LECTURAS DEL MARTES 7º TIEMPO ORDINARIO

LECTURAS DEL MARTES 7º TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha   2, 1-11

Che ra’y, reikosérõ Tupä Ñandejára rembiguáirõ, eñembosako’i jehasa asyrã.

Eñembopy’a hatãke ha epyrũ hatã, ha ani rejepy’apy rejepy’a ra’ãvo.

Eja Tupã Ñandejárare ha ani rejeítei ichugui ; upéicharõ, amo ipahápe, ou porãne ndéve.

Ejapyhy porã oúva guive ha eha’arõ kuaa rehasa asy heta ramo jepe.

Tatápe ningo ojekuaa mba’éichaguápa pe óro, ha imarangatúva ojekuaa jehasa asy rata kuápe.

Ejerovia Tupã Ñandejárare ha ha’e ne pytyvõta, eiko hekópe ha ejerovia hese. Peẽ pemboajéva  Tupä Ñandejárape peha’arõ iporiahuvereko. Ani pepía tape porãgui, cháke pe’áne.

Peẽ pemboajéva  Tupä Ñandejárape pejerovia hese, ha ndapepyta rei mo’ãi. Peẽ pemboajéva  Tupä Ñandejárape pehupitýta ichugui  akã rapu’ã, vy’a opa’ỹva ha poriahuvereko.

Pemaña umi yma guarére: avave ojeroviáva Tupã Ñandejárare nosẽ vaíri, avave ombyajéva añetehápe ndopyta reíri; opavave hese imandu’ávape ohendu katu ete.

Ñandejára oporombyasy ha oporoporiahuvereko kuaa, oheja rei angaipa ha oporoguenohẽ jejopýgui.

Tupã Ñandejára Ñe’ẽ

SALMO ÑEMBOHOVÁI 36, 3-4. 18-19. 27. 39-40

Opavave: Tupã Ñandejára rehe ejerovia.

Tupã Ñandejára rehe ejerovia ha ko

yvy ári reikóvo rehupitýne py’a guapy.

Tupã Ñandejára nde py’a to mbovy’a, ha’e ohupityukáne  ndéve opa mba’e nde py’a ite guive reipotáva. O.

Tupã Ñandejára oñangareko heko potĩvare,

ichupe ome’ẽ yvy imba’e teerã.

Ndohasa asýi chéne ha’e, ha hyvatãne ñembyahýi guasu ou ramo. O.

Eheja ivaíva ha ejapo iporãva ha nde repyta mo’ãi yvy’ỹre.

Tupä Ñandejára ohechase teko joja,

ha ndoheja rei chéne umi hese ojeroviávape. O.

Tupä Ñandejára oipytyvõ heko potĩvape,

hendápe ha’e kuéra oguahẽ kuaa ojejopy vai jave.

Tupä Ñandejára oipe’a ichupe kuéra upe jejopy vaígui,

ha’e kuéra ojerovia haguére hese. O.

ALELUIA  Gál 6, 14

Aleluia.

Che Ñandejára Jesucristo kurusu añóre ajeroviáta

heseve yvypóra oñemongurusu avei,

che aime háicha yvypórape guarä.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha    9, 30-37

Upe ramo Jesús ohóvo upégui ohasa hikuái Galiléa rupi. Jesús katu ndoipotái avave oikuaa, ombo’égui hína hemimbo’e kuérape. He’i ichupe kuéra: Che, yvypóraicha aju va’ekue, ha’áta hína yvypóra kuéra pópe. Ha’e kuéra che jukáta. Ha mbohapy ára amano haguépe katu, aikove jevýta.

Ichupe kuéra nahesakãi pe ha’e he’íva, ha okyhyje hikuái oporandu haguã ichupe.

Oguahẽ hikuái Cafarnaúmpe. Oĩ marõ hikuái hógape, Jesús oporandu ichupe kuéra: Mba’ére piko peñoñe’ẽ api pejúvo tapére?

Ha’e kuéra katu okirirĩ. Tapére niko oñoñe’ẽ api ra’e, mávapa upe mba’e guasuvéva ijapytépe kuéra. Ha Jesús oguapy, ohenói umi 12, ha he’i ichupe kuéra: Oĩrõ mba’e guasuséva, oiko va’erã tapykue pegua ha opavave rembiguái ramo.

Upéi omoĩ peteĩ mitãme ijapytépe kuéra, ha ohupívo ijyva ári he’i ichupe kuéra: Oimeraẽva, che rérape oguerohorýva peteĩ mitã koichagua, chéve che rerohory. Ha upe chéve che rerohorýva, nda chéve añói che rerohory, upe che mbouharépe ave.

Ñandejára Jesucristo Ñe’ẽ.