LECTURAS MIÉRCOLES 7º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha   4, 11-19

Arandu omoakã rapu’ã imembykuérape ha oñangareko hekahárare.

Umi ohayhúva arandu, ohayhu hekove ha umi ohekáva ipy’a ite guive, henyhẽta vy’águi.

Oguerekóva, ojeapóta mba’e ramo ha mamo ohohápe, ohovasáta ichupe Tupä Ñandejára.

Omba’apóva ichupe guarã, omomorã Imarangatúvape.

Arandu rayhuhárape Tupä Ñandejára ohayhu.

Upe oikóva ha’e he’i háicha ombojovakéta tetã nguérape, ha hese ojapysakáva, oikóta kyhyje’ỹre.

Ojeroviáva hese, ohupitýta imba’erã ha ombohasáta iñemoñare kuérape.

Iñepyrũrã oisãmbyhýta ichupe tape ikoni koníva rupi, omongyhyje ha omopirĩmbáta ichupe.

Ombohasa asýta ichupe hemimbo’e reheve ojerovia peve hese.

Oikuaa haguã mba’éichaguápa ha’e, umi mba’e hasýva ojapoukáva ichupe rupi.

Upéi oúta ichupe tape ikarẽ’ỹva rupi, ombovy’áta ha oikuaaukáta ichupe imba’e ñemimby.

Ha’e opia ramo hapégui, ojeíta ichugui  ha ohejáta oñehundi.

Tupã Ñandejára Ñe’ẽ.

SALMO ÑEMBOHOVÁI  118, 165. 168. 171-172. 174-175

Opavave: Tupã Ñandejára, ne rembiapoukapy upe che mbovy’áva.

Umi ne rembiapoukapy ohayhúva py’a guapýpe oiko,

ndaipóri mba’eve osẽ vaíva ichupe kuéra.

Ne rembiapoukapy ha ne rembipota che ajapo,

che reko nde reikuaa porã. O.

Purahéipe to romomba’e guasu,

ne rembipota che mba’e haguére.

Ta ropurahéi upe ne ñe’ẽ,

ne rembiapoukapy niko imarangatu. O.

Che Jára, hi’ã eterei niko chéve che renohẽ jejopy vaígui,

ne rembiapoukapy upe che mbovy’áva.

Eheja taikove romomba’e guasu haguã,

ha ne ñe’ẽ ta che pytyvõ. O.

ALELUIA  Jn 14, 6

Aleluia.

“Che hína pe Tape, pe Añetegua, ha pe Tekove.

Avave ndohói che Ru rendápe, ndaha’éi ramo che rehe ae”

He’i Ñandejára Jesucristo.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 9, 38-40

Upe ramo Juan he’i Ñandejárape: Mbo’ehára, rohecha peteĩ omosẽva mba’e pochy nde rérape, ha rojoko, ndaha’éigui ore apytepegua.

Jesús he’i: Ani pejoko, peteĩ ojapóva hechapyrãva che rérape niko upéi noñe’ẽ vai mo’ãi che rehe. Upe noñemoĩriva ñande rehe, oĩ ñane ndive.

Ñandejára Jesucristo Ñe’ẽ