LECTURAS DEL DÍA DE LA SAGRADA FAMILIA

LECTURAS DEL DÍA DE LA SAGRADA FAMILIA DE JESÚS, MARÍA Y JOSÉ

LECTURA PETEÎHA:
Motivación: Génesis pe oñemombe’u mba’éichapa Ñandejára ome’ẽ Abrahámpe ita’ýra opyta hag̃ua hekoviarã, Abraham itujáma ramo jepe.

Ko’ágã ñahendúta Tupã Ñandejára Ñe’ẽ Génesis arandukápe oĩ háicha 15, 1-6; 17, 5; 21, 1-3

Ko’ã mba’e rire Abrám oñandu Ñandejára he’i ramo ichupe: Ani rekyhyje Abrám, che romo’ãta opa mba’e vaígui ha ame’ẽta ndéve heta mba’e porã. Abrám katu he’i ichupe: Nde Tupã che Jára, maerã rei piko reme’ẽta chéve mba’eve?
Amanótama ha nda che ra’ýi. Umi mba’e arekóva opytáta Eliézer Damasco guápe.

Na che moñemoñaréigui opa mba’e arekóva opytáta peteĩ che rembiguáipe. Upéma ramo ohendu jevy Ñandejára he’i ramo ichupe: Opytáva ne rendaguépe ndaha’e mo’ãi Eliézer, peteĩ nde ra’y teéta.

Ñandejára he’i ichupe osẽ haguã okápe ha oñe’ẽ ichupe kóicha: Ema’ẽ yvága rehe ha eñeha’ã eipapa mbyja ita, jahecha ikatúpa. Péicha hetáta ne ñemoñare.

Abram oguerovia Ñandejárape, ha upe guive Ñandejára oguereko ichupe imarangatúva ramo. Ha Tupã he’i chupe: Na nde réra mo’ã véima Abram. Nde rérata Abraham, che roiporavógui reiko haguã heta tetã ru ypykue ramo.

Ñandejára ohovasa Sárape he’i haguéicha. Sara hye guasu ha imemby Abrahamgui peteĩ kuimba’e, Abraham ituja riréma, upe ára Ñandejára he’i haguépe. Abraham ombohéra ita’ýrape Isaac.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 104, 1b-6. 8-9
Opavave: Ñandejára imandu’a mante iñe’ẽ rehe.

Pemomba’e guasu Ñandejárape, héra pemomba’e.
Opa tetã rupi pemoherakuã umi mba’e hechapyrãva ojapo va’ekue.
Ichupe peropurahéi ha pemoherakuã
imombe’upyrãva ha’e ojapo va’ekue. O.

Héra marangatu pembotuicha.
Ñandejára rehe ojeroviáva tovy’a.
Peguahẽ Ñandejára rendápe pytyvõ rekávo.
Opa ára peñemboja hendápe. O.

Pene mandu’áke umi mba’e hechapyrãva ojapo va’ekue rehe,
ha hembiapoukapy ijurúgui osẽ va’ekue rehe.
peẽ hembiguáikuéra Abraham ñemoñaréva,
peẽ hembiporavo Jacob ra’ykuérava. O.

Ha’e imandu’a mante iñe’ẽ ome’ẽ va’ekue rehe.
Iñe’ẽ ome’ẽ va’ekue rehe opa árape guarã.
Ha’ete voi ome’ẽ va’ekue iñe’ẽ Abrahampe,
héra tee rehe ome’ẽ va’ekue iñe’ẽ Isaácpe. O.

LECTURA MOKÕIHA:
Motivación: Abraham ojerovia rupi Ñandejára ñe’ẽre ohupyty ikatu’ỹva ha’e ojapo ijehegui. Ojerovia rupi oñeme’ ichupe ita’yra opytava’erã hekoviarã.

Ñahendúta Tupã Ñandejára Ñe’ẽ ojehai va’ekue Hebreoskuérape 11, 8. 11-12.17-19

Che pehẽnguekuéra: Ojerovia rupi, Abraham, ohenóivo ichupe Ñandejára, iñe’ẽ rendu ha osẽ oho haguã pe yvy ichupe ome’ẽtavape. Ha osẽ va’ekue pe oikohágui oikuaa’ỹ rehe mamópa oho.

Ojerovia rupi avei, ndaikatúi ramo jepe Sara imemby ha Abraham itujaetereíma, oñeme’ẽ ichupe mbarete ita’ýra haguã, oguerovia rupi Ñandejára ojapotaha katuete he’i haguéicha.

Aipo ramo Abraham, hi’ára guahẽ aguĩma ramo jepe, ou hetaiterei ita’ýra, mbyja oĩ háicha yvate ha yguasu rembe’ýpe yvyku’i, ikatu’ỹvaicha ojepapa.

Ojerovia rupi, Abraham, Ñandejára oipy’a ra’ãvo ichupe, ohupi Isaácpe oikuave’ẽ haguã pe ta’ýra peteĩmi. Tupã ome’ẽ rire ramo jepe ichupe iñe’ẽ, he’i ramo “Isaac rupi ne ñemoñaréta”.

Abraham niko ohechakuaa Ñandejára ipu’akaha omoingove jevy haguã omano va’ekuépe. Ha upéva rehe Abraham oguereko jevy ita’ýrape, ha upéva opyta mba’e rechaukaha ramo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Heb 1, 1-2
Aleluia.
Ymaite Ñandejára oñe’ẽ va’ekue ñande ru ypykuéra kuépe umi maranduhára rupi. Ko’ágã katu, ko’ã ipahavevogua árape, oñe’ẽ ñandéve Ta’ýra rupi.
Aleluia.

EVANGELIO
Motivación: José ha María oraha imemby tupaópe ojapo haguã Ñandejára ley he’i háicha. Ha osẽ Simeón ha Ana oguerohory Jesús pe, omombe’u itúva ha isýpe mba’épa oikóta pe mitãgui.

Marandu porã Ñandejára Hesukrísto rehegua San Lucas omombe’u háicha 2, 22-40

Opavave: Romomba’e guasu ndéve, Ñandejára.

Ha ohasávo 40 ára Jesús onase hague, ogueraha hikuái pe mitã Jerusalénpe, ha omoĩ Ñandejára renondépe. Péicha ojapo hikuái Ñandejára mandamiénto he’ígui: “Opa mitã kuimba’e ypykue oñemboyke va’erã Ñandejárape guarã”. Ñandejára mandamiénto he’i ave, ogueraha va’erãha hikuái, ofrendarã, mokõi pykasu ỹrõ katu mokõi jeruti ra’y.
Umiha árape niko oiko va’ekue Jerusalénpe Simeón, karai marangatu. Oha’arõva oikóvo Ñandejára osalva haguã Israélpe. Ha Espíritu Santo oĩ hendive, ha oikuaauka ra’e chupe nomano mo’ãiha ohecha mboyve pe Mesías, Ñandejára he’i va’ekue omboutaha. Ha Espíritu Santo ogueraha Simeónpe tupaópe.

Ha María ha José oikévo tupaópe pe mitã reheve, okumpli haguã Ñandejára mandamiénto, Simeón ohupi pe mitã ijyva ári ha omomba’e guasu Ñandejárape kóicha: Ko’ágã, Ñandejára, rejapóma ne ñe’ẽ. Ikatúma che reja amano py’aguapýpe.

Che resa teépe niko ahecha ko rejapóva ne retã resalva haguã. Ha opa tetã ohecháne avei. Ko mba’e rendy ohesapétava niko opa tetãme guarã, ha ombotuicháta ne retã Israel.

José ha María opyta ijurujái ohendúvo umi mba’e Simeón he’íva pe mitãre. Upéi Simeón ohovasa chupekuéra, ha he’i Maríape: — Peikuaáke kóva ko mitã ouha oity haguã heta Israelguápe. Péicha ave, hetápe omopu’ã va’erã ágã.

Ha’e niko peteĩ mba’e rechaukaháta hína, ha heta oĩta ojahéiva hese. Ha ndéve María, hasýta ku kysépe rejekutúrõ guáicha ne korasõme. Ko’ã mba’e ohechaukáta mba’e-mba’épa oĩ hína umi géntekuéra akãme.

Upe jave oĩ hína avei tupaópe peteĩ kuñakarai iguãiguĩmava, proféta ha’e. Héra niko Ana, Penuel rajy, Aser ñemoñare. Omenda va’ekue imitãme ha oiko jepe iména ndive 7 áño. Upéi katu iména omano. Ana ombotýma 84 áño, ha oiko
ha’eño. Araka’eve nosẽiva Tupaógui, ha omomba’e guasúva Ñandejárape ára ha pyhare.

Oajuna ha oñembo’e. Simeón oñe’ẽmba riremi, oguãhẽ sapy’a Ana. Ha oñepyrũ omomba’e guasu Ñandejárape. Oñe’ẽ pe mitã Jesús rehe opa umi oha’arõvape Jerusalén osẽ jejopy vaígui.

José ha María okumplipa rire Ñandejára mandamiénto, ojevy hikuái Nazarétpe, opytáva Galiléape. Pe mitã katu okakuaa ohóvo, henyhẽ arandúgui ha Tupã ohovasa chupe.

Tupã Ñandejára Ñe’ẽ.

Opavave: Romomba’e guasu ndéve, Ñandejára Jesucristo.