LECTURAS JUEVES VIGESIMO PRIMERA SEMANA

LECTURAS JUEVES VIGESIMO PRIMERA SEMANA

PRIMERA LECTURA:

Ñahendúta Tupã Ñandejára Ñe’ẽ San Pablo ohai va’ekue Corintos guápe 1, 1-9

Che Pablo, Tupã Ñandejára oipota rupi Jesucristo apóstol, Sóstenes ndive romomaitei umi Tupã Ñandejára iglésia Corintope guápe. Romomaitei ave opa umi oñehenóiva oiko haguã Tupã Ñandejára mba’évarõ, ha umi opa rupi omomba’e guasúva Ñandejára Jesucrístope, Ñandejára ha umi Tupã mba’éva Jára. Tupã ñande Ru ha Jesucristo Ñandejára to hekuavo pende ári ipytyvõ ha ipy’a guapy.

Opa ára ame’ẽva che aguyje Tupã Ñandejárape pende rehe, upe pytyvõ Tupã Ñandejára ohekuavo va’ekue pende árire, Jesucristo rupi. Ha’e rupi niko Tupã Ñandejára ome’ẽ va’ekue peẽme opa mba’e peñe’ẽ kuaa ha pene arandu haguã.

Jesucristo rehegua marandu niko oĩ mbaretéma pende apytépe. Upévare Tupã Ñandejáragui pereko opa mba’e, peha’arõ aja pe ára Ñandejára Jesucristo oguahẽ va’erãha. Tupã Ñandejára oñangareko hatãne pende rehe ipaha peve, avave oguereko’ỹ haguã mba’eve he’i va’erã pende rehe Jesucristo ou jevyha ára. Tupã Ñandejára nopyrũiva iñe’ẽre araka’eve, ha ha’e niko hína pe pene renói va’ekue peiko haguã Ta’ýra Ñandejára Jesucristo ndive.

Tupã Ñandejára Ñe’ẽ.

SALMO ÑEMBOHOVÁI 144, 2-7

Opavave: Ára ko’ẽre romomba’e guasúta, ha nde réra amomba’éne opa ára.

Ára ko’ẽre romomba’e guasúta, ha nde réra amomba’éne opa ára.
Tupã Ñandejára niko tuicha hína, ituichakue ndaikatúi jaikuaapa. O.

Ichupe ñamomba’e guasu va’erã.
Túvakuéra omombe’úne ta’ýrakuérape ne rembiapokue, ha’ekuéra omoherakuãne
umi mba’e tuicha iterejapóva. O.

Omombe’úne hikuái mba’éichapa remimbipa, ha che aikuaaukáne umi mba’e rechapyrã rejapóva.
Imandu’áne hikuái ne mba’e porã iteha, ha ndéve opurahéine nde reko joja haguére. O.

ALELUIA Mt 24, 42a. 44

Aleluia.
Peiméke pejesarekohápe, Tupã Ñandejára ra’y yvypóraicha ou va’ekue ou jevýta upe ñaimo’ä’ÿ jave.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 24, 42-51

Upe ramo péicha oñe’ẽ Ñandejára: Pejesarekóke aipo ramo, ndapeikuaái hína araka’etépa oúta pende Jára. Perekóke kóva pene akãme: Peteĩ óga jára oikuaa ramo araka’etépa oikéta hógape mondaha, ha’e ndoke mo’ãi ha ndoheja mo’ãi avavépe oike hógape omonda haguã ichupe. Upévare, peẽ avei pejesareko va’erã. Peimo’ã’ỹve jave niko che, yvypóraicha aju va’ekue, ajúta.

Mávapa hína pe tembiguái jeroviaháva ha imba’e recha kuaáva? Upéva hína pe ijára omoĩva ipoguýpe ambue hembiguáikuéra omongaru haguã oikotevẽ jave. Ovy’a ite va’erãnepa pe tembiguái, ijára oguahẽ vove ojuhúva ojapopaha hekópe hembiapo. Añetehápe ha’e peẽme, pe óga jára omoĩne ipoguýpe opa oguerekóva.

Pe tembiguái iñaña ramo katu, oimo’ãne ijára hi’aretaha, ha oñepyrũ oñemboharái hapicháre, ha osẽ okaru ha omboy’u umi tekove ka’u ndive. Ha ijára ou jevýne ha’e oimo’ã’ỹve ha oha’arõ’ỹve jave, omoangu’íne ichupe teju ruguáipe, oñembyepoti háicha hova mokõivape. Ha upépe ojahe’o soróta ha hãi mante opururũta.

Ñandejára Jesucristo Ñe’ẽ