LECTURAS DEL LUNES 7º TIEMPO ORDINARIO

LECTURAS DEL LUNES 7º TIEMPO ORDINARIO

LECTURA PETEÎHA:

Ko’ágä   ñahendúta Tupã Ñandejára ñe’ẽ Eclesiástico arandukápe oĩ háicha      1, 1-10

Opa arandu ou Tupã Ñandejáragui, ha oĩ hendive opa ára.

Mávapa ikatúne oipapa yvy ku’i ra’ỹi oĩva yguasu rembe’ýpe,

ama ndyky, térã mboy árapa oĩ ára ijapyra’ỹvape?

Ava piko ikatu oha’ã yvága yvatekue, yvypekue, tugua pypuku térã arandu?

Opa mba’e mboyve ojejapo va’ekue arandu ha akã porã imba’e recha kuaáva oikónte va’ekue voi.

Pe arandu ykua hína Tupä Ñandejára Ñe’ẽ oĩva ijyvatehápe, ha umi hi’y rape hína hembiapoukapy opa árape guarãva.

Avápe piko ojekuaauka ra’e arandu rapo, ha máva piko oikuaa ra’e imba’e ñemimby?

Mávape piko ojehechauka ra’e pe arandu kuaa, ha mávape piko hesakã ra’e umi hapeita?

Peteĩnte oĩ iñarandúva, ha upéva hína peteĩ ojekyhyje etereiha: Tupä Ñandejára oĩva iguapyhápe.

Ha’e voi ojapo pe arandu, ohecha, oha’ã ha ohekuavo opa hembiapokue ári.

Ha’e ome’ẽ heta rasa opa yvypórape, ha omohembypa umi ichupe ohayhúvape.

Tupã Ñandejára Ñe’ẽ.

SALMO ÑEMBOHOVÁI   92, 1-2. 5

R. Mburuvicha guasu hína Tupä Ñandejára.

Mburuvicha guasu hína Tupä Ñandejára.

Tupä Ñandejára oñeñuã mimbipápe

ha ojeku’akua pokatúpe.

Hatã yvy omohenda, ndoku’éi chéne araka’eve. R.

Upe nde guapyha oĩ yma ite guive

ha nde katu opa ára reikove.

Ore Jára, umi ne rembiapoukapy niko ijeroviapýva hína.

Teko marangatu ombojegua nde tupao opa ára. R.

ALELUIA     Cf. 2Tim. 1, 10b

Aleluia.

Ñandejára Jesucristo ñane Pysyröhára ipu’aka manóre

ha ombojajái tekove oñembyai’ÿva, Marandu porä rehe ae.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha      9, 14-29

Upe ramo guare ou jeývo Ñandejára oĩháme hemimbo’e kuéra, ohecha peteĩ aty guasu ojeréva hese kuéra ha Moisés rembiapoukapy mbo’eha oñoñe’ẽ apíva hendive kuéra. Ohechávo Jesúspe opavave oho pya’e huguãitĩvo ha ohecha ramo ichupe.

Ha’e oporandu ichupe kuéra: Mba’ére piko peñoñe’ẽ api hendive kuéra?

Peteĩ ha’e kuérava he’i: Ápe aru ndéve che ra’y, oguereko niko peteĩ mba’e pochy omoñe’ẽngúva ichupe. Mamo ha’e oĩháme pe mba’epochy oity ichupe yvýre, ijuru ryjuipa, omopururũ hãi nguéra ha hatãmba opytávo. Ajerure neremimbo’e kuérape omosẽ haguã ichugui  pe mba’epochy ha ndaikatúi omosẽ.

Jesús he’i: Háa, tekove jerovia’ỹ! Araka’e peve piko aiméta pene ndive, araka’e peve piko aikóta pende reheve? Peru chéve pe mitã rusu.

Ogueraha hikuái pe mitã rusu Jesús rendápe. Pe mba’e pochy ohechávo Jesúspe katu, oityvyro pe mitã rusúpe ha upéva ho’a ojapajeréi yvýre, ha ijuru ryjuipa.

Jesús oporandu itúvape: Araka’e guive piko ojehu ichupe kóva?

Itúva he’i: Imitã guive.

Ha heta jevy pe mba’epochy oity va’ekue ichupe tatápe ha ýpe ojuka haguã. Oĩrõ ikatúva rejapóna ore poriahuvereko ha ore pytyvõmi.

Jesús he’i ichupe: Mba’ére piko ere ‘ikatúrõ’? Opa mba’e ikatu ojeroviáva peguarã!

Upérõ pe mitã rusu ru osapukái: Che ajerovia. Che pytyvõna ajeroviave haguã!

Jesús ohechávo hetaveha umi oñemboatýva, oja’o pe mba’epochýpe he’ívo:

-Espíritu Ñe’ẽngu ha rehendu’ỹva, ha’e ndéve resẽ haguã pe mitã rusúgui ha anive haguã reike pype.

Pe mba’epochy osapukái ha oityvyro jevy pe mitã rusúpe. Upéi osẽ ichugui  ha oheja omanóva ramo, ha upévare heta oĩ he’íva omano hague. Jesús katu ipóre ipojáivo, omopu’ã ichupe ha pe mitã rusu oñembo’y.

Upéi Jesús oike peteĩ ógape ha hemimbo’e kuéra oporandu ichupe ha’eñoháme: Mba’ére piko ndaikatúi ra’e ore romosẽ pe mba’epochy?

Ha Jesús he’i ichupe kuéra: Koichagua mba’epochy, ñembo’e rupi ha karu’ỹme jehasa rupi mante ikatu oñemosẽ.

Ñandejára Jesucristo Ñe’ẽ