LECTURAS DEL 05 DE ENERO

LECTURAS DEL 05 DE ENERO

Ñahendúta Tupã Ñandejára Ñe’ẽ San Juan ohai va’ekue   1 Jn 3, 11-20

Che ra’ykuéra pohayhu etéva: Kóva hína pe Ñe’ẽ pehendu va’ekue iñepyrũha guive: Ta jajoayhu. Ha ani jaiko Caíncha, mba’epochy mba’e va’ekueha ojuka tyvýrape.

Ha mba’ére piko ojuka ichupe? Hembiapokue ivaígui, tyvýra rembiapokue katu iporã.

Che pehẽngue kuéra, ani pehecha ramo umi yvypóra rekópe oikóva ndaija’éirõ pende rehe. Ñande jahasa va’ekue ñemanógui jeikovépe, ha jaikuaa jahayhúgui ñande rapichápe. Pe oporohayhu’ỹva omano gueteri. Pe ohayhu’ỹva hapichápe hína peteĩ porojukaha, ha peikuaa pe oporojukáva ndaikatuiha oguerekóvo ipype tekove opa’ỹva.

Jaikuaa mba’épa pe mborayhu Jesucristo ome’ẽ haguére hekove ñande rayhupápe, ha ñande avei ñame’ẽ va’erã ñande rekove ñande rapicháre. Pe oguereko hetáva ha ndoiporiahuverekói hapicha oguereko’ỹvape, mba’éicha piko ikatúta he’i Tupã Ñandejara mborayhu oĩha ipype?

Che ra’ykuéra pohayhu etéva, ani japorohayhu ñande jurúpente, jahechauka avei ñane mborayhu iñañeteha ñane rembiapokue rupi. Péicharõ jaikuaáta añete reheguaha ñande ha ikatúta ñande py’aguapy Tupã Ñandejára renondépe. Ñande py’apy ñane moĩ vaírõ Tupã renondépe, Tupã Ñandejára tuichave ñande py’apýgui, ha oikuaa opa mba’e.

Tupã Ñandejára Ñe’ẽ.

SALMO ÑEMBOHOVÁI 99, 1-5

Opavave: To guerohory ko yvy Tupä Ñandejárape.

To guerohory ko yvy Tupä Ñandejárape.

Pejapo vy’a pópe ichupe hembipota,

peguahẽ hendápe sapukái rorýpe. O.

Peikuaa porãke: Ñandejára hína Tupã.

Ha’e ñande apohare ha ñande imba’e,

hetãgua ha ovecha iñu megua. O.

Peike hokẽnguéra rupi pemboaguijévo ichupe,

ha hóga guýpe purahéi reheve.

Pemboaguyje  ichupe ha héra perohory. O.

Tupã Ñandejára imba’e porãgui.

Imborayhu ndaijapýrai, ha heko jeroviaha opa árape guarã. O.

ALELUIA

Aleluia.

Iko’ë ñande peteĩ ára marngatu; tetãnguéra peju pemomba’e guasu Tupã Ñandejárape,

ko árape peteĩ mba’e rendy tuicháva oguejy yvy ape ári.

Aleluia.

EVANGELIO

Marandu porã Jesucristo rekove ha hemimbo’e San Juan omombe’u háicha   1, 43-51

Pe ára ambuépe, Jesús osẽ oho yvy Galilea gotyo. Ojuhu Felípepe ha he’i ichupe: Eju che moirũ. Felipe niko táva Betsaidagua, oikohápe avei Andrés ha Pedro. Felipe oho Andrés rekávo ha he’i ichupe: Oime rojuhu upe Moisés imandu’a hague hembiapoukapýpe ha maranduhárakuéra oñe’ẽ hague ikuatiakuérape. Upéva niko Jesús, ku José Nazaretgua ra’y hína.

Natanael katu he’i ichupe: Nazarétgui piko araka’e osẽva iporãva. Ha Felipe he’i ichupe: Eju ndete ehecha.

Jesús ohechávo Natanaélpe oguahẽha ohóvo hendápe, he’i: Kóina ko oúva Israelgua añetete, avavépe ombotavy’ỹva.

Natanael he’i ichupe: Mba’éicha rupi piko nde che kuaa?

Jesús he’i ichupe: Rohecha kuri reguapy jave reína ígo máta guýpe, Felipe ne renói mboyve.

Felipe he’i ichupe: Mbo’ehára, nde niko Tupã ra’y. Nde ha’e Israel ruvicha guasu.

Jesús he’i ichupe: Péicha piko ere ha’e haguére ndéve rohecha hague reguapy ku ígo máta guýpe? Tuichave mba’e ko’ágã rehechávagui katu rehecháta ágã.

Upéi Jesús he’i ichupekuéra: Añetehápe ha’e peẽme, peẽ pehechataha yvága ojepe’a ramo ha Tupã remimboukuéra ojupi ha oguejy ramo che, yvypóraicha aju va’ekue yvy ári rendápe.

Ñandejára Jesucristo Ñe’ẽ.