LECTURAS VIERNES VIGESIMO PRIMERA SEMANA

LECTURAS VIERNES VIGESIMO PRIMERA SEMANA

PRIMERA LECTURA:

Ñahendúta Tupã Ñandejára Ñe’ẽ San Pablo ohai va’ekue Corintos guápe 1, 17-25

Che pehẽnguekuéra: Cristo niko na che mondói va’ekue aporomongaraívo, amombe’úvo marandu porãnte, ha ndaha’éi ahechaukávo che aranduha ha añe’ẽ kuaaha, ani haguã amomichĩ Cristo omano hague kurusúre.

Pe marandu omombe’úva Cristo ñemano kurusúre, výro rei umi oñehundi haguã gotyo ohóvape guarã. Ha ñandéve guarã katu, ñande ñañe pysyrõvape guarã, upe marandu Tupã Ñandejára pokatu hína. He’i háicha Ñandejára Ñe’ẽ: “Che ahejáta umi iñarandúva naiñaranduvéi, ha umi iñakã porãva naiñakã porãvéi.”

Mba’épepa opyta pe iñarandúva ha pe oporombo’éva, ha pe oñe’ẽ kuaáva opa mba’e ko yvy peguáre? Tupã Ñandejára ojapo ko yvy pegua arandúgui výro rei! Yvypóra niko ndoiporúi pe iñarandukue oikuaa haguã Tupã Ñandejárape, pe ha’e ohechauka haguépe iñaranduha.

Upévare, Tupã Ñandejára ojuhu porã oipysyrõ haguã marandu rupi, umi hese ojeroviávape, ha’ete ramo jepe ichupe kuéra upe marandu peteĩ výro rei.

Umi judío ohechase mba’e rechaukaha hechapyrãva, ha umi Greciagua oheka arandu. Ñande katu ñaporomomarandu peteï Mesías kurusúre omano va’ekuépe. Upéva ombopochy umi judíope, ha umi judio’ỹvape katu ojogua výro reípe.

Umi Tupã Ñandejára ohenói va’ekuépe katu, judío térã Greciagua, ko Mesías ha’e Tupã pokatu ha Tupã Ñandejára arandu. Pe Tupã Ñandejára rehegua ha’etéva výro rei, tuicha iteve mba’e hína opa yvypóra arandúgui. Ha pe Tupã Ñandejára rehegua ikangy vaicha, imbareteteve hína opa yvypóra mbaretégui.

Tupã Ñandejára Ñe’ẽ.

SALMO ÑEMBOHOVÁI 32, 1-2. 4-5. 10-11

Opavave: Yvy niko henyhẽ chovi Tupã Ñandejára mborayhúgui.

Mayma imarangatúva tomomba’e Tupã Ñandejárape.
Omomba’e guasu va’erã voínte ichupe, opa imarangatúva.
Pemomba’e guasu Tupã Ñandejárape mbaraka púpe, árpa púpe, pepurahéi ichupe. O.

Upe Tupã Ñandejára he’íva niko añete, ha opa mba’e ojapo teko jeroviápe.
Ha’e ohecha ramo teko joja ha opa mba’e hendápe ojejapóva. O.

Yvy niko henyhẽ chovi imborayhúgui.
Ñandejára oitypa yvýre opa mba’e tetãnguéra ojaposéva.
Umi mba’e Tupã Ñandejára ojaposéva katu ndopa reíri chéne araka’eve. O.

ALELUIA Lc 21, 36

Aleluia.
Peikóke peha’aröháme ha opa ára peñembo’e,
péicha ramo peñe mbojovakéta kyhyje’ÿre Tupä Ñandejára ra’y yvypóraicha oú va’ekue rovake.
Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Mateo omombe’u háicha 25, 1-13

Upe ramo Jesús he’i hemimbo’ekuérape: Upe Tupã Ñandejára sãmbyhy yvága pegua kóichata. Oĩ va’ekue 10 kuñataĩ, peteĩ pyhare ojapyhýva imba’e rendy ha pe kuñataĩ omendátava ndive osẽva ohuguãitĩ pe imenarãme.

Umi kuñataĩ apytégui, 5 itavy ha 5 iñakã porã. Umi itavýva, ogueraha ramo jepe imba’e rendy, ndoguerahái heta ñandyry péichahágui oikotevẽve ramo guarã.

Umi iñakã porãva katu ogueraha imba’e rendy ha iñandyry ryru. Pe menarã hi’arégui oguahẽ haguã, umi kuñataĩ hopehyipa ha ipahápe okepa. Pyhare pyte rupi katu, oñehendu sapy’a peteĩ osapukái ha he’íva: “Oúma pe menarã. Peju pehuguãitĩ ichupe!” Upévo, opáy umi 10 kuñataĩ omoendy tuichave haguã umi imba’e rendy. Umi 5 itavýva he’i umi 5 iñakã porãvape: “Peme’ẽmona oréve pende ñandyry. Ore mba’e rendy niko ogue pota itéma hína.”

Umi iñakã porãva katu he’i ichupekuéra: “Nahániri. Péicharõ niko opavave japytáta mba’eve’ỹre. Tapeho pejogua pene mba’erã.” Ha umi 5 itavýva oho aja ñandyry joguávo, oguahẽ pe menarã. Ha umi kuñataĩ iñakã porã va’ekue oike hendive mendahápe, ha upe rire pe okẽ oñemboty. Upéi, ou jeývo umi kuñataĩ oho va’ekue oñemu he’i: “Karai. Karai. Eipe’ána oréve pe okẽ!”

Ha’e katu he’i ichupekuéra: “Añetehápe ha’e peẽme, che ndapoikuaái.” Ha upéi he’i Jesús: “Pejesarekóke peẽ, ha ani peke. Cháke ndapeikuaái araka’etépa ajúne che, yvypóraicha aju va’ekue .”

Ñandejára Jesucristo Ñe’ẽ