nde ereko ñe’ë orekóva Tekove opa ára guarã.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 8, 27-33

Upe ramo Jesús ha hemimbo’ekuéra oho táva Cesarea Filípope. Tapére Jesús oporandu hemimbo’ekuérape: Mavaha che piko oje’e?

Ha’e kuéra he’i ichupe: Oĩ he’íva ndeha Juan Bautista, oĩ he’íva ndeha Elías ha oĩ he’íva ndeha umi maranduhára peteĩva. Jesús oporandu ichupe kuéra: Ha peẽ piko mba’e peje, mávapa che?

Pedro he’i ichupe: Nde hína upe Mesías.

Jesús katu he’i hemimbo’ekuérape ani haguã he’i hese mba’eve avavépe.

Jesús oñepyrũ ombo’e ichupekuéra. He’i ha’e, yvypóraicha ou va’ekue, heta ohasa asytaha, ha ndoikuaase mo’ãiha ichugui  mba’eve moakãhárakuéra, pa’i ruvicha kuéra ha umi Moisés rembiapoukapy mbo’eha.

He’i ichupekuéra ha’e ojejukataha ha oikove jevytaha mbohapy ára haguépe. Kóva ha’e omomarandu porã ichupe kuéra.

Upépe Pedro ogueraha ichupe ha’eñoháme, ha he’i ichupe anive haguã péicha oñe’ẽ. Jesús katu oñembojere, oma’ẽ hemimbo’ekuérare ha oja’o Pédrope he’ívo ichupe: Ejei che ypýgui, Satana! Nde niko yvypóraicha reñandu ko’ã mba’e, ndaha’éi Tupã oñanduka háicha.

Ñandejára Jesucristo Ñe’ẽ