LECTURAS: LUNES 6º DURANTE EL AÑO

LECTURAS: LUNES 6º DURANTE EL AÑO

LECTURA PETEĨHA:

Ko’ágã    ñahendúta Tupã Ñandejára ñe’ẽ Génesis arandukápe oĩ háicha       3, 23a; 4, 1-15. 25

Adán oñeno hembireko Éva ndive. Ha’e hye guasu ha imemby kuimba’e, ha he’i: “Tupä Ñandejára che pytyvõgui che memby kuimba’e.” Upévare ombohéra Caín. Upéi imemby kuimba’e jevy ha ombohéra Abel. Abélgui oiko ovecha rerekua, ha Caíngui katu ñemitỹhára.

Oguahẽvo ñemono’õha ára, Caín omboyke Tupä Ñandejárape guarã peteĩ aty hemitỹ nguégui ha oikuave’ẽ ichupe. Abel avei ogueru ijovecha ra’y kuéra ypykuégui, ojuka ha oikuave’ẽ Tupä Ñandejárape umi ijovecha ikyra ha iporãvéva. Ñandejára oguerohory Abel ha imba’e kuave’ẽ. Caín ha imba’e kuave’ẽ katu ndo guerohorýi.

Upévare Caín ipochy ha opoi hovágui. Tupä Ñandejára he’i ichupe: Mba’ére piko nde pochy ha reiko nde rovasy?

Rejapo rire iporãva revy’a va’erã mo’ã. Rejapo haguére ivaíva katu, pe angaipa ne ra’arõ nde róga rokẽme ha nde rerekose ipoguýpe. Ha nde ikatu nde pu’aka hese.

Peteĩ jevy Caín he’i ityvýra Abélpe: Ñasẽna jaguata okáre.

Ha oĩma ramo hikuái ñúme Caín ojeity hi’ári ha ojuka ichupe. Tupä Ñandejára oporandu Caínpe: Mamópa oime nde ryvy Abel?

Ha’e ombohovái: Ndaikuaái. Che piko che ryvy rerekua mba’e?

Upérõ Tupä Ñandejára he’i ichupe: Mba’épa rejapo ra’e? Ahendu nde ryvy ruguy osapukái yvy guive ha ojerure chéve roinupã rasy haguã ne rembiapovai kuére.

Upévare repyta ijaheipy ramo ha ndaikatu mo’ãvéi remba’apo yvýre, oipe’a va’ekue ijuru tymba ñarõicha ho’u haguã nde ryvy ruguy, nde po tee rupi reñohẽ va’ekue. Reñemitĩse ramo nopu’ã mo’ãi ndéve mba’eve, ha reikóta opa rupi rei, na ne rendái mamove.

Caín he’i Tupä Ñandejárape: Ko ne tukumbo reitýva che apére ho’a rasy che ári ha ndaikatu mo’ãi aropu’aka. Nde che mosẽ ko’águi, ha che mondo mombyry nde hegui, aiko haguã opa rupi oga’ỹre ko yvy ári. Ha oimeraẽ che juhúva che jukáta.

Tupä Ñandejára katu he’i ichupe: Nahániri. Oime ramo nde jukáva, ndaha’e mo’ãi ojejukátava ha’énte. Oñemoengovia rasyvéta katu ichupe.

Tupä Ñandejára omoĩ Caín rehe peteĩ tembiecharã, ani haguã avave ojuka ichupe.

Adán ita’ýra jevy hembirekógui ha ombohéra Set. Ha’e he’i: “Tupã Ñandejára ome’ẽ chéve che ra’yrã Abel rekovia, ojuka va’ekue Caínpe.”

Tupã Ñandejára Ñe’ẽ

SALMO ÑEMBOHOVÁI                  49, 1. 8. 16b-17. 20-21

R. Jahecha ramo ha jagueropurahéi Tupä Ñandejárape.

Ñandejára, Tupã oĩva maymave tupã ári,

oñe’ẽma, Ha’e ohenói opa ko yvy apére oikóvape,

kuarahy resẽ guive kuarahy reike peve.

Ne kuave’ëmby opa ára oï che renondépe. R.

Mba’éicha rupi ne mandu’a che ñe’ẽ me’ẽre?

Roheko mbo’e ramo niko mba’eve ndereikuaaséi,

ha che Ñe’ẽre nderejepy’apýi. R.

Reguapy ha nde ryvýre retaky, ichupéma remoherakuã vai.

Opa ko’ã mba’e niko rejapo. Ha piko reipota akirirĩ?

Nde piko reimo’ã che ndeichaguaha mba’e?

Nde rovakete anohẽta ndéve nde rembiapo vaikue. R.

ALELUIA Jn 14, 6

Aleluia.

Ñandejára Jesucristo he’i:

Che hína pe Tape, Añete ha Tekove.

Maräve ndohói che Ru rendápe nda ha’éi ramo che rehe ae. Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha.                                                8, 11-13

Upe ramo oguahẽ fariséo kuéra ha oñoñe’ẽ api Jesús ndive. Ojerure ichupe ojapo haguã mba’e hechapyrãva, ohecha kuaa haguã ha’e kuéra Tupã ombou hague ichupe. Jesús hi’ãho ipy’a ite guive ha he’i: Mba’ére piko ko’ã tekove ojerure ohecha haguã mba’e hechapyrãva? Añetehápe ha’e peẽme, ndojehechauka mo’ãi peẽme mba’e veichagua mba’e hechapyrãva.

Ha oheja ichupekuéra, ha ojupi jevývo ygápe, ohasa yguasu mboypýri.

Ñandejára Jesucristo Ñe’ẽ