Ñahendu Jesús Ñe’ẽ. Domingo 5º Tiempo Durante el Año

Escucha el evangelio y la reflexión en: https://youtu.be/rSgQB93FJgE

Domingo 5º Durante el Año Ciclo A  

       Mateo 5, 13 – 16

Upérõ Jesús he’i idisípulo kuérape: – Peẽ niko jukýicha ko yvy apére. Pe juky nahe’ẽvéi ramo niko ndikatu véima ñamohe’ẽ jey. Mba’everãma na’iporãi. Ñamombo okápe ha oñepyrũmba hese.

                    Peẽ niko ku mba’e rendýicha hína ko yvy apére. Peteĩ táva oĩva sérro ru’ãme niko ndaikatúi jajaho’i. Avave niko nomyendýi lampĩu ha upéi omoĩ kambuchípe térã tupa guýpe. Yvate katu omoĩ, ohesape hag̃ua opa pe óga ryepy. Péichake avei peẽ. Peñeha’ã pehesape opavave renondépe, ha tojehecha pene rembiapo porãngue, ha tomomba’e guasu pende Ru, yvágape oĩvape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko he’íva: Che rógapente añembo’e, che kotýpe, che añoháme, che nicho renondépe.  Jesús voi niko he’i va’ekue natekotevẽi ñañembo’e haguã ñañemoĩ opavave renondépe. Tupãnte oikuaa va’erã he’i Jesús. Ko’ápe katu he’i tekotevẽha jajapo tembiapo porã ñande rapicha renondépe, oñandu ha ohecha haguã opavave. Ndaha’éi ñande japyta porã haguã, térã oñeñe’ẽ porã haguã ñande rehe, Tupã oñemomba’e guasu haguã uvei.

Pe juky niko ojehe’a ha hyku va’erã tembi’úpe omohe’ẽ haguã upe já’úva. Ndoikéiramo tembi’úpe ha’e naiporãi mba’everã. Upéicha avei pe tataindy oñemoĩramo tupa guýpe ndohesapéi avavépe. Ha upéicha avei ñande jerovia opytáramo kañymby, jaikóramo ñatĩ ha ñane tĩndy ñande rapicha apytépe, ndajajapóiramo mba’eve iporãva ñande rogagua rehe, ñande comunidad rehe, ñande capilla, ñande escuela, ñane vesíno kuéra ndive. Ñane ate’ỹgui nañasẽiramo jajotopa ha ñamba’apo, ndajahejáiramo ñande rapykuérepe mba’eve iporãva, ñande jerovia ha ñande rekove naiporãi mba’everã.

Papa Francisco he’i ñandéve: “Ñasẽ, ñasẽ ñamoguahẽ opavavépe Jesucristo rekove. Che aipotave peteĩ Iglesia oñeaccidenta… ha oñemongy’áva osẽ haguére kállepe. Ndaipotái peteĩ Iglesia ojepy’apýva ijehe año ha ha’enteséva… Oiméramo upe ñande py’apy vaerã añetéva ha ñanemyangekóiva, upéva ha’e va’erã hína jahecha hetaite ñande rapicha ikangy ha okañýva pytũmbýpe noñandúigui Jesús mborayhu, ityre’ỹva ndaijatýigui hapicha ojeroviáva ndive, ndoikuaáiva mba’e ojapóta hekovemígui”. (Evangelii Gaudium Nº 49).

ÑAÑEMBO’E OÑONDIVE

Ñandejára Jesucristo, emyendy kena ore korasõ, tembiapo porã rupive rohesape haguã ore rapichápe ha romohe’ẽ haguã hekove kuéra mborayhu rupive, nde rejapo haguéicha. Amén.

Pa’i Alberto Luna.