LECTURAS DEL MIÉRCOLES 6º TIEMPO ORDINARIO

LECTURAS DEL MIÉRCOLES 6º TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha  7, 6-7; 8, 6-13. 20-22

Oñepyrũvo upe ama guasu Noé, ta’ýra kuéra, hembireko ha inuéra kuéra oike kuri upe ygára guasúpe. Ohasa rire 40 ára, Noé oipe’a ygára guasu rovetã, ha opoi peteĩ yryvúgui. Upéva oveve ygára jerére y hypa peve yvy ári. Upéi Noé opoi peteĩ pykasúgui, oikuaa haguã ýpa oguejýma ra’e. Y ojaho’i gueteri yvy ape ha pykasu ndojuhúi oguejy haguã, upévare ou jevy. Noé ipojái pykasúre ha omoinge jevy ygára guasúpe.

Noé oha’arõve 7 ára ha opoi jevy pykasúgui. Ka’aru etévo ou jevy ha ogueru ijurúpe yvyra rakãmi. Upéicha Noé oikuaa y oguejýma hague. Oha’arõve 7 ára ha opoi jevy pykasúgui, upéva ndou véima.

Noé oguereko ramo 601 áño, y oguejýma. Ára peteĩme, mes peteĩháme, hérava Nisán, Noé oipe’a ygára técho ha ohecha yvy iñapekãha ohóvo.

Noé omopu’ã Tupä Ñandejárape peteĩ altar ha oiporavo opaichagua tymba ha guyra ipotĩvagui, ha hi’ári oikuave’ë Tupä Ñandejárape mymbahapy.

Tupã Ñandejára ohetũ upe mba’e ryakuã asy ha he’i: “Ndajahéi mo’ã véima yvýre yvypóra rembiapo vai kuére, ahecháma niko imitã guive ohekaha ivaívante voi. Ha nahundi mo’ã véima mba’e veichagua oikovévape, ajapo haguéicha”

“Yvy oiko aja, oĩta ñemitỹ ha kóga mono’õ. Haku ha ho’ysãta, oĩta ára haku ha ára ro’y, ára ha pyhare.”

Tupã Ñandejára Ñe’ẽ.

SALMO ÑEMBOHOVÁI    115, 12-15. 18-19

Opavave: Toñemomba’e guasu Tupã Ñandejárape

Mba’éicha piko ikatúta amoengovia Ñandejárape

ha’e ipy’a porãite haguére che ndive?

Upe kópa ñane renohẽva vy’a’ỹgui

amopu’ãne ha hérape añembo’éne. O.

Ajapóne umi mba’e ha’e va’ekue  Ñandejárape

opa hetãgua renondépe.

Tupã Ñandejára ombyasy ohechávo omano umi hese ojeroviáva. O.

Ajapóne umi mba’e ha’e va’ekue Ñandejárape

opa hetãgua renondépe, Tupã Ñandejára tupao pepo guýpe,

Jerusalén mbytetépe. O.

ALELUIA    Cf. Ef 1, 16-18

Aleluia.

Tupã, Ñandejára Jesucristo Ru tohesape ore korasõ

ikatu haguã ñamomba’e pe Ñeha’arö ñañe henói va’ekuépe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha  8, 22-26

Upe ramo Ñandejára ha hemimbo’ekuéra oguahẽ hikuái Betsáidape, ha ogueraha hikuái peteĩ ohecha’ỹva Jesús rendápe, ha ojerure ichupe opoko haguã hese.

Jesús ipojái pe ohecha’ỹva póre ha oguenohẽ ichupe táva rokápe, hendýpe omoakÿ hesa, omoĩ ipo hese ha oporandu ichupe ikatúpa ohecha. Pe ohecha’ỹva oñepyrũ ohecha ha he’i ichupe: Ahecha yvypóra kuéra, ojogua yvyra hakã ha hoguéva oguatávape.

Jesús omoĩ jevy ipo hesáre, ha pe kuimba’e oma’ẽ porã ha okuera opytávo. Opa mba’e ohecha porã.

Upérõ Jesús omondo hógape ha he’i ichupe: Ani reho jevy pe távape.

Ñandejára Jesucristo Ñe’ẽ.