LECTURAS: MARTES 6º DURANTE EL AÑO

LECTURAS: MARTES 6º DURANTE EL AÑO

LECTURA PETEĨHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha       6, 5-8; 7, 1-5. 10

Tupä Ñandejára ohechávo mba’éicha ite pevépa mayma yvypóra iñaña ha oheka ivaívante voi, ombyasy ipy’a ite guive ojapo haguére ichupe kuéra. Ha he’i: “Ahundíta opa yvypóra, opa mymba, opa yvýre otyryrýva ha opa guyra ajapo va’ekue. Ambyasy ajapo hague ichupe kuéra.”

Noé ndive katu ipy’a porã Tupä Ñandejára.

Tupä Ñandejára he’i Noépe: Eike ygára guasúpe nde rogagua maymáva ndive. Ajuhu nde año ite ne marangatuha nde javegua apytépe. Tymba ipotĩvagui, ehupi 7 máchova ha 7 kuñáva. Ipotĩ’ỹvagui katu, peteĩ máchova ha peteĩ kuñáva. Guyra kuéragui emoinge 7 máchova ha 7 kuñáva, oikove ha oñemuña haguã yvy ári. Ohasa rire 7 ára amongýta yvy ári 40 ára ha pyhare pukukue, ha ahundíta opa oikovéva ajapo va’ekue. Noé ojapo opa mba’e Tupã Ñandejára he’i haguéicha ichupe.

Ohasa rire 7 ára y oñepyrũ ojaho’i yvy ape.

Tupã Ñandejára Ñe’ẽ

SALMO ÑEMBOHOVÁI 28, 1a. 2. 3ac-4. 3b. 9c-10

R. Ñandejára ohovasa hetãyguápe ome’ẽ ichupe py’a guapy

Pemomba’e guasu Ñandejárape, tekove yvága pegua.

Pemomba’e guasu ichupe ha’e imbarete ha tuichágui.

Pemomba’e guasu héra ñane mbopy’a rorýva.

Tupä Ñandejára ohovasa py’aguapýpe hese ojeroviávape. R.

Tupä Ñandejára Ñe’ẽ hyapupa y apére.

Tupä Ñandejára oñemoĩ yguasu ári.

Tupä Ñandejára Ñe’ẽ hatã hyapu,

Tupä Ñandejára Ñe’ẽ opa rupi oñehendu. R.

Osunu Tupã tuicha itéva oñehendukávo.

Ñandejára oñemoĩ yguasu ári.

Tupaópe maymáva he’i: “Tupã Ñandejára niko tuicha”.

Tupä Ñandejára oguapy opa árape ijapyka Sambyhyhápe R.

Tupä Ñandejára Ñe’ẽ oipoka yvyra mátakuéra, ha ka’aguy omoperõ.

Tupä Ñandejára oguereko ama ipo guýpe,

ha’e mburuvicha guasu opa árape guarã. R.

ALELUIA    Jn 14, 23

Aleluia.

Ñandejára Jesucristo he’i:

Upe che rayhúva nomboyke mo’äi che ñe’ë, che Ru ohayhúta ichupe.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha.                                               8, 13-21

Upe ramo guare Ñandejára ojupi jevy upe kanóape ha oho ambue y mboypýri, hesaráigui ra’e hikuái ogueraha haguã hi’upyrã, ha peteĩ mbuja añónte oguereko hikuái pe kanóape. Jesús he’i ichupe kuéra: Peñe ñangarekóke umi fariséo ha Herodes rova mokõigui.

Hemimbo’e kuéra imandu’a ojupe ndoguerúi hague mbuja. Ha Jesús oikuaa mba’épa he’i hikuái, ha upévare he’i ichupe kuéra: Mba’ére piko peñe’ẽ eterei ndaperekoiha mbuja? Ne’ĩra pehecha kuaa ajépa. Péicha ite peve piko oñemboty pene apytu’ũ? Pende resa niko, ha piko ndapehechái? Pende apysa ha napehendúi? Na pene mandu’ái nga’u piko, amboja’o hague 5 mbuja 5.000 apytépe, ha mboy ajakápa pemboaty hembyrégui?

Ha’ekuéra he’i: 12.

Na pene mandu’ái nga’u piko amboja’o hague umi 7 mbuja  umi 4.000 kuimba’épe. Ha mboy ajaka piko pemboaty hembyrégui?

He’i hikuái: 7.

Upérõ he’i ichupe kuéra: Ndapehecha kuaái gueteri piko?

Ñandejára Jesucristo Ñe’ẽ